ລັດຖະມົນຕີ ກະຊວງ ຖວທ ຕ້ອນຮັບ ຄະນະກໍາມາທິການທ່ອງທ່ຽວເຢຍລະມັນ

ຂປລ. ໃນວັນທີ 7 ຕຸລາ 2019 ທີ່ນະຄອນຫລວງວຽງຈັນ, ທ່ານ ບໍ່ແສງຄໍາ ວົງດາລາ ລັດຖະມົນຕີກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ໄດ້ໃຫ້ກຽດຕ້ອນຮັບ ທ່ານ Dr Klaus-Peter Schulze ຄະນະກໍາມາທິການທ່ອງທ່ຽວ, ລັດຖະສະພາເຢຍລະມັນ ພ້ອມດ້ວຍຄະນະ ເນື່ອງໃນໂອກາດເດີນທາງມາຢ້ຽມຢາມ ແລະ ເຮັດວຽກ ຢູ່ ສປປ ລາວ. 

ໂອກາດນີ້, ທ່ານ ບໍ່ແສງຄໍາ ວົງດາລາ ໄດ້ສະແດງຄວາມຍິນດີຕ້ອນຮັບ ແລະ ຊົມເຊີຍທີ່ Dr Klaus-Peter Schulze ໄດ້ນໍາພາຄະນະເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ໃນຄັ້ງນີ້ ເຊິ່ງເປັນນິມິດໝາຍທີ່ດີ ແລະ ເປັນການປະກອບສ່ວນອັນສຳຄັນ ເຂົ້າໃນການຮັດແໜ້ນການຮ່ວມມືຂອງສອງປະເທດ ລາວ-ເຢຍລະມັນ ໃນຂົງເຂດວຽກງານທ່ອງທ່ຽວ ໃຫ້ນັບມື້ນັບຂະຫຍາຍຕົວ. ສອງຝ່າຍໄດ້ປຶກສາຫາລືກັນ ເພື່ອສືບຕໍ່ຊຸກຍູ້ ແລະ ສົ່ງເສີມວຽກງານວັດທະນະທຳ ແລະ ທ່ອງທ່ຽວຂອງສອງປະເທດ.ທ່ານ Dr Klaus-Peter Schulze ໄດ້ສະຄວາມຂອບໃຈຕໍ່ທ່ານລັດຖະມົນຕີ ທີ່ໃຫ້ກຽດຕ້ອນຮັບຢ່າງອົບອຸ່ນ ຕໍ່ການມາການມາຢ້ຽມຢາມ ສປປ ລາວໃນຄັ້ງນີ້, ພ້ອມສະແດງຄວາມຊົມເຊີຍ ທີ່ວຽກງານການທ່ອງທ່ຽວຂອງ ສປປ ລາວ ມີການພັດທະນາ ແລະ ຂະຫຍາຍຕົວໄວ ອັນໄດ້ສ້າງລາຍຮັບຢ່າງຫລວງຫລາຍໃຫ້ປະຊາຊົນລາວ ແລະ ຊົມເຊີຍທີ່ ສປປ ລາວ ມີແຫລ່ງທຳມະຊາດ ແລະ ແຫລ່ງທ່ອງທ່ຽວທີ່ອຸດົມສົມບູນ.