ລັດຖະມົນຕີກະຊວງ ຖວທ ຕ້ອນຮັບເອກອັກຄະລັດຖະທູດ ຣັດເຊຍ ເຂົ້າຢ້ຽມຂ່ຳນັບ

ໃນວັນທີ 21 ພະຈິກ 2019 ທີ່ນະຄອນຫລວງວຽງຈັນ, ທ່ານ ກິແກ້ວ ໄຂຄໍາພິທູນ ລັດຖະມົນຕີ ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ໄດ້ໃຫ້ກຽດຕ້ອນຮັບການເຂົ້າຢ້ຽມຂ່ຳນັບຂອງ ທ່ານ Vladimir Kalinin ພາຍຫລັງມາດຳລົງຕຳແໜ່ງເປັນເອກອັກຄະລັດຖະທູດ ວິສາມັນ ຜູ້ມີອຳນາດເຕັມ ແຫ່ງ ສະຫະພັນ ຣັດເຊຍ ຄົນໃໝ່ ປະຈຳ ສປປ ລາວ.

 

ໂອກາດນີ້, ທ່ານ ກິແກ້ວ ໄຂຄໍາພິທູນ ໄດ້ສະແດງຄວາມຍິນດີຕ້ອນຮັບ ແລະ ຊົມເຊີຍຕໍ່ ທ່ານ Vladimir Kalinin ທີ່ໄດ້ຮັບການແຕ່ງຕັ້ງມາດຳລົງຕຳແໜ່ງ ເປັນເອກອັກຄະລັດຖະທູດຄົນໃໝ່ ປະຈຳ ສປປ ລາວ, ພ້ອມທັງຕີລາສູງຕໍ່ການຮ່ວມມືລະຫວ່າງ ສປປ ລາວ ແລະ ສະຫະພັນ ຣັດເຊຍ ໂດຍສະ ເພາະໃນຂົງເຂດຖະແຫລງຂ່າວ, ວັດທະນະທຳ ແລະ ທ່ອງທ່ຽວ ທີ່ເຫັນວ່ານັບມື້ໄດ້ຮັບໄດ້ຮັບການເສີມຂະຫຍາຍ ແລະ ມີຜົນສຳເລັດໃນຫລາຍໆດ້ານ, ເຊິ່ງຈະເປັນພື້ນຖານອັນສໍາຄັນ ໃຫ້ແກ່ການສືບຕໍ່ເສີມຂະ ຫຍາຍການຮ່ວມມືຂອງສອງຝ່າຍໃນຕໍ່ໜ້າ.