ສື່ມວນຊົນລາວ ຮັບໃຊ້ພາລະກິດປັກປັກຮັກສາ ແລະ ພັດທະນາປະເທດຊາດ

ຂປລ. ໃນວັນທີ 8 ສິງຫາ 2019ທີ່ນະຄອນຫລວງວຽງຈັນ, ທ່ານ ສະຫວັນຄອນ ລາຊະມົນຕີ ຮອງລັດຖະມົນຕີກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ໄດ້ໃຫ້ສຳພາດຕໍ່ສື່ມວນຊົນເນື່ອງໃນໂອກາດສະຫລອງວັນສື່ມວນຊົນ ແລະ ການພິມຈຳໜ່າຍຄົບຮອບ 69 ປີ (13 ສິງຫາ 1950-13 ສິງຫາ 2019) ເຊິ່ງທ່ານໄດ້ກ່າວວ່າ:

ສື່ມວນຊົນລາວໄດ້ມີບົດບາດ ແລະ ໜ້າທີ່ ທີ່ສຳຄັນທີ່ສຸດໃນການຮັບໃຊ້ພາລະກິດປົກປັກຮັກສາ ແລະພັດທະນາປະເທດຊາດຕາມແນວທາງຂອງພັກ, ຕາມແຜນພັດທະນາເສດຖະກິດ-ສັງຄົມແຫ່ງຊາດ.ທ່ານຮອງລັດຖະມົນຕີກ່າວຕື່ມວ່າ: ໃນຕະຫລອດຊຸມປີຜ່ານມາ ສື່ມວນຊົນລາວໄດ້ເພີ່ມທະວີຄວາມຮັບຜິດຊອບໃນການເຄື່ອນໄຫວປະຕິບັດໜ້າທີ່ຂອງຕົນ ເຊິ່ງໜ້າທີ່ຂອງສື່ມວນຊົນຕ້ອງສະໜອງຂ່າວທີ່ວ່ອງໄວ, ຖືກຕ້ອງ, ຈະແຈ້ງ ແລະຮັບປະກັນໃຫ້ຜູ້ບໍລິໂພກຂໍ້ມູນຂ່າວສານໄດ້ຮັບຂ້ໍມູນທ່ີຖືກຕ້ອງ ແລະທັນເວລາກັບຄວາມເປັນຈິງ. ການນຳສະເໜີຂ່າວ ຫລື ສະໜອງຂໍ້ມູນຂ່າວສານສື່ມວນຊົນຕ້ອງມີຄວາມຮັບຜິດຊອບສູງຕໍ່ສັງຄົມຮັບປະກັນໃຫ້ຜູ້ບໍລິໂພກຂໍ້ມູມມີຂ່າວສານມີຄວາມເຂົ້າໃຈຢ່າງຖືກຕ້ອງກ່ຽວກັບເຫດການ, ບັນຫາທີ່ເກີດຂຶ້ນໃນສັງຄົມບໍ່ວ່າຈະເປັນຢູ່ໃນປະເທດເຮົາ ຫລື ຢູ່ໃນໂລກກໍ່ເຊັ່ນດຽວກັນ.ສື່ມວນຊົນເປັນອາວຸດທີ່ແຫລມຄົມ ຂອງພັກ-ລັດຖະບານໃນທຸກຍຸກສະໄໝຮັບໃຊ້ສັງຄົມເປັນພື້ນຖານຄວາມຍືນຍົງ ແລະ ເປັນກຳລັງກະຕຸກຊຸກຍູ້ໃຫ້ທົ່ວສັງຄົມຂະຫຍາຍຕົວເພື່ອການພັດທະນາທີ່ຕໍ່ເນື່ອງແທດເໝາະກັບສະພາບພາກພື້ນແລະ ສາກົນ, ສື່ມວນຊົນລາວ ແລະ ການພິມຈຳໜ່າຍຂອງລາວເຮົາໄດ້ມີການເຕີບໃຫຍ່ເຂ້ັມແຂງທັງປະລິມານ ແລະ ຄຸນະພາບຢ່າງຕໍ່ເນື່ອງຄຽງຄູ່ກັບການຂະຫຍາຍຕົວທາງດ້ານເສດຖະກິດ-ສັງຄົມ.