ສະເຫຼີມສະຫຼອງວັນສື່ມວນຊົນ ແລະ ການພິມຈຳໜ່າຍ ຄົບຮອບ 69 ປີ

ກະຊວງຖະແຫລງຂ່າວ,ວັດທະນະທຳແລະທ່ອງທ່ຽວ(ຖວທ)ໄດ້ຈັດງານໂຮມຊຸມນຸມສະເຫຼີມສະຫຼອງວັນສື່ມວນຊົນ ແລະ ການພິມຈໍາໜ່າຍລາວ ຄົບຮອບ 69 ປີ (13/8/1950-13/8/2019) ຂຶ້ນ ເມື່ອວັນທີ 13 ສີງຫານີ້ ທີ່ຫໍວັດທະນະທຳແຫ່ງຊາດ ໂດຍການເປັນກຽດເຂົ້າຮ່ວມຂອງ ທ່ານ ບໍ່ແສງຄຳ ວົງດາລາ ລັດຖະມົນຕີກະຊວງຖວທ ຊຶ່ງມີການນໍາ ແລະ ພະນັກງານທີ່ເຮັດວຽກງານສື່ ແລະ ການພິມຈໍາໜ່າຍ ທັງພາກລັດ, ເອກະຊົນ ແລະ ຜູ້ໃຫ້ການສະໜັບສະໜູນເຂົ້າຮ່ວມປະມານ300ຄົນ.

ໃນງານໂຮມຊຸມນຸມ ທ່ານ ສະຫວັນຄອນ ຣາຊມຸນຕີ ຮອງລັດຖະມົນຕີກະຊວງຖວທ ທັງເປັນປະທານສະມາຄົມນັກຂ່າວແຫ່ງສປປລາວ ໄດ້ຕາງໜ້າໃຫ້ສື່ມວນຊົນ ແລະ ການພິມຈໍາໜ່າຍຂຶ້ນຜ່ານບົດສະຫຼຸບຜົນງານການເຄື່ອນໄຫວຂອງສື່ມວນຊົນ ແລະ ການພິມຈໍາໜ່າຍ, ບາງຕອນສຳຄັນ ທ່ານໄດ້ກ່າວໄວ້ວ່າ:ໃນໜຶ່ງປີຜ່ານມາເຖິງວ່າພວກເຮົາໄດ້ປະສົບພົບພໍ້ ກັບຄວາມຫຍຸ້ງຍາກແລະສິ່ງທ້າທາຍຫຼາຍຈາກສະພາບການເຊື່ອມໂຍງໃນຂະບວນການ ປະຕິວັດວິທະຍາສາດເຕັກໂນໂລຊີຂໍ້ມູນຂ່າວສານທີ່ນັບມື້ນັບຂະຫຍາຍຕົວກ້າວເຂົ້າສູ່ຍຸກດີຈີຕອນ 4.0,ເຊິ່ງໄດ້ສົ່ງຜົນກະທົບທັງທາງບວກ ແລະທາງລົບຕໍ່ການພັດທະນາຢູ່ປະເທດເຮົາກໍ່ຕາມ,ແຕ່ ພາຍໃຕ້ການຊີ້ນໍາ-ນໍາພາຂອງພັກເວົ້າລວມ, ກໍຄືອົງຄະນະພັກແລະຄະນະນໍາກະຊວງຖວທເວົ້າສະເພາະ. ພວກເຮົາໄດ້ປະຕິບັດໜ້າທີ່ຢ່າງຕັ້ງໜ້າທັງສະຕິປັນຍາແລະເຫື່ອແຮງຂອງຕົນເຂົ້າໃນການໂຄສະນາເຜີຍແຜ່ຜົນສໍາເລັດແຕ່ລະໄລຍະແຫ່ງການປົກປັກຮັກສາແລະສ້າງສາພັດທະນາປະເທດຊາດ, ປຸກລະດົມຈິດໃຈຮັກຊາດແລະຄວາມເປັນເຈົ້າຕົນເອງ, ສ້າງຄວາມເຂັ້ມແຂງດ້ວຍຕົນເອງສື່ມວນຊົນແລະການພິມຈໍາໜ່າຍລາວໄດ້ເຕີບໃຫຍ່ຂະຫຍາຍຕົວຢ່າງຕໍ່ເນື່ອງທັງທາງດ້ານປະລິມານແລະຄຸນນະພາບໂດຍມີໂຄງລ່າງພື້ນຖານທີ່ໄດ້ຮັບການພັດທະນາໄປສູ່ຄວາມທັນສະໄໝແລະຄ່ອຍໆຫັນຈາກລະບົບອານາລອກໄປສູ່ລະບົບດີຈີຕອນໄດ້ໂດຍພື້ນຖານ. ອັນພົ້ນເດັ່ນແມ່ນການນໍາໃຊ້ເຄືອຂ່າຍອິນເຕີເນັດໃນການສະໜອງຂໍ້ມູນຂ່າວສານ, ສາລະຄວາມຮູ້, ສາລະບັນເທີງໃຫ້ແກ່ເປົ້າໝາຍເພື່ອຮັບໃຊ້ການພັດທະນາເສດຖະກິດ-ສັງຄົມໄດ້ຢ່າງວ່ອງໄວ, ອຸດົມສົມບູນຕາມທິດສີຂຽວແລະຍືນຍົງ. ໃນຂະນະດຽວກັນບຸກຄະລາກອນສື່ມວນຊົນແລະການພິມຈໍາໜ່າຍກໍໄດ້ຮັບການຍົກລະດັບຢ່າງຕໍ່ເນື່ອງທັງພາຍໃນແລະຕ່າງປະເທດ.
ໃນການໂອ້ລົມຕໍ່ກອງປະຊຸມທ່ານ ບໍ່ແສງຄຳ ວົງດາລາ ໄດ້ສະແດງຄວາມຍ້ອງຍໍຊົມເຊີຍບັນດານັກຮົບສື່ມວນຊົນແລະການພິມຈຳໜ່າຍທຸກພາກສວ່ນທີ່ໄດ້ອຸທິດເຫື່ອແຮງສະຕິປັນຍາເຮັດສຳເລັດພາລະກິດທີ່ມີກຽດສະຫງ່າຂອງຕົນ.ທ່ານກ່າວວ່າ: ສື່ມວນຊົນແລະການພິມຈຳໜ່າຍຍັງເປັນປະໂຫຍດສູງສຸດໃຫ້ແກ່ປະເທດຊາດຂອງພວກເຮົາ.ເພື່ອປະຕິບັດໜ້າທີການເມືອງທີ່ຖືກມອບໝາຍ, ເສີມຂະຫຍາຍຜົນງານແລະຈໍາກັດຈຸດອ່ອນຂໍ້ຄົງຄ້າງນັ້ນ,ທ່ານລັດຖະມົນຕີໄດ້ຊີ້ນຳໃຫ້ ສື່ມວນຊົນແລະ ການພິມຈໍາໜ່າຍຕ້ອງໄດ້ເອົາໃຈໃສ່7ວຽກງານທີ່ສຳຄັນໃນຕໍ່ໜ້າດັ່ງນີ້:

1. ສືບຕໍ່ເອົາໃຈໃສ່ວຽກງານແນວຄິດການເມືອງໃຫ້ດີມີຄວາມຮັບຜິດຊອບການເມືອງສູງຕໍ່ໜ້າທີ່ວຽກງານ. ເຮັດໃຫ້ສື່ມວນຊົນແລະສິ່ງພິມຂອງພວກເຮົາເປັນກະບອກສຽງແລະເວທີໂຄສະນາແນວທາງນະໂຍບາຍຂອງພັກ, ລະບຽບກົດໝາຍຂອງລັດ, ແຜນພັດທະນາເສດຖະກິດ-ສັງຄົມຂອງລັດຖະບານ, ເປັນເວທີສະແດງຄວາມຄິດຄວາມເຫັນແລະຄວາມມຸ່ງມາດປາຖະໜາອັນຊອບທໍາຂອງປະຊາຊົນລາວບັນດາເຜົ່າ, ຢຶດໝັ້ນແລະປະຕິບັດກົດໝາຍວ່າດ້ວຍສື່ມວນຊົນແລະກົດໝາຍພິມຈໍາໜ່າຍຢ່າງຖືກຕ້ອງ, ຄົບຖ້ວນແລະເຂັ້ມງວດ.

2. ເອົາໃຈໃສ່ຈັດຕັ້ງປະຕິບັດວິໄສທັດ 2030, ຍຸດທະສາດຮອດປີ 2025 ແລະແຜນພັດທະນາວຽກງານຖະແຫຼງຂ່າວ, ວັດທະນະທຳແລະທ່ອງທ່ຽວຂອງ ສປປລາວ2016-2020ໃຫ້ປະກົດຜົນເປັນຈິງ.

3.ສືບຕໍ່ໂຄສະນາເຜີຍແຜ່ ຜ່ານສື່ມວນຊົນແລະການພິມຈໍາໜ່າຍກ່ຽວກັບຂະບວນການຕ່າງໆ ຮັບໃຊ້ ໃຫ້ແກ່ການກະກຽມກອງປະຊຸມໃຫຍ່ຄັ້ງທີ XI ຂອງພັກ, ປີທ່ອງທ່ຽວລາວ-ຈີນ 2019, ການກະກຽມງານກິລາແຫ່ງຊາດທີ່ແຂວງຊຽງຂວາງ, ການສະເຫຼີມສະຫຼອງທົ່ງໄຫຫີນແຂວງຊຽງຂວາງເຂົ້າເປັນມໍລະດົກໂລກ, ໂຄສະນາເຫດການສໍາຄັນຂອງພັກ, ຂອງຊາດແລະສາກົນໃຫ້ດີ.

4. ສືບຕໍ່ປັບປຸງກົດໝາຍແລະສ້າງນິຕິກໍາລຸ່ມກົດໝາຍໃຫ້ພຽງພໍ, ສອດຄ່ອງແລະຮັດກຸມ.

5. ສືບຕໍ່ປັບປຸງວຽກງານຄຸ້ມຄອງສື່ມວນຊົນແລະການພິມຈໍາໜ່າຍໃຫ້ເຂັ້ມແຂງ, ສ້າງເງື່ອນໄຂໃຫ້ສື່ມວນຊົນແລະການພິມຈໍາໜ່າຍສາມາດພັດທະນາຕາມທິດຄຸນນະພາບ, ທັນສະໄໝ, ປອດໄພແລະຍືນຍົງ.

6.ໃນສະພາບທີ່ການສ້າງລາຍຮັບວິຊາການຈາກສື່ມວນຊົນນັບມືນັບຫຼຸດລົງນີ້,ຈະຕ້ອງໄດ້ຮີບຮ້ອນເອົາໃຈໃສ່ຄົ້ນຄ້ວາ, ວິໄຈແລະຊອກຫາວິທີການໃໝ່ໃນການຊອກຫາແຫຼ່ງລາຍຮັບວິຊາການຈາກສື່ມວນຊົນແລະການພິມຈໍາໜ່າຍ, ລວມທັງການໃຊ້ຈ່າຍເຂົ້າໃນວຽກງານໃຫ້ມີຄວາມຄ່ອງຕົວທີຖືກຕ້ອງສອດຄອງກັບລະບຽບກົດໝາຍໃຫ້ໄດ້ໂດຍໄວຫລືຫັນໄປສູ່ການກຸ້ມຕົນເອງ.

7. ເອົາໃຈໃສ່ກໍ່ສ້າງພະນັກງານໜຸ່ມນ້ອຍສືບທອດປ່ຽນແທນ ທີຮັບປະກັນທາງດ້ານທັດສະນະຫຼັກໝັ້ນ, ຄຸນທາດການເມືອງແລະວິຊາສະເພາະທີ່ເຂັ້ມແຂງເພື່ອເຮັດສຳເລັດໜ້າທີ່ສໍາຄັນທີພັກລັດໄດ້ມອບໝາຍໃຫ້.

ໃນງານໂຮມຊຸມນຸມຍັງມີການຈັດງານວາງສະແດງຮູບພາບຜົນງານການເຄື່ອນໄຫວຂອງສື່ມວນຊົນ ແລະ ການພິມຈໍາໜ່າຍລາວຕື່ມອີກທີ່ສະຖານທີ່ດັ່ງກ່າວເພື່ອເປັນການຫວນຄືນມູນເຊື້ອຂອງວັນສື່ມວນຊົນ ແລະ ການນພິມຈໍາໜ່າຍແລ້ວ, ກໍຍັງເປັນການເຕົ້າໂຮມຄວາມສາມັກຄີພາຍໃນສື່ມວນຊົນ ແລະ ການພິມຈໍາໜ່າຍໃຫ້ແໜ້ນແຟ້ນ, ພ້ອມທັງສ້າງຄວາມຮັບຮູ້ ແລະ ເຂົ້າໃຈທີ່ຖືກຕ້ອງຕໍ່ບົດບາດ, ໜ້າທີ່, ມູນເຊື້ອ ແລະ ຜົນງານຂອງວຽກງານດັ່ງກ່າວ. ນອກນັ້ນຍັງເປັນການປຸກລະດົມໃຫ້ທົ່ວສັງຄົມໄດ້ມີສ່ວນຮ່ວມໃນການສ້າງຄວາມເຂັ້ມແຂງໃຫ້ອົງການສື່ມວນຊົນ ແລະ ການພິມຈໍາໜ່າຍລາວໃຫ້ສູງຂຶ້ນເລື້ອຍໆ.