ຮອງນາຍົກ ເນັ້ນໃຫ້ແຂວງຄຳມ່ວນ ເອົາໃຈໃສ່ຮັກສາສິ່ງແວດລ້ອມ

ຂປລ. ໃນທ້າຍອາທິດຜ່ານມມາ, ທ່ານ ອາຊາງ ລາວລີ ຮອງນາຍົກລັດຖະມົນຕີພ້ອມດ້ວຍຄະນະໄດ້ລົງເຄື່ອງໄຫວ, ຢ້ຽມຢາມ ແລະ ຊຸກຍູ້ວຽກ ງານບາງດ້ານ ຂອງແຂວງຄຳມ່ວນ ໂດຍສະເພາະແມ່ນວຽກງານດ້ານການອະນຸລັກປ່າສະຫງວນນາກາຍ-ນໍ້າເທີນ ແລະ ການອະນຸລັກສິ່ງແວດລ້ອມ ໂດຍ ການຕ້ອນຮັບຂອງການນຳຂັ້ນແຂວງ, ເມືອງ ແລະ ບັນດາພະແນກການຕ່າງໆອ້ອມຂ້າງແຂວງ.

ໂອກາດນີ້, ທ່ານ ຄຳໃບ ດຳລັດ ເຈົ້າແຂວງໆຄຳມ່ວນ ໄດ້ລາຍງານສະພາບການພັດທະນາເສດຖະກິດ-ສັງຄົມ ຂອງແຂວງໂດຍລວມ ເປັນຕົ້ນ: ເສດ ຖະກິດຍັງສືບຕໍ່ຂະຫຍາຍຕົວຢ່າງຕໍ່ເນື່ອງໃນລະດັບ 12,74% ຕໍ່ປີ, ລວມຍອດຜະລິດຕະພັນບັນລຸ 4.074,25 ຕື້ກີບ, ສະເລ່ຍຕໍ່ຫົວຄົນ 1.490 ໂດລາ ສະຫະລັດ. ທຽບໃສ່ປີ 2010 ເພີ່ມຂຶ້ນ 885 ໂດລາສະຫະລັດ. ສົກປີ 2013-2014 ແຂວງຄໍາມ່ວນໄດ້ຮັບຕົວເລກງົບປະມານ ເພື່ອພັດທະນາພື້ນ ຖານໂຄງລ່າງທັງໝົດ 346 ໂຄງການ, ມີມູນຄ່າ 1000,07 ຕື້ກີບ, ມີທຶນພາຍໃນ 81,10 ຕື້ກີບ ແລະ ທຶນຕ່າງປະເທດ 18,97 ຕື້ກີບ, ຈັດຕັ້ງປະ ຕິບັດສຳເລັດແລ້ວ 157 ໂຄງການ.

ຈາກນັ້ນທ່ານຮອງນາຍົກ ກໍໄດ້ສະແດງຄວາມຊົມເຊີຍຕໍ່ຜົນງານທີ່ຍາດມາໄດ້ ພ້ອມທັງໃຫ້ກຽດໂອ້ລົມ ເພື່ອເປັນການຊີ້ທິດເຍືອງທາງໃຫ້ການຄຸ້ມຄອງ ປົກປັກຮັກສາ ແລະ ການພັດທະນາຊີວິດການເປັນຢູ່ຂອງປະຊາຊົນຢູ່ໃນເຂດປ່າສະຫງວນນາກາຍ-ນໍ້າເທີນ ໃຫ້ໄດ້ຮັບການຈັດຕັ້ງປະຕິບັດຢ່າງມີປະ ສິດທິຜົນ. ເຊິ່ງທ່ານໄດ້ຮຽກຮ້ອງໃຫ້ອົງການຄຸ້ມຄອງ ແລະ ປົກປັກຮັກສາແຫລ່ງນໍ້າ-ນໍ້າເທີນ 2 ເອົາໃຈໃສ່ສືບຕໍ່ໂຄສະນາການເມືອງແນວຄິດໃຫ້ປະ ຊາຊົນເຂົ້າໃຈກ່ຽວກັບການອະນຸລັກສິ່ງແວດລ້ອມ ແລະ ຜົນປະໂຫຍດທີ່ຈະໄດ້ຮັບຈາກການອະນຸລັກໃນປັດຈຸບັນ ແລະ ອະນາຄົດ ພ້ອມນັ້ນຕ້ອງ ຕິດຕາມ, ກວດກາດ້ານລາຍຈ່າຍຮ່ວງງົບປະມານການບໍລິຫານຕ່າງໆ ໃຫ້ຖືກຕ້ອງຕາມລະບຽບການຂອງວຽກງານຄຸ້ມຄອງການເງິນ, ສະຫລຸບຕີລາ ຄາຄືນການສ້າງຕັ້ງສະພາບໍລິຫານການຄຸ້ມຄອງ ແລະ ປົກປັກຮັກສາແຫລ່ງນໍ້າ-ນໍ້າເທີນ 2 ເພື່ອສະແດງໃຫ້ເຫັນເຖິງວຽກງານທີ່ປະຕິບັດໄດ້.

ໂອກາດນີ້, ທ່ານ ອາຊາງ ລາວລີ ພ້ອມດ້ວຍຄະນະ ໄດ້ເດີນທາງໄປຢ້ຽມຢາມ ບໍລິສັດ ຊີໂນ-ອາກຣີ ຈຳກັດ ແລະ ບໍລິສັດ ລາວຄາຍຢວນ ເຊິ່ງ ເປັນບໍລິສັດຂຸດຄົ້ນເກືອໂປຣຕັສຊຽມ ເພື່ອຕິດຕາມ, ກວດກາການຄຸ້ມຄອງລະບົບລະບາຍນໍ້າເສຍຂອງໂຮງງານ ແລະ ເພື່ອຊຸກຍູ້ປັບປຸງຊີວິດການເປັນຢູ່ ຂອງປະຊາຊົນຢູ່ໃນເຂດອ້ອມຂ້າງ./.