ວາງສີລາລຶກໂຄງການພັດທະນາສວນວັດທະນະທຳລ້ານຊ້າງ

ຂປລ. ໃນວັນທີ 9 ສິງຫາ 2019, ບໍລິສັດ ພັດທະນາສວນວັດທະນະທໍາລ້ານຊ້າງ ໄດ້ຈັດພິທີວາງສີລາລຶກໂຄງການພັດທະນາສວນວັດທະນະທໍາລ້ານຊ້າງ ທີ່ບ້ານດົງສ້າງຫີນ ເມືອງໄຊທານີ ນະຄອນຫລວງວຽງຈັນ, ເພື່ອໃຫ້ກາຍເປັນບ່ອນທ່ອງທ່ຽວທາງດ້ານວັດທະນະທໍາ ແລະ ທໍາມະຊາດ ທີ່ສາມາດດຶງດູດເອົານັກທ່ອງທ່ຽວທັງພາຍໃນ ແລະ ຕ່າງປະເທດ ເຂົ້າມາທ່ອງທ່ຽວໃນ ສປປ ລາວ ໂດຍສະເພາະແມ່ນນະຄອນຫລວງວຽງຈັນ, ໃຫ້ນັບມື້ນັບຫລາຍຂຶ້ນຢ່າງເປັນຮູບປະທໍາ.

ໃຫ້ກຽດເຂົ້າຮ່ວມພິທີດັ່ງກ່າວ, ໂດຍທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ແຫ່ງ ສປປ ລາວ, ທ່ານ ບໍ່ແສງຄຳ ວົງດາລາ ລັດຖະມົນຕີ ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ, ພ້ອມດ້ວຍ ພາກສ່ວນທີ່ກ່ຽວຂ້ອງ ເຂົ້າຮ່ວມ.
ໃນໂອກາດດັ່ງກ່າວ, ທ່ານ ຄອນຄຳ ອິນທະວົງ ປະທານບໍລິສັດພັດທະນາສວນວັດທະນະທຳລ້ານຊ້າງ ແຈ້ງໃຫ້ຮູ້ວ່າ: ໂຄງການພັດທະນາສວນວັດທະນະທໍາລ້ານຊ້າງ ມີເນື້ອທີ່ທັງໝົດ 88 ເຮັກຕາ, ໂດຍມີການລົງທຶນເບື້ອງຕົ້ນ 80 ລ້ານໂດລາສະຫະລັດ, ຄາດວ່າຈະໃຊ້ເວລາໃນການກໍ່ສ້າງທັງໝົດ 9 ປີ ໂດຍແບ່ງອອກເປັນ 3 ໄລຍະການກໍ່ສ້າງ, ປະກອບດ້ວຍຫລາກຫລາຍກິດຈະກຳເປັນຕົ້ນ ເຂດສວນສະໜຸກ, ສວນນ້ຳ ແລະ ສວນວັດທະນະທຳ, ເຂດສວນພຶກສາຊາດ ແລະ ສວນສັດ, ເຂດສູນການຄ້າ ແລະ ໂຮງແຮມ, ເຂດບ້ານຈັດສັນ ແລະ ພື້ນຖານໂຄງລ່າງ, ສິ່ງອຳນວຍຄວາມສະດວກຕ່າງໆໃນໂຄງການ.
ທ່ານ ຄອນຄຳ ອິນທະວົງ ກ່າວຕື່ມວ່າ: ໂຄງດັ່ງກ່າວ, ເປັນແນວຄວາມຄິດຂອງນັກພັດທະນາທັງພາກລັດ ແລະ ນັກທຸລະກິດ ໂດຍສະເພາະກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ຮ່ວມກັບບໍລິສັດ ໂອເຊຍໂນ ຈຳກັດ ທີ່ໄດ້ມີຄວາມພະຍາຍາມຢາກຈະພັດທະນາສະຖານທີ່ແຫ່ງນີ້ໃຫ້ກາຍເປັນແຫລ່ງທ່ອງທ່ຽວທາງດ້ານວັດທະນະທຳ,ທຳມະຊາດແບບຍືນຍົງທີ່ສອດຄ່ອງກັບແຜນພັດທະນາເສດຖະກິດ-ສັງຄົມແຫ່ງຊາດ, ຍຸດທະສາດການເຕີບໂຕສີຂຽວແຫ່ງຊາດ ແລະ ກົດໝາຍວ່າດ້ວຍການສົ່ງເສີມການລົງທຶນຂອງສປປລາວ. ໂຄງການພັດທະນາສວນວັດທະນະທຳລ້ານຊ້າງເປັນໂຄງການຮ່ວມທຶນລະຫວ່າງບໍລິສັດພາຍໃນ ແລະ ຕ່າງປະເທດທີ່ມີປະສົບການດ້ານການທ່ອງທ່ຽວ, ການກໍ່ສ້າງໃນອະນຸພາກພື້ນ, ປັດຈຸບັນທາງບໍລິສັດໄດ້ມີຄວາມພ້ອມທາງດ້ານທຶນຮອນ, ອຸປະກອນກົນຈັກ, ເຄື່ອງມືຮັບໃຊ້ ແລະ ເຕັກນິກວິຊາການຕ່າງໆເຂົ້າໃນໂຄງການ. ສຳລັບແຜນການກໍ່ສ້າງເບື້ອງຕົ້ນທາງບໍລິສັດຈະເລີ່ມລົງມືກໍ່ສ້າງເຂດສວນສະໜຸກ, ສວນນ້ຳ, ໂຮງແຮມກ່ອນກຳນົດເວລາ 3 ປີ ໃຫ້ສຳເລັດພ້ອມເປີດໃຫ້ບໍລິການ, ຫລັງຈາກນັ້ນແມ່ນຈະສືບຕໍ່ກໍ່ສ້າງບັນດາກິດຈະການຕ່າງໆ ຕາມບົດວິພາກ ແລະ ສັນຍາ ທີ່ໄດ້ເຊັນໄວ້ກັບລັດຖະບານ.