ສານປະຊາຊົນສູງສຸດ ສະເໜີພິຈາລະນາ ງົບປະມານ

ຂປລ. ໃນວາລະດຳເນີນກອງປະຊຸມສະໄໝສາມັນເທື່ອທີ 7 ຂອງສະພາແຫ່ງຊາດ ຊຸດທີ VII ໃນວັນທີ 16 ເດືອນກໍລະກົດ ປີ 2014 ໂດຍພາຍໃຕ້ ການເປັນປະທານຂອງ ທ່ານນາງ ປານີ ຢາທໍ່ຕູ້ ປະທານສະພາແຫ່ງຊາດນັ້ນ, ກອງປະຊຸມໄດ້ຮັບຟັງ ການລາຍງາຍກ່ຽວກັບການເຄື່ອນໄຫວວຽກງານ

ສົກປີ 2013-2014 ແລະ ທິດທາງແຜນການສົກ ປີ 2014-2015 ຂອງສານປະຊາຊົນສູງສຸດ, ເຊິ່ງ ທ່ານ ຄຳພັນ ສິດທິດຳພາ ປະທານ ສານປະຊາຊົນສູງສຸດ ໄດ້ສະເໜີສະພາແຫ່ງຊາດ ພິຈາລະນາງົບປະມານ ເພື່ອນຳໃຊ້ເຂົ້າໃນການຍົກລະດັບຄຸນນະພາບ ຂອງຜູ້ພິພາກສາ.

ຂໍ້ເໜີດັ່ງກ່າວ ທ່ານປະທານສານປະຊາຊົນສູງສຸດ ໄດ້ໃຫ້ເຫດຜົນວ່າ: ເພື່ອເຮັດໃຫ້ການປະຕິບັດໜ້າທີ່ວຽກງານຂອງສານມີການພັດທະນາ ໂດຍສະ ເພາະຍົກສູງຄຸນນະພາບຂອງຜູ້ພິພາກສາ ໃນການພິຈາລະນາຕັດສິນຄະດີ ໃຫ້ມີຄວາມວ່ອງໄວ ແລະ ມີຄຸນນະພາບເທື່ອລະກ້າວນັ້ນ ມີຄວາມຈຳເປັນ ຈຶ່ງໄດ້ສະເໜີຕໍ່ກອງປະຊຸມສະພາແຫ່ງຊາດ ພິຈາລະນາງົບປະມານຈຳນວນໜຶ່ງ ເພື່ອຈະນຳໃຊ້ເຂົ້າໃນການຝຶກອົບຮົມຜູ້ພິພາກສາ, ຜູ້ຊ່ວຍຜູ້ພິພາກສາ, ຈ່າສານເພື່ອຍົກລະດັບຄຸນນະພາບທາງດ້ານວິຊາສະເພາະ, ວິຊາການ ແລະ ທິດສະດີການເມືອງຂອງພະນັກງານສານ, ທັງຮັບປະກັນການພິຈາ ລະນາຕັດສິນຂອງສານ ໃຫ້ມີຄວາມຖືກຕ້ອງຊັດເຈນ ແລະ ມີຄຸນນະພາບດີຂຶ້ນຢ່າງບໍ່ຢຸດຢັ້ງ. ພ້ອມນີ້ ຍັງສະເໜີໃຫ້ສະພາແຫ່ງຊາດ ພິຈາລະນາກ່ຽວ ກັບສະຖານທີ່ເຮັດວຽກ, ພາຫະນະ, ອຸປະກອນທີ່ຈຳເປັນເພື່ອນຳໃຊ້ເຂົ້າໃນການປະກອບ ແລະ ເກັບກຳຂໍ້ມູນຫລັກຖານຂອງຜູ້ພິພາກສາ, ຮັບ ປະກັນໃຫ້ມີຂໍ້ມູນຫລັກຖານໃນຄະດີຢ່າງຄົບຖ້ວນ, ຮອບດ້ານ ແລະ ພຽງພໍ ເພື່ອເຮັດໃຫ້ການພິຈາລະນາຕັດສິນຄະດີ ມີຄວາມຖືກຕ້ອງຕາມກົດໝາຍ ແລະ ສອດຄ່ອງກັບຄວາມເປັນຈິງ.

ທ່ານປະທານສານປະຊາຊົນສູງສຸດ ຍັງໃຫ້ຮູ້ວ່າ: ໃນ 1 ປີຜ່ານມາ ສານປະຊາຊົນໄດ້ເອົາໃຈໃສ່ປັບປຸງ ແລະ ພັດທະນາກົນໄກແບບແຜນໃນການຄົ້ນ ຄວ້າດຳເນີນຄະດີ ໃຫ້ມີຄວາມວ່ອງໄວ ແລະ ຮັບປະກັນຄຸນນະພາບຕາມຂັ້ນຕອນທີ່ໄດ້ກຳນົດໄວ້ໃນກົດໝາຍວ່າດ້ວຍການດຳເນີນຄະດີແພ່ງ ແລະ ການດຳເນີນຄະດີອາຍາ ເຊິ່ງໃນ 1 ປີ ມີຄະດີ ເຂົ້າມາສານປະຊາຊົນທຸກຂັ້ນ ຈຳນວນ 7.769 ເລື່ອງ, ຄ້າງມາແຕ່ປີກ່ອນ 1.613 ເລື່ອງ ລວມທັງໝົດ 9.382 ເລື່ອງ ທຽບໃສ່ໄລຍະດຽວກັນຂອງປີຜ່ານມາເພີ່ມຂຶ້ນ 847 ເລື່ອງ, ຜ່ານການຕິດຕາມກວດກາ ປະເມີນຜົນການພິຈາລະນາ ຕັດສິນຄະດີ ຂອງສານແຕ່ລະຂັ້ນເຫັນວ່າມີປະສິດທິພາບດີຂຶ້ນ ເຮັດໃຫ້ໂຈດ ແລະ ຈຳເລີຍມີຄວາມພໍໃຈຕໍ່ການຕັດສິນຂອງສານເຊິ່ງສະແດງອອກຄື: ສານປະຊາຊົນ ເຂດຕັດສິນຄະດີຂັ້ນຕົ້ນ ຈຳນວນ 3.035 ເລື່ອງ ພາຍຫລັງຕັດສິນໄປ ແລ້ວຄູ່ຄວາມເຫັນດີນຳໄປຈັດຕັ້ງປະຕິບັດ 2.378 ເລື່ອງ, ຄູ່ຄວາມຂໍອຸທອນ 657 ເລື່ອງ; ສານປະຊາຊົນແຂວງ, ນະຄອນຫລວງ ແລະ ສານທະຫານພາກ ໄດ້ຕັດສິນຄະດີຂັ້ນຕົ້ນ ຈຳນວນ 2.983 ເລື່ອງ, ພາຍຫລັງທີ່ໄດ້ ຕັດສິນແລ້ວຄູ່ຄວາມເຫັນດີນຳໄປຈັດຕັ້ງປະຕິບັດ 2.409 ເລື່ອງ, ຄູ່ຄວາມຂໍອຸທອນມາຍັງສານປະຊາຊົນພາກ ແລະ ສານທະຫານຂັ້ນສູງ 574 ເລື່ອງ; ສານປະຊາຊົນພາກ ແລະ ສານທະຫານຂັ້ນສູງ ໄດ້ພິພາກສາເປັນຂັ້ນອຸທອນ ຈຳນວນ 582 ເລື່ອງ ເຊິ່ງຜົນຂອງການພິພາກສາແມ່ນເຫັນດີ ແລະ ຢັ້ງຢືນເອົາຕາມຕັດສິນ ຂອງສານຂັ້ນຕົ້ນ 256 ເລື່ອງ ແລະ ອື່ນໆ./.