ສະຫລອງ ວັນສ້າງຕັ້ງອາຊຽນ ແລະ ສປປ ລາວເຂົ້າເປັນສະມາຊິກອາຊຽນ

ຂປລ. ອາຊຽນ, ໃນປັດຈຸບັນ ເປັນໜຶ່ງໃນອົງການຈັດຕັ້ງພາກພື້ນ ທີ່ປະສົບຜົນສຳເລັດທີ່ສຸດໃນໂລກ ເຊິ່ງມີການເປີດກວ້າງສູ່ພາຍນອກ ແລະ ມີບົດບາດສຳຄັນ ໃນໂຄງສ້າງພາກພື້ນ ທີ່ເປີດກວ້າງ ແລະ ກວມລວມ ໂດຍມີອາຊຽນເປັນໃຈກາງ. ສປປ ລາວ ມີຄວາມພາກພູມໃຈ ທີ່ເປັນສ່ວນໜຶ່ງໃນຄອບຄົວອາຊຽນ ແລະ ສະແດງຄວາມຂອບໃຈ ຕໍ່ການຊ່ວຍເຫລືອ, ສະໜັບສະໜູນ ແລະ ຮ່ວມມື ຂອງບັນດາປະເທດສະມາຊິກອາຊຽນ ແລະ ປະເທດຄູ່ເຈລະຈາ ກໍຄືຄູ່ຮ່ວມມືພາຍນອກອາຊຽນ ທີ່ໄດ້ເຮັດໃຫ້ ສປປ ລາວ ສາມາປະຕິບັດ ຄວາມໝາຍໝັ້ນຂອງຕົນ ໃນຖານະປະເທດສະມາຊິກ ຕະຫລອດໄລຍະ 2 ທົດສະວັດຜ່ານມາ ໄດ້ຢ່າງເຕັມສ່ວນ, ມີປະສິດທິພາບສູງ ແລະ ນຳເອົາປະໂຫຍດສູງສຸດມາສູ່ ສປປ ລາວ.

ທ່ານ ສະເຫລີມໄຊ ກົມມະສິດ ລັດຖະມົນຕີກະຊວງການຕ່າງປະເທດ ກ່າວໃນວັນທີ 6 ສິງຫາ 2019 ທີ່ກະຊວງການຕ່າງປະເທດ ນະຄອນຫລວງວຽງຈັນ, ໃນພິທີເອົາທຸງຊາດລາວ ແລະ ທຸງອາຊຽນຂຶ້ນສູ່ຍອດເສົາ ເນື່ອງໃນໂອກາດ ສະເຫລີມ ສະຫລອງ ຄົບຮອບ 52 ປີ ແຫ່ງການສ້າງຕັ້ງອາຊຽນ (8/8/ 1967-8/8/2019) ແລະ ຄົບຮອບ 22 ປີ (23/7/1997-23/7/2019) ສປປ ລາວ ເຂົ້າເປັນສະມາຊິກອາຊຽນ. ທ່ານ ສະເຫລີມໄຊ ກົມມະສິດ ຍັງໄດ້ຢ້ຳເຖິງຜົນສຳເລັດ ຂອງອາຊຽນໃນໄລຍະ 52 ປີ ຜ່ານມາ ໂດຍສະເພາະໃນປີ 2015 ໄດ້ປະກາດສ້າງຕັ້ງປະຊາຄົມອາຊຽນ ເຊິ່ງປະກອບດ້ວຍສາມເສົາຄ້ຳຄື: ການເມືອງ-ຄວາມໝັ້ນຄົງ, ເສດຖະກິດ ແລະ ສັງຄົມ-ວັດທະນະທຳ ອັນໄດ້ປະກອບສ່ວນສຳຄັນ ເຂົ້າໃນການສ້າງ ສັນຕິພາບ, ສະຖຽນລະພາບ ແລະ ຄວາມວັດທະນາຖາວອນ ໃນພາກພື້ນ ແລະ ໃນໂລກ.
ຜົນສຳເລັດອີກອັນໜຶ່ງ ແມ່ນອາຊຽນໃນນາມ ເປັນອົງການຈັດຕັ້ງພາກພື້ນ ລະຫວ່າງລັດຖະບານ ໄດ້ສືບຕໍ່ ຮັດແໜ້ນການພົວພັນຮ່ວມມື ລະຫວ່າງ ປະເທດສະມາຊິກອາຊຽນດ້ວຍກັນ ກໍຄືການຮ່ວມມືພາຍນອກ ບົນພື້ນຖານຫລັກການ ທີ່ກຳນົດໄວ້ ໃນກົດບັດອາຊຽນ, ສົນທິສັນຍາໄມຕີຈິດ ແລະ ການຮ່ວມມື ນັບທັງບັນດາກົນໄກ ທີ່ອາຊຽນເປັນຜູ້ສ້າງຂຶ້ນເຊັ່ນ: ຫລັກການແຫ່ງການຢູ່ຮ່ວມກັນໂດຍສັນຕິ, ເຄົາລົບເອກະ ລາດ, ອະທິປະໄຕ, ຜືນແຜ່ນດິນອັນຄົບຖ້ວນ, ການບໍ່ແຊກແຊງເຂົ້າ ໃນວຽກງານ ພາຍໃນຂອງກັນ ແລະ ກັນ, ແກ້ໄຂບັນຫາໂດຍສັນຕິວິທີ, ຫລັກການຄວາມເປັນເອກະສັນ ແລະ ຕ່າງຝ່າຍຕ່າງມີຜົນປະໂຫຍດ ທັງອີງໃສ່ຄວາມຫລາກຫລາຍ ຂອງປະເທດສະມາຊິກທີ່ເອີ້ນວ່າ ວິທີທາງການຂອງອາຊຽນ.
ທ່ານ ລັດຖະມົນຕີກະຊວງການຕ່າງປະເທດ ຍັງໄດ້ແຈ້ງຜົນສຳເລັດ ຂອງກອງປະຊຸມລັດຖະມົນຕີຕ່າງປະເທດອາຊຽນ ຄັ້ງທີ 52 ໃນອາທິດຜ່ານມາ ທີ່ຈັດຂຶ້ນຢູ່ບາງກອກ ປະເທດໄທ ພາຍໃຕ້ຄຳຂວັນ “ຮ່ວມແຮງຮ່ວມໃຈ ກ້າວໄກຍືນຍົງ”, ເຊິ່ງເຫັນໄດ້ ໃນໄລຍະໜຶ່ງປີຜ່ານມາ ການຈັດຕັ້ງປະຕິບັດ ບັນດາຂໍ້ລິເລີ່ມ, ມາດຕະການ ແລະ ກິດຈະກຳຮ່ວມມືໃນຂະແໜງຕ່າງໆທັງ 3 ເສົາຄ້ຳ ແມ່ນໄດ້ຮັບຜົນສຳເລັດ ຫລາຍປະການ. ນອກຈາກນີ້, ຕະຫລອດໄລຍະ 22 ປີທີ່ ສປປ ລາວໄດ້ເຂົ້າເປັນ ສະມາຊິກອາຊຽນ, ສປປ ລາວ ໄດ້ເຂົ້າຮ່ວມຢ່າງຕັ້ງໜ້າ ໃນຂະບວນການລວມຂອງອາຊຽນ ອັນໄດ້ເຮັດໃຫ້ບົດບາດ ຂອງ ສປປ ລາວ ນັບມື້ພົ້ນເດັ່ນຂຶ້ນໃນພາກພື້ນ ແລະ ສາກົນ. ພ້ອມກັນນີ້, ເຂດການຄ້າເສລີ ແລະ ການລົງທຶນອາຊຽນ ແລະ ອາຊຽນກັບບັນດາຄູ່ເຈລະຈາ ໄດ້ປະກອບສ່ວນອັນສຳຄັນ ໃນການເຮັດໃຫ້ການຄ້າ ແລະ ການລົງທຶນ ຢູ່ປະເທດເຮົາຂະຫຍາຍຕົວ ໃນຈັງຫວະສູງຂຶ້ນຢ່າງຕໍ່ເນື່ອງ.