ລັດຖະມົນຕີ ກະຊວງ ຖວທ ຕ້ອນຮັບເອກອັກຄະລັດຖະທູດ ສະຫະພາບເອີຣົບ ແລະ ຝຣັ່ງ ປະຈຳ ສປປ ລາວ

ໃນວັນທີ 19 ພະຈິກ 2019 ເວລາ 09:30 ໂມງ ທີ່ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ທ່ານ ສຈ.ປອ ກິແກ້ວ ໄຂຄຳພິທູນ ລັດຖະມົນຕີກະຊວງ ຖວທ ໄດ້ຕ້ອງຮັບການຢ້ຽມຂ່ຳນັບຂອງທ່ານ Leo Faber ເອກອັກຄະລັດຖະທູດ ແຫ່ງ ສະຫະພາບເອີຣົບ ປະຈຳ ສປປ ລາວ ເພື່ອປຶກສາວຽກງານໃນຂົງເຂດການຮ່ວມມືສອງຝ່າຍໃນຂະແໜງການດ້ານວັດທະນະທຳ, ຖະແຫຼງຂ່າວ ແລະ ທ່ອງທ່ຽວເປັນຕົ້ນ.

ໃນຂົງເຂດວັດທະນະທຳ:
ການຈັດເທດສະການດົນຕີ JAZZ ໂດຍມີການສົ່ງເສີມແຄນລາວເຂົ້າໄປມີບົດບາດຢູ່ໃນດົນຕີສາກົນ.
ການຈັດມະຫາກຳຮູບເງົາ EU ແລະ ນຳສະເໜີຟີມສາລະຄະດີກ່ຽວກັບວີຖີຊີວິດຊົນເຜົ່າ ແລນແຕນ ຫຼື ເຜົ່າລາວຫ້ວຍສູ່ສັງຄົມ, ການອະນຸລັກສິ່ງແວດລ້ອມ ແລະ ຊີວະນາໆພັນເປັນຕົ້ນ.

ແລະ ໃນມື້ດຽວກັນນັ້ນເວລາ 10:30 ໂມງ ທີ່ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ທ່ານ ສຈ.ປອ ກິແກ້ວ ໄຂຄຳພິທູນ ລັດຖະມົນຕີກະຊວງ ຖວທ ໄດ້ຕ້ອງຮັບການຢ້ຽມຂ່ຳນັບຂອງທ່ານ ນາງ Florence Jeanblanc-Risler ເອກອັກຄະລັດຖະທູດ ຝຣັ່ງ ປະຈຳ ສປປ ລາວ ໃນໂອກາດມາດຳລົງຕຳແໜ່ງເປັນເອກອັກຄະລັດຖະທູດໃໝ່ ປະຈຳ ສປປ ລາວ.
ຂົງເຂດວັດທະນະທຳ-ມໍລະດົກ
ໄດ້ໃຫ້ການສະໜັບສະໜູນວຽກງານການປົກປັກຮັກສາມໍລະດົກແຂວງຫຼວງພະບາງຕະຫຼອດໄລຍະ 20ປີທີ່ຜ່ານມາມູນຄ່າ 15 ລ້ານຢູໂລ ຊຶ່ງໄດ້ປະກອບສ່ວນໃຫຍ່ຫຼວງໃນການສ້າງຕັ້ງໜ່ວຍງານຄຸ້ມຄອງມໍລະດົກໂລກທີ່ມີຄວາມສາມາດສືບຕໍ່ຄຸ້ມຄອງແລະຖ່າຍທອດຄວາມຮູ້ແລະປະສົບການໄປສູ່ 2ແຂວງພາກໃຕ້ ຈຳປາສັກ ແລະ ສະຫວັນນະເຂດ ຊຶ່ງຄາດຄະເນແຜນການຮ່ວມມືໄລຍະຕໍ່ໄປ 2021-2025 ມູນຄ່າປະມານ 6ລ້ານຢູໂຣ. ນອກຈາກນັ້ນວຽກງານປິ່ນອ້ອມອື່ນໆພາຍໃຕ້ຂອບວັດທະນະທຳເທດສະການດົນຕີ JAZZ, ຮູບເງົາ, ການອານຸລັກຊ້າງຢູ່ແຂວງຫຼວງພະບາງ, ການອານຸລັກຮູບແຕ້ມຢູ່ຫໍພິພິທະພັນພະລາດສະວັງເກົ່າຫຼວງພະບາງຊຶ່ງເປັນການຮ່ວມມືລະຫວ່າງແຄັວນກາງຂອງປະເທດຝຣັ່ງ ກັບ ແຂວງຫຼວງພະບາງ.
ວຽກງານການທ່ອງທ່ຽວກໍ່ໄດ້ເນັ້ນຄວາມສຳຄັນໂດຍສະເພາະແມ່ນການນຳແຫຼ່ງມໍລະດົກໃຫ້ເປັນທ່າແຮງໃນການທ່ອງທ່ຽວເພື່ອສ້າງລາຍຮັບໃຫ້ແກ່ປະຊາຊົນໃນເຂດມໍລະດົກ, ຊຶ່ງການເນັ້ນໜັກໃສ່ການສົ່ງເສີມການທ່ອງທ່ຽວແບບຍືນຍົງເພື່ອປະກອບສ່ວນໃນການປົກປັກຮັກສາແຫຼ່ງມໍລະດົກ.
ວຽກງານງານຖະແຫຼງຂ່າວຈັດຝຶກອົບຮົມໃຫ້ນັກຂ່າວໃນການຂຽນຂ່າວໃນຫົວຂໍ້ອະນຸລັກຮັກສາສັດປ່າ ແລະ ຊີວະນາໆພັນ.