ຊົມເຊີຍວັນສື່ມວນຊົນ ແລະ ການພິມຈຳໜ່າຍລາວ ຄົບຮອບ 69 ປີ

ໃນໄລຍະປະເທດດຳເນີນພາລະກິດຕໍ່ສູ້ປົດປ່ອຍຊາດ; ວຽກງານຖະແຫລງຂ່າວສື່ມວນຊົນ ໄດ້ມີບົດບາດອັນສຳຄັນເປັນອາວຸດອັນແຫລມຄົມ, ໂຄສະນາເຜີຍແຜ່, ສຶກສາອົບຮົມ, ເຕົ້າໂຮມ, ຈັດຕັ້ງ ແລະ ປຸກລະດົມປະຊາຊົນບັນດາເຜົ່າດຳເນີນການປະຕິວັດ ພາຍໃຕ້ການນຳພາຂອງພັກເຮົາຍາດໄດ້ໄຊຊະນະ ເປັນກ້າວໆມາ. ວຽກງານຖະແຫລງຂ່າວສື່ມວນຊົນ ໄດ້ສະໜິດຕິດແໜ້ນກັບພາລະກິດປະຕິວັດຂອງພັກ, ຕິດພັນກັບກັບຂະບວນການຕໍ່ສູ້ຂອງປະຊາຊົນບັນດາເຜົ່າ ແລະ ຕິດພັນກັບຄວາມເປັນມາຂອງຊາດລາວເຮົາ;

ດັ່ງນັ້ນ ພັກເຮົາຈຶ່ງໄດ້ກຳນົດມະຕິ, ແນວທາງ, ທັງຊີ້ນຳໆພາຕໍ່ຂົງເຂດສື່ມວນຊົນ ໃຫ້ເຄື່ອນໄຫວຢ່າງສອດຄ່ອງກັບແຕ່ລະໄລຍະຂອງການປະຕິວັດເຮົາ. ສື່ມວນຊົນ ໄດ້ປະກອບສ່ວນສຳຄັນເຂົ້າໃນການກໍ່ສ້າງລະບອບໃໝ່; ປະກອບສ່ວນຍົກລະດັບຄວາມຮັບຮູ້ຂອງປະຊາຊົນ, ຕອບສະໜອງຄວາມຮຽກຮ້ອງຕ້ອງການທີ່ນັບມື້ສູງ ແລະ ກ້າວສູ່ຄວາມອຸດົມສົມບູນທາງດ້ານເນື້ອໃນ ແລະ ຄຸນນະພາບ. ຜ່ານການເປີດກວ້າງຂ່າວສານຕໍ່ຕ່າງປະເທດ, ສື່ມວນຊົນລາວກໍ່ໄດ້ປະກອບສ່ວນອັນສຳຄັນເຂົ້າໃນການປະຕິບັດແນວທາງການຕ່າງປະເທດຂອງພັກ-ລັດ ເຮັດໃຫ້ເພື່ອນມິດສາກົນຮູ້ຈັກຊາດລາວ, ຄົນລາວ ຫລາຍຂຶ້ນຊັກໄຊ້, ບົດບາດ ແລະ ອິດທິພົນຂອງ ສປປ ລາວ ກໍ່ນັບມື້ພົ້ນເດັ່ນໃນເວທີພາກພື້ນແລະ ສາກົນ.
ໃນໂອກາດສະຫລອງວັນສື່ມວນຊົນລາວ ແລະ ການພິມຈຳໜ່າຍ ຄົບຮອບ 69 ປີ, ທ່ານ ສະຫວັນຄອນ ລາຊະມົນຕີຮອງລັດຖະມົນຕີ ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວໄດ້ໃຫ້ສຳພາດ ໃນວັນທີ 8 ສິງຫາ 2019 ນີ້ວ່າ:ໃນຫລາຍປີຜ່ານມາຈົນຮອດປັດຈຸບັນກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວໃນຖານະເປັນຜູ້ນຳພາ, ຜູ້ຄຸ້ມຄອງວຽກງານສື່ມວນຊົນ ພວກເຮົາໃນລະດັບກະຊວງ, ໂດຍມີກົມສື່ມວນຊົນ ເປັນຜູ້ປະຕິບັດຄຸ້ມຄອງສື່ທຸກຂະແໜງການ ກໍໄດ້ປະຕິບັດໜ້າທີ່ ໃນການເຮັດໃຫ້ສື່ມວນຊົນລາວໄດ້ຮັບການພັດທະນາໃຫ້ທັນກັບການປ່ຽນແປງຂອງຄວາມກ້າວໜ້າທາງດ້ານເຕັກໂນໂລຊີ, ການສື່ສານ ແລະ ຂໍ້ມູນຂ່າວສານ ໃຫ້ວ່ອງໄວທັນກັບຍຸກສະໄໝ. ມາຮອດປັດຈຸບັນ, ສື່ມວນຊົນລາວເຮົາມີຄວາມສາມາດໃນການເຂົ້າສູ່ເຄື່ອງມື ຫລື ເຕັກໂນໂລຊີ ໃນການຜະລິດ ແລະ ສົ່ງຂໍ້ມູນຂ່າວສານທີ່ທັນສະໄໝ, ໂດຍນໍາໃຊ້ທຸກເວທີ, ທຸກຊ່ອງທາງທີ່ມີຢູ່ໃນລະບົບອິນເຕີເນັດ
ເປັນຕົ້ນແມ່ນລະບົບສື່ອອນລາຍທຸກປະເພດ ໃນການກະຈາຍຂໍ້ມູນຂ່າວສານຢ່າງຖືກຕ້ອງ ແລະ ວ່ອງໄວທັນການ. ນອກຈາກການເຜີຍແຜ່ຂໍ້ມູນຂ່າວສານຜ່ານທາງໜັງສືພິມ, ວິທະຍຸ ແລະ ໂທລະພາບ ທີ່ເປັນສື່ດັ່ງເດີມແລ້ວ ສື່ມວນຊົນພວກເຮົາ ຍັງໄດ້ເຜີຍແຜ່ທາງອອນລາຍ ຫລື ເວົ້າໄດ້ວ່າສື່ມວນຊົນລາວເຮົາ ສາມາມາດກະຈາຍຂໍ້ມູນຂ່າວສານ ໃຫ້ສັງຄົມໄດ້ຮັບຊາບດ້ວຍຫລາຍຊ່ອງທາງທີ່ສຸດ ເປັນຕົ້ນແມ່ນເຫດການໄພພິບັດທີ່ເກີດຂຶ້ນ, ພະຍາດສັດ, ພະຍາດຄົນ ແລະ ເຫດການອື່ນທີ່ເກີດຂຶ້ນຕາມທ້ອງຖິ່ນຕ່າງໆ ເຊິ່ງສື່ມວນຊົນລາວ ເຮົາກໍໄດ້ມີຄວາມພະຍາຍາມໃນການປະຕິບັດໜ້າທີ່ຂອງຕົນເອງ ເຮັດໃຫ້ບັນຫາດັ່ງກ່າວ, ໄດ້ຮັບການລາຍງານໃຫ້ໄປຮອດໄປເຖິງເປົ້າໝາຍ ໂດຍສະເພາະແມ່ນປະຊາຊົນ ເພື່ອໃຫ້ມີສະຕິ,ໄດ້ຮັບຊາບ ແລະ ມີຄວາມລະ ມັດລະວັງຕໍ່ບັນຫາຕ່າງໆ.
ເພື່ອຍາດໄດ້ຜົນງານໃໝ່ໃຫຍ່ຫລວງກວ່າເກົ່າ, ໃນຕໍ່ໜ້າວຽກງານຖະແຫລງຂ່າວສື່ມວນຊົນ ແລະ ການພິມຈຳໜ່າຍ ຈະຕ້ອງສືບຕໍ່ສູ້ຊົນຮັກສາ ແລະ ພັດທະນາຕົນເອງໃຫ້ມີຄຸນນະພາບ, ທັນສະໄໝ, ວ່ອງໄວທັນການ, ເປັນກະບອກສຽງອັນແຫລມຄົມ ຂອງພັກ-ລັດ, ເປັນເວທີຂອງ ມະຫາຊົນ ແລະ ເຊື່ອມໂຍງກັບສາກົນ; ສ້າງບຸກຄະລາກອນໃຫ້ເຊື່ອມຊຶມເລິກເຊິ່ງແນວທາງ ແລະ ອຸດົມການສັງຄົມນິຍົມຂອງພັກ, ມີແນວຄິດທັດສະນະການເມືອງທີ່ຖືກຕ້ອງ, ມີຄວາມຮູ້ດ້ານວິຊາການໃນລະດັບທີ່ ແນ່ນອນທັນກັບຍຸກສະໄໝ, ມີຈັນຍາບັນໃນອາຊີບທີ່ເຄັ່ງຄັດປະຕິບັດຖືກຕ້ອງຕາມລະບຽບ-ກົດໝາຍ.
                                                             ນ້ຳໃຈ ວັນສື່ມວນຊົນ ແລະ ການພິມຈຳໜ່າຍ ໝັ້ນຍືນ !