ລາວ ກຽມພ້ອມສະເໜີປ່າສະຫງວນ ຫີນໜາມໜໍ່ ເປັນມໍລະດົກໂລກ

ຂປລ. ກອງປະຊຸມຄະນະກຳມະການລະດັບຊາດ ເພື່ອມໍລະດົກໂລກ ຄັ້ງທີ 8 ໄດ້ຈັດຂຶ້ນໃນວັນທີ 29 ສິງຫາ 2019 ເພື່ອປຶກສາຫາລື ໃນການກະກຽມຄວາມພ້ອມໃຫ້ແກ່ການສະເໜີປ່າສະຫງວນແຫ່ງຊາດ ຫີນໜາມໜໍ່ ເປັນມໍລະດົກໂລກແຫ່ງຕ່ໍໄປ ພາຍໃຕ້ການ ເປັນປະທານຂອງ ທ່ານ ສຈ.ດຣ ບໍ່ແສງຄຳ ວົງດາລາ ລັດຖະມົນຕີກະຊວງ ຖະແຫລງຂ່າວ,ວັດທະນະທຳ ແລະ ທ່ອງທ່ຽວ ທັງເປັນປະທານ ຄະນະກຳມະການລະດັບຊາດ ເພື່ອມໍລະດົກໂລກ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.

 

ທ່ານ ສຈ.ດຣ ບໍ່ແສງຄຳ ວົງດາລາ ກ່າວວ່າ: ປັດຈຸບັນ ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ໄດ້ສົມທົບກັບຂະ ແໜງການ ແລະ ອົງການຈັດຕັ້ງທີ່ກ່ຽວຂ້ອງຂຸ້ນຂ້ຽວກະກຽມເອກະສານຄຳຮ້ອງກ່ຽວກັບສອງຝ່າຍລາວ-ຫວຽດນາມ, ຫວຽດນາມ -ລາວ ຢູ່ເມືອງບົວລະພາ ແຂວງຄຳມ່ວນ ເພື່ອປະສານກັບລັດຖະບານຫວຽດນາມ ໃນການນຳສະເໜີເປັນມໍລະດົກໂລກທາງທຳມະ ຊາດຮ່ວມຊາຍແດນກັບຟອງຍາເກບັງຢູ່ແຂວງກວາງບິງ ຂອງຫວຽດນາມ. ຄາດວ່າປ່າສະຫງວນແຫ່ງຊາດ ຫີນໜາມໜໍ່ ຈະກາຍ ເປັນມໍລະດົກໂລກ ທາງທຳມະຊາດແຫ່ງທຳອິດຂອງ ສປປ ລາວ, ທັງຈະເປັນມໍລະດົກໂລກທາງທຳມະຊາດ ຂ້າມຊາຍແດນແຫ່ງທຳ ອິດໃນພາກພຶ້ນນີ້ ເຊິ່ງລັດຖະບານ ລາວ-ຫວຽດນາມ, ຫວຽດນາມ-ລາວ ຈະໄດ້ພ້ອມກັນສ້າງທຸກເງຶ່ອນໄຂເພື່ອເຮັດໃຫ້ວຽກງານດັ່ງ ກ່າວ ບັນລຸຜົນສຳເລັດຢ່າງຈົບງາມ.

ພ້ອມດຽວກັນນັ້ນ, ທາ່ນ ສຈ.ດຣ ບໍ່ແສງຄຳ ວົງດາລາ ຍັງໄດ້ເນັ້ນໃຫ້ຜູ້ເຂົ້າຮ່ວມກອງປະຊຸມ ຄົ້ນຄວ້າປະກອບຄຳຄິດຄຳເຫັນຢ່າງ ກົງໄປກົງມາ ເພື່ອເປັນເອກະພາບກັນໃນການວາງແຜນວຽກງານໃນຕໍ່ໜ້າເພື່ອໃຫ້ບັນລຸເປົ້າໝາຍທີ່ວາງໄວ້ ກໍຄືເຮັດໃຫ້ເຂດຫີນ ໜາມໜໍ່ ໄດ້ຖືກຮັບຮອງເຂົ້າເປັນມໍລະດົກໂລກ ທາງທຳມະຊາດໄວໆນີ້. ກອງປະຊຸມຍັງໄດ້ຮັບຟັງການລາຍງານຄວາມຄືບໜ້າໃນ ຫລາຍຂົງເຂດວຽກງານທີ່ປະກອບສ່ວນໃຫ້ແກ່ການກະກຽມນຳສະເໜີປ່າສະຫງວນແຫ່ງຊາດຫີນໜາມໜ່ໍເປັນມໍລະດົກໂລກທາງ ທຳມະຊາດຂອງອົງການອຸຍແນສໂກ ຈາກຫລາຍພາກສ່ວນທີ່ກ່ຽວຂ້ອງ ທັງໃນລະດັບມະຫາພາກ ແລະ ຈຸລະພາກຕະຫລອດເຖິງ ການປຶກສາຫາລື ແລະ ການປະກອບຄຳຄິດຄຳເຫັນຈາກບັນດາອົງການຈັດຕັ້ງສາກົນ ໂດຍສະເພາະ ການຢືນຢັນທັດສະນະທີ່ເປັນ ເອກະພາບຂອງທັງສອງຝ່າຍ ລາວ-ຫວຽດນາມ, ຫວຽດນາມ-ລາວ ທີ່ສະໜັບສະໜູນໃຫ້ແກ່ການນຳສະເໜີຂຶ້ນທະບຽນສວນອຸທິ ຍານແຫ່ງຊາດຟອງຍາເກບັງ ແລະ ປ່າສະຫງວນແຫ່ງຊາດ ຫີນໜາມໜໍ່ ເຂົ້າເປັນມໍລະດົກໂລກຮ່ວມຊາຍແດນດຽວກັນ.

ແຫຼ່ງຂໍ້ມູນຈາກ: ໜັງສືພິມ ປະເທດລາວ