ມອບ-ຮັບໜ້າທີ່ ຫົວໜ້າຫ້ອງ​ວ່າການ​ລັດຖະບານ

ຂປລ. ໃນວັນທີ 18 ເດືອນກໍລະກົດ ປີ 2014 ໄດ້ມີພິທີມອບ-ຮັບໜ້າທີ່ ຫົວໜ້າຫ້ອງວ່າການລັດຖະບານ ລະຫວ່າງ ທ່ານ ດຣ. ສິນລະວົງ ຄຸດໄພທູນ ລັດຖະມົນຕີ, ຫົວໜ້າຫ້ອງວ່າການລັດຖະບານຜູ້ເກົ່າ ຊຶ່ງໄປຮັບໜ້າທີ່ເປັນເຈົ້າຄອງນະຄອນຫລວງວຽງຈັນຜູ້ໃໝ່ ແລະ ທ່ານ ດຣ. ສອນໄຊ ສີພັນດອນ ເຈົ້າແຂວງໆຈຳປາສັກຜູ້ເກົ່າ ເປັນລັດຖະມົນຕີ, ຫົວໜ້າຫ້ອງວ່າການລັດຖະບານຜູ້ໃໝ່

ໂດຍໃຫ້ກຽດເຂົ້າຮ່ວມຂອງທ່ານ ທອງສິງ ທຳມະວົງ ນາ ຍົກລັດຖະມົນຕີ, ມີບັນດາລັດຖະມົນຕີປະຈຳຫ້ອງວ່າການລັດຖະບານ, ລັດຖະມົນຕີຊ່ວຍວ່າການ, ຜູ້ຕາງໜ້າຄະນະຈັດຕັ້ງສູນກາງພັກ ແລະ ພະນັກ ງານກ່ຽວຂ້ອງເຂົ້າຮ່ວມ.

ການມອບ-ຮັບໜ້າທີ່ຄັ້ງນີ້ ແມ່ນປະຕິບັດຕາມມະຕິຕົກລົງ ຂອງກອງປະຊຸມສະໄໝສາມັນເທື່ອທີ 7 ຂອງສະພາແຫ່ງຊາດ ຊຸດທີ VII ສະບັບລົງວັນທີ 11 ເດືອນກໍລະກົດ ປີ 2014 ວ່າດ້ວຍການຮັບຮອງເອົາການແຕ່ງຕັ້ງ ແລະ ຍົກຍ້າຍສະມາຊິກລັດຖະບານ ແລະ ດຳລັດຂອງປະທານປະເທດ ສະບັບເລກທີ 144/ປປທ, ລົງວັນທີ 16 ເດືອນກໍລະກົດ 2014 ວ່າດ້ວຍການຍົກຍ້າຍທ່ານ ດຣ. ສອນໄຊ ສີພັນດອນ ມາຮັບໜ້າທີ່ໃໝ່ຢູ່ສູນກາງ.

ໂອກາດນີ້ ທ່ານນາຍົກລັດຖະມົນຕີ ໄດ້ສະແດງຄວາມຊົມເຊີຍ ຕໍ່ການມອບ-ຮັບໜ້າທີ່ໃນຄັ້ງນີ້ ເຊິ່ງເປັນການປະກອບສ່ວນສຳຄັນ ຕາມຄວາມຮຽກຮ້ອງ ຕ້ອງການຂອງໜ້າທີ່ວຽກງານໃນໄລຍະໃໝ່ ພ້ອມທັງໄດ້ຢ້ຳໃຫ້ທ່ານ ດຣ. ສິນລະວົງ ຄຸດໄພທູນ ທີ່ໄດ້ຮັບການແຕ່ງຕັ້ງເປັນເຈົ້າຄອງນະຄອນຫລວງ ວຽງຈັນຜູ້ໃໝ່ ໃຫ້ທຸ້ມເທສະຕິປັນຍາ ຊີ້ນຳ-ນຳພາ ວຽກງານຮອບດ້ານ ເຮັດໃຫ້ນະຄອນຫລວງວຽງຈັນ ກ້າວໜ້າຢ່າງບໍ່ຢຸດຢັ້ງ ໂດຍສະເພາະການ ປະຕິບັດວຽກງານ 6 ສ ໃຫ້ເປັນຮູບປະທຳ ສ້າງນະຄອນຫລວງໃຫ້ສວຍສົດງົດງາມ, ລັດຖະບານ ພ້ອມທີ່ຈະໃຫ້ການສະໜັບສະໜູນ ແລະ ອຳນວຍ ສະດວກທຸກປະການ. ພ້ອມດຽວກັນນັ້ນ ກໍໄດ້ຢ້ຳໃຫ້ທ່ານລັດຖະມົນຕີ, ຫົວໜ້າຫ້ອງວ່າການລັດຖະບານຜູ້ໃໝ່ ສືບຕໍ່ເປັນເສນາທິການທີ່ດີໃຫ້ ແກ່ລັດຖະບານ, ນຳເອົາບົດຮຽນຈາກຜູ້ເກົ່າໄປຜັນຂະຫຍາຍໃຫ້ມີຜົນສຳເລັດ ເຮັດໃຫ້ຫ້ອງວ່າການລັດຖະບານ ມີການກ້າວໄປໃນທຸກດ້ານ./.