ງານ​ວາງສະ​ແດງ ​ຜະລິດຕະພັນເຟີນີເຈີ ໄມ້ລາວ ຄັ້ງທີ VI

ສະມາຄົມເຟີນີເຈີລາວ  ຮ່ວມກັບ ກົມສົ່ງເສີມການຄ້າ, ສະພາການຄ້າ ແລະ ອຸດສາຫະກຳແຫ່ງຊາດລາວ  ແລະ ສູນການຄ້າລາວ-ໄອເຕັກ  ໄດ້ຈັດງານວາງສະແດງ ຜະລິດຕະພັນເຟີນີເຈີໄມ້ລາວ ຄັ້ງທີ  VIຂຶ້ນຢ່າງເປັນທາງການ ໃນລະຫວ່າງວັນທີ  11-19 ມັງກອນ 2020 ທີ່ສູນການຄ້າລາວ-ໄອເຕັກ ນະຄອນຫລວງວຽງຈັນ,  ໃຫ້ກຽດການເຂົ້າຮ່ວມເປີດງານ ມີ ທ່ານ ນາງ ເຂັມມະນີ  ພົນເສນາ ລັດຖະມົນຕີ ກະຊວງອຸດສາຫະກໍາ  ແລະ ການຄ້າ, ພ້ອມດ້ວຍພາກສ່ວນກ່ຽວຂ້ອງ ແລະ ແຂກຖືກເຊີນ ເຂົ້າຮ່ວມ.

ໃນໂອກາດດັ່ງກ່າວ, ທ່ານ ກອງມາລາ ພົມມາໄລ  ຮອງປະທານສະມາຄົມເຟີນີເຈີລາວ  ໄດ້ລາຍງານໃຫ້ຮູ້ວ່າ:  ງານວາງສະແດງຜະລິດຕະພັນເຟີນີເຈີໄມ້ລາວໃນຄັ້ງນີ້,  ມີຫ້ອງວາງ ສະແດງ -ຂາຍສິນຄ້າທັງໝົດ 150ຫ້ອງ ມາຈາກ  66 ຫົວໜ່ວຍທຸະກິດ. ໃນນັ້ນ, ມີຫົວໜ່ວຍທີ່ເປັນໂອດ໊ອບ 25 ຫົວໜ່ວຍ,  ມາຈາກຕ່າງແຂວງ ຈໍານວນ 11 ຫົວໜ່ວຍທຸລະກິດ,  ມີ 13 ຫ້ອງ, ມາຈາກປະເທດເພື່ອນບ້ານ  (ໄທ)  2ບໍລິສັດ ແລະ ຈາກນະຄອນຫລວງວຽງຈັນ   ຈຳນວນໜຶ່ງ. ຄາດຄະເນ ຈະມີມູນຄ່າການຈໍລະຈອນຊື້-ຂາຍສິນຄ້າ ລວມທັງໝົດ ໃນງານປະມານ 20 ຕື້ກີບ ແລະ ຄາດວ່າຈະມີການຊື້-ຂາຍໄດ້ປະມານ 80%  ຕົກເປັນມູນຄ່າ ປະມານ 16 ຕື້ກີບ ແລະ ຄາດວ່າ ຈະມີຄົນເຂົ້າມາຊົມງານວາງສະແດງທັງໝົດ  2 ແສນກວ່າຄົນ.ພາຍໃນງານ ຍັງໄດ້ ຈັດໃຫ້ມີກິດຈະກໍາຕ່າງໆ  ຕະຫລອດທັງງານ ເປັນຕົ້ນ ການແຂ່ງຂັນຮ້ອງເພັງ,  ການສະແດງຄອນເສີດ ແລະ ຈັບສະຫລາກຊິງຂອງລາງວັນຕ່າງໆ ຕື່ມອີກ.

 

ທ່ານ  ກອງມາລາ ພົມມາໄລ ຍັງໃຫ້ຮູ້ຕື່ມວ່າ:  ການຈັດງານໃນຄັ້ງນີ້, ເພື່ອເປັນການໂຄ ສະນາສິນຄ້າໄມ້ລາວ  ທັງເປັນການແລກປ່ຽນບົດຮຽນ, ປະສົບການດ້ວຍກັນ  ຂອງນັກທຸລະ ກິດຫົວໜ່ວຍການຜະລິດເຟີນີເຈີ  ທີ່ເຮັດໃຫ້ມີຜະລິດຕະພັນເຟີນີເຈີ ຈາກໄມ້ລາວ  ອອກມາຮັບໃຊ້ສັງຄົມຫລາຍຂຶ້ນ,  ພ້ອມທັງເປັນການສະແດງຜົນງານຜະລິດຕະພັນເຟີນີເຈີ  ທີ່ໃຊ້ຫົວຄິດ ປະດິດສ້າງ ໂດຍໃຊ້ນາຍຊ່າງ ທີ່ມີຄວາມຊໍານິຊໍານານ ແລະ ຄວາມປະນິດ  ສາມາດສ້າງໄດ້ຫລາກຫລາຍຜະລິດຕະພັນ,  ຫລາກຫລາຍຮູບແບບອອກສູ່ສັງຄົມ.

Medialaos

ກະຊວງ ຖວທ ເຊື່ອມຊຶມມະຕິ 9 ສະໄໝທີ X ຂອງພັກ

ອົງຄະນະພັກກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ( ຖວທ )  ໄດ້ຈັດຕັ້ງພິທີເຜີຍແຜ່ເຊື່ອມຊຶມມະຕິກອງປະຊຸມສາມັນຄົບຄະນະຄັ້ງທີ 9 ຂອງຄະນະບໍລິຫານງານສູນກາງພັກ ສະໄໝທີ X ຂຶ້ນໃນວັນທີ 10 ມັງກອນນີ້ ທີ່ຫໍວັດທະນະທຳແຫ່ງຊາດ, ພາຍໃຕ້ການເປັນປະທານຂອງທ່ານ ກິແກ້ວ ໄຂຄຳພິທູນ ຄະນະເລຂາທິການສູນກາງພັກ ເລຂາຄະນະພັກ ລັດຖະມົນຕີກະຊວງ ຖວທ, ມີບັນດາທ່ານຮອງລັດຖະມົນຕີ, ພະນັກງານຫຼັກແຫຼ່ງອ້ອມຂ້າງກະຊວງເຂົ້າຮ່ວມ 200 ກວ່າທ່ານ.

ໃນການເຜີຍແຜ່ເຊື່ອມຊຶມ, ທ່ານ ກິແກ້ວ ໄຂຄຳພິທູນ ໄດ້ຍົກໃຫ້ເຫັນວ່າ: ກອງປະຊຸມຄັ້ງນີ້ຈັດຂຶ້ນເພື່ອເຮັດໃຫ້ຜູ້ເຂົ້າຮ່ວມໄດ້ຮັບຮູ້-ເຂົ້າໃຈກຳແໜ້ນເຊື່ອມຊຶມຈິດໃຈສຳຄັນຂອງມະຕິດັ່ງກ່າວຈາກນັ້ນນຳໄປເຜີຍແຜ່ໃຫ້ບັນດາສະຫາຍສະມາຊິກພັກໃນຂອບເຂດທີ່ຕົນຮັບຜິດຊອບຕະຫຼອດຮອດພະນັກງານລັດຖະກອນຂອງຕົນໄດ້ເຂົ້າໃຈ ແລະ ນຳໄປຈັດຕັ້ງປະຕິບັດໃຫ້ປະກົດຜົນເປັນຈິງ.

ກອງປະຊຸມຄົບຄະນະ ຄັ້ງທີ 9 ຂອງຄະນະບໍລິຫານງານສູນກາງພັກສະໄໝທີ X ໄດ້ດຳເນີນເປັນທາງການນັບແຕ່ ວັນທີ 14 ເຖິງ ວັນທີ 23 ເດືອນ ຕຸລາ ປີ 2019 ເນື້ອໃນສຳຄັນຂອງກອງປະຊຸມເຜີຍແຜ່ຄັ້ງນີ້ ໄດ້ແບ່ງອອກເປັນ 2 ວາລະຄື: ວາລະທີ 1 ກອງປະຊຸມໄດ້ຄົ້ນຄວ້າພິຈາລະນາໃຫ້ທິດຊີ້ນຳຕໍ່ບັນຫາສຳຄັນຈຳນວນໜຶ່ງຂອງປະເທດຊາດບ້ານເມືອງພວກເຮົາ , ເປັນຕົ້ນແມ່ນບັນຫາສຳຄັນຢູ່ໃນຂົງເຂດ ເສດຖະກິດ-ສັງຄົມ, ຄວາມໝັ້ນຄົງ, ວຽກງານແນວໂຮມ ແລະ ມະຫາຊົນຂອງພັກ, ວຽກງານກະກຽມ ແລະ ດຳເນີນກອງປະຊຸມໃຫຍ່ 3 ຂັ້ນ ແລະ ການກະກຽມດ້ານເນື້ອໃນໃຫ້ແກ່ກອງປະຊຸມໃຫຍ່ຄັ້ງທີ XI ຂອງພັກ, ວາລະທີ 2 ແມ່ນໄດ້ດຳເນີນຊີວິດການເມືອງ, ສຳຫຼວດລວມໝູ່ຂອງສະຫາຍກຳມະການສູນກາງພັກປະຈຳປີ 2019.

ໃນກອງປະຊຸມຍັງໄດ້ຮັບຟັງການເຜີຍແຜ່ເຊື່ອມຊຶມມະຕິ ເລກທີ 058/ກມສພ ວ່າດ້ວຍການຄົ້ນຄວ້າແນວຄິດໄກສອນ ພົມວິຫານ, ມະຕິເລກທີ 072/ ກມສພ ວ່າດ້ວຍລະບອບການຮ່ຳຮຽນທິດສະດີການເມືອງ, ຂໍ້ກຳນົດຂອງຄະນະເລຂາທິການສູນກາງພັກເລກທີ 01/ຄລສພ ວ່າດ້ວຍການຢັ້ງຢືນລະດັບທິດສະດີການເມືອງ ແລະ ຄຳແນະນຳຂອງຄະນະຈັດຕັ້ງສູນກາງພັກ ເລກທີ 204/ຄຈສພ ກ່ຽວກັບການຈັດຕັ້ງປະຕິບັດມະຕິຂອງກົມການເມືອງສູນກາງພັກວ່າດ້ວຍລະບອບການຮ່ຳຮຽນທິດສະດີການເມືອງ, ການສ້າງແຜນກໍ່ສ້າງ-ບຳລຸງພະນັກງານນຳພາ-ຄຸ້ມຄອງ ແລະ ຂໍ້ກຳນົດຂອງຄະນະເລຂາທິການສູນກາງພັກວ່າດ້ວຍການຢັ້ງຢືນລະດັບທິດສະດີການເມືອງ.

Medialaos

ທ່ານລັດຖະມົນຕີ ກະຊວງ ຖວທ ເຂົ້າງານບຸນມະໂຫລານເທດສະການກຸດຈີນ ປະຈຳປີ 2020

ສູນວັດທະນະທໍາຈີນປະຈໍາ ສປປ ລາວ ຮ່ວມກັບພະແນກວັດທະນະທໍາວິທະຍຸ ໂທລະພາບ ແລະ ການທ່ອງ ທ່ຽວນະຄອນເສິງຕູ່ ສປ ຈີນ ໄດ້ຈັດງານບຸນມະໂຫລານເທດ ສະການກຸດຈີນ ປະຈໍາປີ  2020 ຂຶ້ນໃນລະຫວ່າງວັນທີ  11 -12 ມັງກອນນີ້ ທີ່ຫໍວັດທະນະທໍາແຫ່ງຊາດລາວ, ເປັນກຽດເຂົ້າຮ່ວມມີທ່ານ ກິແກ້ວ ໄຂ ຄຳພິທູນ ລັດຖະມົນຕີກະຊວງຖະແຫຼງຂ່າວ, ວັດທະນະທຳແລະ ທ່ອງທ່ຽວ (ຖວທ), ມີທ່ານ ຈ່ຽງຈ້າຍຕົ່ງ ເອກອັກຄະລັດ ຖະທູດຈີນປະຈໍາລາວ,  ທູຕານຸທູດພ້ອມດ້ວຍມວນຊົນຊາວລາວ - ຊາວຈີນເຂົ້າຮ່ວມເປັນຈຳ ນວນຫຼາຍ.

ຊຶ່ງກິດຈະກຳພາຍ ໃນງານໄດ້ເປີດສາກງານບຸນ ດ້ວຍລາຍການສະແດງເຊີດສິງໂຕ, ຟ້ອນບຸບຜາເບີກບານ, ກາຍະສິນແພນດ້າຂີ້ດື້, ລາຍການສະແດງວູຊູທີ່ເປັນເອກະລັກຂອງຊາດ, ຟ້ອນເມຄາດອກບົວ, ກາຍະສິນໝາກຂ່າງບິນ (ຈັງຫວະຫ້າສາຍ), ຮ້ອງດ່ຽວໃນເພງສົມຫວັງທຸກປະການ, ສະແດງໜັງປະລັດຕື້, ລາຍການມາຍາກົນ, ກາຍະສິນສາວນ້ອຍນອນຢັນ ແລະ ລາຍການສະແດງອື່ນໆອີກ ຊຶ່ງທຸກລາຍການສະແດງໄດ້ສ້າງຄວາມສຸກຄວາມເບິກບານມ່ວນຊື່ນໃຫ້ແກ່ຜູ້ເຂົ້າຮ່ວມງານເປັນຢ່າງດີ. ນອກຈາກນັ້ນ ກິດຈະກຳພາຍໃນງານມີການຈົກສະຫຼາກຊິີງໂຊກລາງວັນໃຫຍ່ຈາກບໍລິສັດ ຫົວເຫວີຍ ແລະ ບໍລິສັດອັອບໂປ້ ພ້ອມທັງ ມີການຂາຍອາຫານຈີນ; ວາງສະແດງດ້ານປະເພນີຈີນ, ການຫຼິ້ນເກມແບບພື້ນເມືອງຂອງຈີນ;   ການທວາຍຄໍາທວາຍ ແລະ ກິດຈະກໍາອື່ນໆ ອີກຢ່າງຫຼວງຫຼາຍ.

ງານບຸນມະໂຫລານເທດ ສະການກຸດຈີນ ໄດ້ເລີ່ມຈັດຢູ່ສປປ ລາວ ນັບຕັ້ງແຕ່ປີ 2015 ເປັນຕົ້ນມາ ຊຶ່ງປີນີ້ກໍເປັນຄັ້ງທີ 6  ແລະ ນັບມື້ນັບໄດ້ຮັບຄວາມນິຍົມຊົມຊອບ ແລະ ຕີລາຄາສູງ, ຈົນກາຍເປັນງານບຸນທີ່ສໍາຄັນເພື່ອໃຫ້ມວນຊົນຊາວລາວ - ຊາວຈີນໄດ້ສໍາຜັດກັບວັດທະນະທໍາປະເພນີຈີນອີກງານໜຶ່ງ. ງານບຸນກຸດຈີນໃນຄັ້ງນີ້ຖືໄດ້ວ່າເປັນການຊົມເຊີຍຕໍ່ຜົນສໍາເລັດອັນຈົບງາມຂອງປີ ທ່ອງທ່ຽວລາວ-ຈີນ 2019 ທີ່ ຜ່ານມາ, ພ້ອມນັ້ນ ກໍເປັນການເປີດສັກກະຫຼາດໃໝ່ແຫ່ງການຮ່ວມມືແລກປ່ຽນທາງດ້ານວັດທະນະທໍາ ແລະ ທ່ອງທ່ຽວລາວ-ຈີນ.

Medialaos

ລັດຖະມົນຕີ ກະຊວງ​ ຖວທ ຕ້ອນຮັບ ຄະ​ຣາ​ຊະທູດ​ຄົນ​ໃໝ່​ ປະຈຳ​ ສ​ປ​ປ ລາວ

ທ່ານ ກິແກ້ວ ໄຂຄຳພິທູນ ລັດຖະມົນຕີກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ໄດ້ຕ້ອນຮັບການເຂົ້າຢ້ຽມຂາໍ່ນັບຂອງທ່ານ ເຄອິໂຊະ ຕະເກວະກະ (KEIZO TAKEWAKA)  ເອກອັກຄະຣາຊະທູດຍີ່ປຸ່ນ ຄົນໃໝ່ປະຈຳລາວ ໃນວັນທີ 9 ມັງກອນນີ້ ທີ່ກະຊວງ ຖວທ ເນື່ອງໃນໂອ ກາດທີ່ ທ່ານໄດ້ຖືກແຕ່ງຕັ້ງມາດໍາລົງຕຳແໜ່ງເປັນເອກອັກ  ຄະຣາຊະທູດຄົນໃໝ່ປະຈຳ ສປປ ລາວ.

ໃນໂອກາດດັ່ງກ່າວທ່ານ ລັດຖະມົນຕີ ໄດ້ສະແດງຄວາມຍິນດີຕ້ອນຮັບ, ຊົມເຊີຍ ຕໍ່ທ່ານທູດທີ່ໄດ້ຖືກແຕ່ງຕັ້ງມາດຳລົງຕຳແໜ່ງເປັນເອກອັກ ຄະຣາຊະທູດຍີ່ປຸ່ນປະຈຳ ສປປ ລາວ ຊຶ່ງເປັນການເສີມສ້າງສາຍພົວພັນມິດຕະພາບ ແລະ ຄວາມສາມັກຄີລະຫວ່າງສອງປະເທດ ກໍຄືປະຊາຊົນສອງຊາດທີ່ມີຢູ່ແລ້ວໃຫ້ນັບມື້ມີການຂະຫຍາຍຕົວຍິ່ງໆຂຶ້ນ.

 

ໃນໂອກາດດຽວກັນທັງສອງຝ່າຍກໍໄດ້ໂອ້ລົມ ແລະ ປຶກສາຫາລືກ່ຽວກັບການເພີ່ມທະວີວຽກງານການຮ່ວມມືສອງຝ່າຍໃຫ້ນັບມື້ມີປະສິດທິຜົນຍິ່ງຂຶ້ນ. ພ້ອມດຽວກັນທ່ານທູດກໍໄດ້ສະແດງຄວາມຂອບໃຈຕໍ່ທ່ານລັດຖະມົນຕີທີ່ໄດ້ໃຫ້ການຕ້ອນຮັບຢ່າງອົບອຸ່ນ.

Medialaos

ກອງປະຊຸມເຜີຍແຜ່ວຽກງານຕ້ານ ການຟອກເງິນ ແລະ ການສະໜອງທຶນໃຫ້ແກ່ການກໍ່ການຮ້າຍ

ໃນວັນທີ 13 ມັງກອນ 2019, ທີ່ຫ້ອງປະຊຸມຂອງທະນາຄານແຫ່ງ ສປປ ລາວ ໄດ້ຈັດກອງປະຊຸມເຜີຍແຜ່ວຽກງານຕ້ານ ການຟອກເງິນ ແລະ ການສະໜອງທຶນໃຫ້ແກ່ການກໍ່ການຮ້າຍ ໃຫ້ກະຊວງ ກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ແລະ ສື່ມວນຊົນລາວ, ໂດຍການເປັນປະທານຂອງ ທ່ານ ພຸດທະໄຊ ສີວິໄລ, ຮອງຜູ້ວ່າການ ທະນາຄານແຫ່ງ ສປປ ລາວ ແລະ ທ່ານ ສະຫວັນຄອນ ຣາຊມຸນຕີ, ຮອງລັດຖະມົນຕີ ກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ. ເຊິ່ງມີຜູ້ເຂົ້າຮ່ວມ ຕາງໜ້າຈາກຄະນະສະເພາະກິດ ແລະ ພາກສ່ວນກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ, ນັກຂ່າວ ແລະ ສື່ມ່ວນຊົນ.

ກອງປະຊຸມໃນຄັ້ງນີ້ແມ່ນ ເພື່ອແນ່ໃສ່ສ້າງຄວາມຮັບຮູ້ຄວາມເຂົ້າໃຈ, ການຈັດຕັ້ງປະຕິບັດວຽກງານໃນໄລຍະຜ່ານມາ ແລະ ແຜນການໃນຕໍ່ໜ້າ ແລະ ການກະກຽມໃຫ້ແກ່ການປະເມີນຜົນຮອບດ້ານຂອງ ສປປ ລາວ ໃນປີ 2020-2021. ພ້ອມທັງ ສຸມໃສ່ຈັດຕັ້ງປະຕິບັດວຽກງານດັ່ງກ່າວ ບົນພື້ນຖານເງື່ອນໄຂ 40 ຂໍ້ແນະນໍາຂອງສາກົນ ທີ່ ສປປ ລາວ ເປັນພາຄີ.

 

ນອກຈາກນີ້, ເພື່ອເຜີຍແຜ່ວຽກງານຕ້ານການຟອກເງິນ ແລະ ການສະໜອງທຶນໃຫ້ແກ່ການກໍ່ການຮ້າຍ ໃຫ້ບັນດາພາກສ່ວນກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ແລະ ສື່ມວນຊົນ ທີ່ເປັນກະບອກສຽງຂອງພັກ-ລັດ ແລະ ເປັນເວທີສະແດງຄວາມຄິດເຫັນຂອງສັງຄົມ.

ເພື່ອໃຫ້ຜູ້ເຂົ້າຮ່ວມ ນໍາເອົາຄວາມຮູ້ໄດ້ທີ່ແລກປ່ຽນໃນຄັ້ງນີ້ ໄປໝູນໃຊ້ເຂົ້າໃນການປະຕິບັດວຽກງານຂອງຕົນຢ່າງມີປະສິດທິຜົນສູງສຸດ ໂດຍສະເພາະການສ້າງຄວາມຮັບຮູ້-ຄວາມເຂົ້າໃຈວຽກງານຕ້ານການຟອກເງິນ ແລະ ການສະໜອງທຶນໃຫ້ແກ່ການກໍ່ການຮ້າຍ ໃຫ້ແກ່ພະນັກງານລັດຖະກອນ, ພະນັກງານເອກະຊົນ ແລະ ພໍ່ແມ່ປະຊາຊົນທົ່ວໄປ ເພື່ອເຮັດແນວໃດໃຫ້ສັງຄົມຮັບຊາບກ່ຽວກັບຄວາມສໍາຄັນວຽກງານດັ່ງກ່າວ.

 

Medialaos

ລັດຖະມົນຕີກະຊວງ ຖວທ ຕ້ອນຮັບເອກອັກຄະລັດຖະທູດ ຣັດເຊຍ ເຂົ້າຢ້ຽມຂ່ຳນັບ

ໃນວັນທີ 21 ພະຈິກ 2019 ທີ່ນະຄອນຫລວງວຽງຈັນ, ທ່ານ ກິແກ້ວ ໄຂຄໍາພິທູນ ລັດຖະມົນຕີ ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ໄດ້ໃຫ້ກຽດຕ້ອນຮັບການເຂົ້າຢ້ຽມຂ່ຳນັບຂອງ ທ່ານ Vladimir Kalinin ພາຍຫລັງມາດຳລົງຕຳແໜ່ງເປັນເອກອັກຄະລັດຖະທູດ ວິສາມັນ ຜູ້ມີອຳນາດເຕັມ ແຫ່ງ ສະຫະພັນ ຣັດເຊຍ ຄົນໃໝ່ ປະຈຳ ສປປ ລາວ.

ອ່ານເພີ່ມເຕີມ...

ລັດຖະມົນຕີ ກະຊວງ ຖວທ ຕ້ອນຮັບເອກອັກຄະລັດຖະທູດ ສະຫະພາບເອີຣົບ ແລະ ຝຣັ່ງ ປະຈຳ ສປປ ລາວ

ໃນວັນທີ 19 ພະຈິກ 2019 ເວລາ 09:30 ໂມງ ທີ່ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ທ່ານ ສຈ.ປອ ກິແກ້ວ ໄຂຄຳພິທູນ ລັດຖະມົນຕີກະຊວງ ຖວທ ໄດ້ຕ້ອງຮັບການຢ້ຽມຂ່ຳນັບຂອງທ່ານ Leo Faber ເອກອັກຄະລັດຖະທູດ ແຫ່ງ ສະຫະພາບເອີຣົບ ປະຈຳ ສປປ ລາວ ເພື່ອປຶກສາວຽກງານໃນຂົງເຂດການຮ່ວມມືສອງຝ່າຍໃນຂະແໜງການດ້ານວັດທະນະທຳ, ຖະແຫຼງຂ່າວ ແລະ ທ່ອງທ່ຽວເປັນຕົ້ນ.

ອ່ານເພີ່ມເຕີມ...

ມອບ-ຮັບ​ໜ້າ​ທີ່​ ເລ​ຂາ​ຄະ​ນະ​ພັກ ລັດ​ຖະ​ມົນ​ຕີ ​ກະ​ຊວງ​ ຖວ​ທ

ໃນວັນທີ 30 ຕຸລາ 2019 ທີ່ຫໍວັດທະນະທຳແຫ່ງຊາດ ນະຄອນຫລວງວຽງຈັນ, ໄດ້ມີພິທີມອບ-ຮັບໜ້າທີ່ເລຂາຄະນະພັກ, ລັດຖະມົນຕີ ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ລະຫວ່າງ ທ່ານ ບໍ່ແສງຄຳ ວົງດາລາ ກຳມະການສູນກາງພັກ, ເລຂາຄະນະພັກ, ລັດຖະມົນຕີກະຊວງ ຖວທ ຜູ້ເກົ່າ ແລະ ທ່ານ ກິແກ້ວ ໄຂຄຳພິທູນ ຄະນະເລຂາທິການສູນກາງພັກ, ເລຂາຄະນະພັກ, ວ່າການລັດຖະມົນຕີ ກະຊວງ ຖວທ ຄົນໃໝ່ ໂດຍການໃຫ້ກຽດເຂົ້າຮ່ວມຂອງ ທ່ານ ພັນຄຳ ວິພາວັນ ກຳມະການກົມການເມືອງສູນກາງພັກ, ຜູ້ປະຈຳການຄະນະເລຂາທິການສູນກາງພັກ, ຮອງປະທານປະເທດ ແຫ່ງ ສປປ ລາວ, ມີການນຳຂັ້ນສູງ ພັກ-ລັດ, ຮອງລັດຖະມົນຕີ, ຫົວໜ້າກົມ, ຮອງຫົວໜ້າກົມ, ຫົວໜ້າພະແນກ, ຮອງພະແນກ, ພະນັກງານຫລັກແຫລ່ງ ອ້ອມຂ້າງກະຊວງ ຖວທ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.

ອ່ານເພີ່ມເຕີມ...