ການກະກຽມຄວາມພ້ອມໃນການຈັດຕັ້ງກອງປະຊຸມສະພາປະຊາຄົມວັດທະນະທຳ-ສັງຄົມອາຊຽນ ຄັ້ງທີ 15 ທີ່ແຂວງຫຼວງພະບາງ, ລະຫວ່າງ 1-6 ມິຖຸນາ 2016

ໃນຕອນເຊົ້າຂອງວັນທີ 13/05/2016 ຢູ່ທີ່ຫ້ອງປະຊຸມຊັ້ນ 1 ຂອງກະຊວງ ຖວທ ໄດ້ຈັດກອງປະຊຸມການກະກຽມຄວາມພ້ອມໃນການຈັດຕັ້ງກອງປະຊຸມ ສະພາປະຊາຄົມວັດທະນະທຳ-ສັງຄົມອາຊຽນ ຄັ້ງທີ 15 ທີ່ ແຂວງຫຼວງພະບາງ ລະຫວ່າງວັນທີ 1-6 ມິຖຸນາ 2016 ໂດຍການເປັນປະທານຂອງທ່ານ ສຈ.ດຣ ບໍ່ແສງຄຳ ວົງດາລາ, ກຳມະການສູນກາງພັກ, ລັດຖະມົນຕີກະຊວງຖະແຫຼ່ງຂ່າວ, ວັດທະນະທຳ ແລະ ທ່ອງທ່ຽວ ທັງເປັນຫົວໜ້າຄະນະກຳມະການຊີ້ນຳລວມຕາງໜ້າໃຫ້ອະນຸກຳມະການເນື້ອໃນ ແລະ ກອງເລຂາ ລາຍງານຕໍ່ກອງປະຊຸມຄື:

ໃນກອງປະຊຸມ ສຈ.ດຣ ບໍ່ແສງຄຳ ວົງດາລາ, ກຳມະການສູນກາງພັກ, ລັດຖະມົນຕີກະຊວງຖະແຫຼ່ງຂ່າວ, ວັດທະນະທຳ ແລະ ທ່ອງທ່ຽວ ທັງເປັນຫົວໜ້າຄະນະກຳມະການຊີ້ນຳລວມ ໄດ້ເຜີຍແຜ່ແຜ່ນ ແລະ ປຶກສາບັນຫາແຜນບູລິມະສິດ ທັງໝົດທີ່ຈະນຳສະເໜີເຂົ້າໃນກອງປະຊຸມສຸດຍອດ ໃນປີ 2016 ມີທັງໝົດ 8 ແຜນບູລິມະສິດ ຊຶ່ງໃນນັ້ນມີ 2 ແຜນບູລິມະສິດ ຢູ່ໃນເສົາຄ້ຳປະຊາຄົມວັດທະນະທຳ-ສັງຄົມຄື:
1.ຖະແຫຼງການວຽງຈັນ ວ່າດ້ວຍການຫັນປ່ຽນຈາກການຈ້າງງານນອກລະບົບໄປສູ່ການຈ້າງງານໃນລະບົບ ເພື່ອກ້າວໄປສູ່ການສົ່ງເສີມວຽກທີ່ມີຄຸນຄ່າ ແລະ ເປັນທຳໃນອາຊຽນ, (Vientiane Declaration on Transition from Informal Employment to Formal Employment towards Decent Work Promotion in ASEAN).
2.ຖະແຫຼງການວຽງຈັນ ວ່າດ້ວຍການຊຸກຍູ້ ແລະ ສົ່ງເສີມການຮ່ວມມືທາງດ້ານມໍລະດົກວັດທະນະທຳໃນອາຊຽນ.(Vientiane Declaration on Reinforcing Cultural Heritage Cooperation in ASEAn).
ກ່ຽວກັບ ຖະແຫຼງການວຽງຈັນ ວ່າດ້ວຍການຫັນປ່ຽນຈາກການຈ້າງງານນອກລະບົບໄປສູ່ການຈ້າງງານໃນລະບົບ ເພື່ອກ້າວການສົ່ງເສີມວຽກທີ່ມີຄຸນຄ່າ ແລະ ເປັນທຳໃນອາຊຽນ ພວກເຮົາກໍ່ໄດ້ມອບໃຫ້ ກະຊວງແຮງງານສະຫວັດດີການສັງຄົມ ຮ່າງທາງດ້ານເນື້ອໃນ ແລະ ກໍ່ໄດ້ຜ່ານການຄົ້ນຄ້ວາພິຈາລະນາໃນກອງປະຊຸມຂອງເຈົ້າໜ້າທີ່ອາວຸໂສແຮງງານອາຊຽນ ຢູ່ທີ່ນະຄອນຫຼວງວຽງຈັນ ໃນອາທິດແລ້ວນີ້ ແລະ ກໍ່ຍັງພວມສືບຕໍ່ສະເໜີຂໍການຮັບຮອງໃນກອງປະຊຸມລັດຖະມົນຕີແຮງງານອາຊຽນ ຄັ້ງທີ 24 ທີ່ ນະຄອນຫຼວງວຽງຈັນ ໃນວັນອາທິດຈະມານີ້.
ສ່ວນແຜນບູລິມະສິດກ່ຽວກັບຖະແຫຼງການວຽງຈັນ ວ່າດ້ວຍການຊຸກຍູ້ ແລະ ສົ່ງເສີມການຮ່ວມມືທາງດ້ານມໍລະດົກວັດທະນະທຳໃນອາຊຽນນັ້ນ ກະຊວງ ຖວທ ໄດ້ເປັນເຈົ້າການຮ່າງເນື້ອໃນສຳເລັດໂດຍພື້ນຖານແລ້ວ, ຮ່າງບົດດັ່ງກ່າວນີ້ໄດ້ສົ່ງໃຫ້ບັນດາເຈົ້າໜ້າທີ່ອາວຸໂສທາງດ້ານວັດທະນະທຳອາຊຽນ (SOMCA) ໄປແລ້ວ ຊຶ່ງໃນປະຈຸບັນນີ້ແມ່ນ ສສ.ຫວຽດນາມ ເປັນປະທານ SOMCA ແລະ AMCA ເພື່ອຂໍຄວາມເປັນເອກະພາບນຳຂະແໜງການວັດທະນະທຳອາຊຽນ ຕາມກົນໄກ. ປະຈຸບັນພວມລໍຖ້າຄຳເຫັນຂອງບັນດາປະເທດສະມາຊິກ ຊຶ່ງທ່ານປະທານ SOMCA ແລະ AMCA ກໍ່ໄດ້ໃຫ້ການຮ່ວມມືຢ່າງເຕັມທີ່ ພວກເຮົາກໍ່ໄດ້ກໍານົດການສົ່ງຄໍາຕອບນັ້ນບໍ່ໃຫ້ກາຍວັນທີ 20 ພຶດສະພາ 2016 ນີ້.
ສ່ວນຈົດໝາຍເຊື້ອເຊີນບັນດາເຈົ້າໜ້າທີ່ອາວຸໂສ, ບັນດາທ່ານລັດຖະມົນຕີປະຊາຄົມວັດທະນະທຳ-ສັງຄົມຂອງປະເທດສະມາຊິກ ລວມທັງກອງເລຂາອາຊຽນ ພ້ອມດ້ວຍເອກະສານແນະນຳທີ່ຈຳເປັນຕ່າງໆນັ້ນ ພວກເຮົາກໍ່ໄດ້ຈັດສົ່ງທຸກໆພາກສ່ວນແລ້ວ ແລະ ພວກເພິ່ນກໍ່ໄດ້ຮັບໝົດແລ້ວ. ມີບາງປະເທດສະມາຊິກຈຳນວນໜຶ່ງ ກໍ່ໄດ້ຕອບມາແລ້ວ. ພ້ອມດຽວກັນນີ້ ພວກເຮົາກໍ່ໄດ້ກະກຽມຈັດສົ່ງບັດເຊີນໃຫ້ແກ່ບັນດາທຸຕານທູດຂອງແຕ່ລະປະເທດສະມາຊິກໃຫ້ໄປເຂົ້າຮ່ວມກອງປະຊຸມດັ່ງກ່າວອີກຕື່ມ.
ສ່ວນການກະກຽມຄວາມເພີ່ມດ້ານບຸກຄະລາກອນທ່ານໄດ້ຊີ້ແຈງວ່າ ພວກເຮົາກໍ່ໄດ້ມີຂໍ້ຕົກລົງຂອງ ທ່ານລັດຖະມົນຕີ ແຕ່ງຕັ້ງຄະນະຊີ້ນຳລວມ ແລະ ບັນດາອະນຸກຳມະການຕ່າງໆເພື່ອຮັບຜິດຊອບ ແລະ ກະກຽມດຳເນີ້ນກອງປະຊຸມ ຊຶ່ງກໍ່ໄດ້ຈັດສົ່ງໃຫ້ທຸກພາກສ່ວນກ່ຽວຂ້ອງຮັບຊາບ. ສ່ວນວ່າສະຖານທີ່ກອງປະຊຸມຈະໄດ້ຈັດຂຶ້ນຢູ່ທີ່ໂຮງແຮມ ຫຼວງພະບາງວິວ, ລະຫວ່າງວັນທີ 1-5 ມິຖຸນາ 2016.