ຄະນະປະຈຳສະພາແຫ່ງຊາດ ຫາລືຫລາຍບັນຫາສຳຄັນ

 

ຂປລ. ກອງປະຊຸມຄະນະປະຈຳສະພາແຫ່ງຊາດ ປະຈຳເດືອນມິຖຸນາ 2014 ໄດ້ຈັດຂຶ້ນແຕ່ວັນທີ 23-24 ມິຖຸນາ 2014 ທີ່ຫ້ອງປະຊຸມຄະນະ ປະຈຳສະພາແຫ່ງຊາດ ພາຍໃຕ້ການເປັນປະທານຂອງ ທ່ານ ດຣ. ໄຊສົມພອນ ພົມວິຫານ ຮອງປະທານສະພາແຫ່ງຊາດ ເພື່ອປຶກສາຫາລືບັນຫາສຳ ຄັນຕ່າງໆຂອງຊາດ.

ໃນວາລະດຳເນີນກອງປະຊຸມ ໄດ້ຜ່ານຮ່າງບົດລາຍງານການເຄື່ອນໄຫວຂອງສະພາແຫ່ງຊາດ ຊຸດທີ VII ປະຈຳສົກປີ 2013-2014 ແລະ ທິດ ທາງແຜນການ ສົກປີ 2014-2015; ຜ່ານຮ່າງບົດປະກອບຄຳເຫັນຂອງຄະນະປະຈຳສະພາແຫ່ງຊາດ ຕໍ່ກັບວຽກງານຕຸລາການ; ຮ່າງບົດປະກອບ ຄຳເຫັນຂອງຄະນະປະຈຳສະພາແຫ່ງຊາດ ຕໍ່ອົງການກວດສອບແຫ່ງລັດ ສົກປີ 2014-2015; ຮ່າງເນື້ອໃນຂົງເຂດເສດຖະກິດ ເພື່ອປະກອບໃສ່ບົດ ຄຳເຫັນຂອງຄະນະປະຈຳສະພາ ແຫ່ງຊາດ ຕໍ່ແຜນພັດທະນາເສດຖະກິດ-ສັງຄົມ ສົກປີ 2013-2014 ແລະ ທິດທາງສົກປີ 2014-2015; ຮ່າງບົດປະກອບ ຄຳເຫັນຂອງຄະນະປະຈຳສະພາແຫ່ງຊາດຕໍ່ແຜນງົບປະມານແຫ່ງລັດ ສົກປີ 2014-2015; ຮັບຟັງລາຍງານຄວາມຄືບໜ້າການ ກະກຽມຄວາມພ້ອມຈັດກອງປະຊຸມ ໄອປາ 35 (AIPA); ຟັງລາຍງານການຄົ້ນຄວ້າການຕີຄວາມໝາຍ ມາດຕາ 28, 29 ຂອງກົດໝາຍວ່າດ້ວຍ ແຮງງານ.

 

ພ້ອມນີ້, ກອງປະຊຸມ ຍັງໄດ້ຕີລາຄາການສະເໜີຂອງລັດຖະບານກ່ຽວກັບການຈັດສັນ 3 ປະເພດປ່າຄື: ປ່າສະຫງວນ, ປ່າປ້ອງກັນ ແລະ ປ່າຜະລິດ; ພິຈາລະນາແຕ່ງຕັ້ງພະນັກງານຂັ້ນ ຮອງປະທານອົງການກວດສອບແຫ່ງລັດ; ພິຈາລະນາສະເໜີສ້າງຕັ້ງກົມຮ່ວມມືສາກົນຂອງອົງການກວດສອບແຫ່ງ ລັດ; ພິຈາລະນາແຕ່ງຕັ້ງຮອງປະທານ ແລະ ຜູ້ພິພາກສາຂອງສານປະຊາຊົນທ້ອງຖິ່ນ ແຂວງບໍ່ແກ້ວ ແລະ ຮອງປະທານສານປະຊາຊົນເຂດ 3 ແລະ ເຂດ 4 ນະຄອນຫລວງວຽງຈັນ; ພິຈາລະນາແຕ່ງຕັ້ງຮອງຫົວໜ້າຄະນະຮັບຜິດຊອບວຽກງານເຂດເລືອກຕັ້ງ; ພິຈາລະນາແຕ່ງຕັ້ງບຸກຄະລາກອນ ພາຍໃນ ຫ້ອງວ່າການສະພາແຫ່ງຊາດ; ພິຈາລະນາການສະເໜີຫັນປ່ຽນປ່າສະຫງວນແຫ່ງຊາດ ດົງຫົວສາວ ໃຫ້ບໍລິສັດ ໂກເບກຣິນ ພາວເວີ້ຈຳກັດ ເພື່ອນຳໃຊ້ເຂົ້າໃນການພັດທະນາໂຄງການກໍ່ສ້າງເຂື່ອນໄຟຟ້ານ້ຳພາກ ແຂວງຈຳປາສັກ ແລະ ພິຈາລະນາວຽກງານສັນຊາດ ຈຳນວນໜຶ່ງ./.