ມອບ-ຮັບ​ໜ້າ​ທີ່​ ເລ​ຂາ​ຄະ​ນະ​ພັກ ລັດ​ຖະ​ມົນ​ຕີ ​ກະ​ຊວງ​ ຖວ​ທ

ໃນວັນທີ 30 ຕຸລາ 2019 ທີ່ຫໍວັດທະນະທຳແຫ່ງຊາດ ນະຄອນຫລວງວຽງຈັນ, ໄດ້ມີພິທີມອບ-ຮັບໜ້າທີ່ເລຂາຄະນະພັກ, ລັດຖະມົນຕີ ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ລະຫວ່າງ ທ່ານ ບໍ່ແສງຄຳ ວົງດາລາ ກຳມະການສູນກາງພັກ, ເລຂາຄະນະພັກ, ລັດຖະມົນຕີກະຊວງ ຖວທ ຜູ້ເກົ່າ ແລະ ທ່ານ ກິແກ້ວ ໄຂຄຳພິທູນ ຄະນະເລຂາທິການສູນກາງພັກ, ເລຂາຄະນະພັກ, ວ່າການລັດຖະມົນຕີ ກະຊວງ ຖວທ ຄົນໃໝ່ ໂດຍການໃຫ້ກຽດເຂົ້າຮ່ວມຂອງ ທ່ານ ພັນຄຳ ວິພາວັນ ກຳມະການກົມການເມືອງສູນກາງພັກ, ຜູ້ປະຈຳການຄະນະເລຂາທິການສູນກາງພັກ, ຮອງປະທານປະເທດ ແຫ່ງ ສປປ ລາວ, ມີການນຳຂັ້ນສູງ ພັກ-ລັດ, ຮອງລັດຖະມົນຕີ, ຫົວໜ້າກົມ, ຮອງຫົວໜ້າກົມ, ຫົວໜ້າພະແນກ, ຮອງພະແນກ, ພະນັກງານຫລັກແຫລ່ງ ອ້ອມຂ້າງກະຊວງ ຖວທ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.

ໃນການມອບຮັບໜ້າທີ່ໃນຄັ້ງນີ້, ແມ່ນອີງຕາມຄຳສັ່ງຂອງກົມການເມືອງສູນກາງພັກ ວ່າດ້ວຍການຍົກຍ້າຍການນຳຂັ້ນສູງໄປຮັບໜ້າທີ່ໃໝ່, ອີງຕາມມະຕິຕົກລົງຂອງກົມການເມືອງສູນກາງພັກ ວ່າດ້ວຍການແຕ່ງຕັ້ງ ເລຂາຄະນະບໍລິຫານງານພັກກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ແລະ ອີງຕາມດຳລັດຂອງນາຍົກລັດຖະມົນຕີ ວ່າດ້ວຍການແຕ່ງຕັ້ງວ່າການລັດຖະມົນຕີ ຖະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ.


ໃນໂອກາດດັ່ງກ່າວ, ທ່ານ ພັນຄຳ ວິພາວັນ ໄດ້ໃຫ້ກຽດມີຄຳເຫັນ ແລະ ໂອ້ລົມ ຕໍ່ພິທີດັ່ງກ່າວວ່າ: ການຕົກລົງຂອງກົມການເມືອງ ແລະ ຄະນະເລຂາທິການສູນກາງພັກ ກ່ຽວກັບການປະຕິບັດນະໂຍບາຍພັກການຮັບອຸດໜູນບຳນານ ແລະ ການຈັດວາງຊັບຊ້ອນ ພະນັກງານນຳພາຄຸ້ມຄອງຂັ້ນສູງ ຂອງສູນກາງຈຳນວນໜຶ່ງ ແມ່ນອີງຕາມການຕົກລົງ ຂອງກົມການເມືອງສູນກາງພັກ, ອີງຕາມມະຕິຂອງກົມການເມືອງສູນກາງພັກ ສະບັບເລກທີ 30 ຂອງເດືອນມັງກອນ 2018 ວ່າດ້ວຍມາດຖານ ແລະ ເງື່ອນໄຂ ຂອງພະນັກງານນຳພາຄຸ້ມຄອງ ແລະ ອີງຕາມນະໂຍບາຍລວມຂອງພັກ-ລັດ ຂອງພວກເຮົາ ໂດຍສະເພາະແມ່ນກົດໝາຍ ວ່າດ້ວຍລັດຖະກອນ ແຫ່ງ ສປປ ລາວ. ດັ່ງນັ້ນ, ກົມການເມືອງສູນກາງພັກ ແລະ ຄະນະເລຂາທິການສູນກາງພັກ ຈຶ່ງໄດ້ຕົກລົງໃຫ້ບັນດາສະຫາຍ ທີ່ຢູ່ສູນກາງ ຈຳນວນໜຶ່ງອອກພັກການຮັບອຸດໜູນບຳນານ. ພ້ອມນີ້, ທ່ານຮອງປະທານປະເທດ ຍັງໄດ້ຍ້ອງບໍຊົມເຊີຍ ຕໍ່ທ່ານລັດຖະມົນຕີກະຊວງ ຖວທ ຜູ້ເກົ່າ ວ່າ: ສຳລັບ ສະຫາຍ ບໍ່ແສງຄຳ ວົງດາລາ ໃນໄລຍະບັ້ນທ້າຍນີ້ ກໍ່ໄດ້ຖືກມອບໝາຍ ໃຫ້ເປັນເລຂາ ຄະນະບໍລິຫານງານພັກກະຊວງ ແລະ ເປັນລັດຖະມົນຕີ ຂອງກະຊວງ ຖວທ ໃນໄລຍະປະຕິບັດໜ້າທີ່ເກືອບ 5 ປີ, ສະຫາຍ ບໍ່ແສງຄຳ ກໍ່ໄດ້ຕັ້ງໜ້າຫ້າວຫັນ ພ້ອມກັບໝູ່ຄະນະ ໃນການປະຕິບັດໜ້າທີ່ການເມືອງ ທີ່ໄດ້ຮັບມອບໝາຍ ແລະ ກໍ່ມີຜົນສຳເລັດໃນຫລາຍດ້ານ ເປັນຕົ້ນ ໄດ້ເປີດປີທ່ອງທ່ຽວລາວ 2018, ເປີດປີທ່ອງທ່ຽວລາວ-ຈີນ 2019, ສະເໜີສຽງແຄນລາວ ແລະ ໄດ້ຮັບເປັນມໍລະດົກໂລກທາງດ້ານນາມມະທຳ ແລະ ທົ່ງໄຫຫີນຊຽງຂວາງ ທີ່ໄດ້ເຂົ້າເປັນມໍລະດົກໂລກ, ເຊິ່ງເປັນຄວາມພາກພູມໃຈ, ເອກອ້າງທະນົງໃຈຄວາມເປັນຊາດລາວເຮົາ.
ການໄດ້ຮັບນະໂຍບາຍອຸດໜູນບຳນານ ແມ່ນເປັນກຽດສັກສີຂອງພະນັກງານລັດຖະກອນ ແລະ ເປັນສິ່ງຢັ້ງຢືນການເຮັດສຳເລັດພັນທະໜ້າທີ່ ຂອງຕົນຕໍ່ປະເທດຊາດ ແລະ ຕໍ່ປະຊາຊົນ, ເນື່ອງຈາກວ່າມີການໃຫ້ບັນດາສະຫາຍຈຳນວນໜຶ່ງ ອອກການເຂົ້າຮັບອຸດໜູນບຳນານ ສະນັ້ນຈຶ່ງຕິດພັນກັບການຊັບຊ້ອນຍົກຍ້າຍ, ຍ້ອນແນວນັ້ນກຳມະການກົມການເມືອງສູນກາງພັກ ແລະ ຄະນະເລຂາທິການສູນກາງພັກ ຈຶ່ງໄດ້ຕົກລົງຈັດວາງຊັບຊ້ອນ ບາງສະຫາຍ ກຳມະການກົມການເມືອງ, ຄະນະເລຂາທິການສູນກາງພັກ ແລະ ກຳມະການສູນກາງພັກຈຳນວນໜຶ່ງໄປຮັບໜ້າທີ່ໃໝ່ ຕາມຄວາມຮຽກຮ້ອງຕ້ອງການຂອງໜ້າທີ່ການເມືອງ ກໍຄື ຕາມກົດລະບຽບຂອງພັກວາງອອກ.