ການອອກໃບຕາດິນຊ້ຳຊ້ອນ ເກີດຈາກຫຼາຍສາເຫດ

 

 

 

ບັນຫາການອອກໃບຕາດິນຊໍ້າຊ້ອນ ເກີດຂຶ້ນຫຼາຍແຂວງ, ປັດໄຈຫຼັກມາຈາກ 8 ສາເຫດ, ການຄຸ້ມຄອງທີ່ດິນຜ່ານມາຍັງປະກົດມີຂໍ້ຂັດແຍ້ງທີ່ດິນປະເພດຕ່າງໆເກີດຂຶ້ນໃນຫຼາຍກໍລະນີ ຊຶ່ງບັນຫາທີ່ເກີດຂຶ້ນນັ້ນ ໄດ້ສົ່ງຜົນສະທ້ອນດ້ານລົບຕໍ່ການຄຸ້ມຄອງລັດ, ຄຸ້ມຄອງສັງຄົມ ຊຶ່ງຈະຕ້ອງມີມາດຕະການແກ້ໄຂໃນຕໍ່ໜ້າ, ຂະນະທີ່ ສສຊ ສະເໜີໃຫ້ໃຊ້ມາດຕະການຂັ້ນເດັດຂາດຕໍ່ພະນັກງານທີ່ພົວພັນເຖິງການອອກໃບຕາດິນຊ້ຳຊ້ອນ.

ກອງປະຊຸມສະໄໝສາມັນເທື່ອທີ 7 ຂອງສະພາແຫ່ງຊາດ ຊຸດທີ VIII ໃນວັນທີ 10 ມິຖຸນານີ້ ພາຍໃຕ້ການເປັນປະທານຂອງທ່ານ ບຸນປອນ ບຸດຕະນະວົງ ຮອງປະທານສະພາແຫ່ງຊາດ, ທ່ານ ສົມມາດ ພົນເສນາ ລັດຖະມົນຕີກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ (ກຊສ) ໄດ້ລາຍງານກ່ຽວກັບການຄຸ້ມຄອງການອອກໃບຕາດິນ, ບັນຫາການອອກໃບຕາດິນຊໍ້າຊ້ອນໃນໄລຍະຜ່ານມາ ແລະ ມາດຕະການແກ້ໄຂໃນຕໍ່ໜ້າ ໃຫ້ຮູ້ວ່າ: ການຄຸ້ມຄອງທີ່ດິນໃນ ສປປ ລາວ ນັບແຕ່ປີ 2011 - 2019 ໂດຍ ກຊສ ອອກໃບຕາດິນໄດ້ 641.686 ຕອນ, ໃນນັ້ນແຕ່ປີ 2011 - 2015 ອອກໃບຕາດິນໄດ້ 286.953 ຕອນ ແລະ ປີ 2016 - 2019 ອອກໃບຕາດິນໄດ້ 354.733ຕອນ ສົມທຽບກັບແຜນການ 5 ປີ ຕາມການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ X ຂອງພັກ ກໍຄືແຜນພັດທະນາເສດຖະກິດ - ສັງຄົມແຫ່ງຊາດ 5 ປີ ຄັ້ງທີ VIII (2016 - 2020) ທີ່ສະພາແຫ່ງຊາດ ໄດ້ວາງຄາດໝາຍໃຫ້ບັນລຸ 460.000 ຕອນ ແມ່ນປະຕິບັດໄດ້ 77,1%. ສະນັ້ນ, ແຕ່ນີ້ຮອດປີ 2020 ຄາດຄະເນຈະສາມາດອອກໃບຕາດິນສໍາເລັດຕາມຕາມແຜນການ.
ໃນຂະນະທີ່ບັນຫາການອອກໃບຕາດິນຊໍ້າຊ້ອນ ປະກົດວ່າເກີດຂຶ້ນຢູ່ຫຼາຍແຂວງ ເປັນ ຕົ້ນແມ່ນ ຢູ່ແຂວງສະຫວັນນະເຂດ 44 ກໍລະນີ, ນະຄອນຫຼວງວຽງຈັນ 17 ກໍລະນີ, ແຂວງຈໍາປາສັກ 15 ກໍລະນີ, ແຂວງໄຊຍະບູລີ 10 ກໍລະນີ ແລະ ຍັງມີແຂວງອື່ນໆອີກຈໍານວນໜຶ່ງ ຊຶ່ງສາເຫດທີ່ມີໃບຕາດິນຊໍ້າຊ້ອນ ກຊສ ໄດ້ສະຫຼຸບຕີລາຄາໄດ້ 8 ສາເຫດຄື: ການແຈ້ງເທັດວ່າໃບຕາດິນເສຍ; ໃບແຈ້ງເສຍພາສີທີ່ດິນ ແລະ ໃບຕາດິນຊໍ້າຊ້ອນກັນ; ໃບແຜນທີ່ດິນ ແລະ ໃບຕາດິນຊໍ້າຊ້ອນກັນ; ໃບແຜນທີ່ດິນຊໍ້າຊ້ອນກັນ; ໃບແຈ້ງເສຍພາສີທີ່ດິນຊໍ້າຊ້ອນກັນ; ໃບຕາດິນລັດ ແລະ ໃບຕາດິນບຸກຄົນຊໍ້າຊ້ອນກັນ; ລູກລັກເອົາໃບຕາດິນອອກຊື່ຂອງພໍ່ແມ່ປ່ຽນເປັນຊື່ຕົນ ແລະ ກໍລະນີຂັດແຍ່ງທີ່ດິນພາຍຫຼັງສານຕັດສິນໃຫ້ລຶບລ້າງໃບຕາດິນ.
ກ່ຽວກັບຂໍ້ຂັດແຍ່ງທີ່ດິນປະເພດຕ່າງໆ ໃນຂອບເຂດທົ່ວປະເທດ ໂດຍການສັງລວມຂອງ ກຊສ ເຫັນວ່າມີຫຼາຍກໍລະນີ ແລະ ເປັນໂຕເລກທີ່ສູງພໍສົມຄວນ ຊຶ່ງລວມມີຫຼາຍປະເພດຄື: 1). ສານຕັດສິນແລ້ວ ແຕ່ປະຕິບັດບໍ່ໄດ້ ມີ 109 ກໍລະນີ, ແຕ່ກໍສາມາດແກ້ໄຂແລ້ວ 17 ກໍລະນີ; 2). ສິນສົມສ້າງ ມີ 414 ກໍລະນີ, ແກ້ໄຂແລ້ວ 125 ກໍລະນີ; 3). ມູນມໍລະດົກ ມີ 440 ກໍລະນີ, ແກ້ໄຂແລ້ວ 165 ກໍລະນີ; 4). ເຂດແດນ ມີ 690 ກໍລະນີ, ແກ້ໄຂແລ້ວ 385 ກໍລະນີ; 5). ທາງຜ່ານ ມີ 67 ກໍລະນີ, ແກ້ໄຂແລ້ວ 23 ກໍລະນີ; ຊົດເຊີຍທີ່ດິນ ມີ 953 ກໍລະນີ, ແກ້ໄຂແລ້ວ 92 ກໍລະນີ; ສິດນໍາໃຊ້ທີ່ດິນ 270 ກໍລະນີ, ແກ້ໄຂແລ້ວ 72 ກໍລະນີ; ຊື້ - ຂາຍ ມີ 531 ກໍລະນີ, ແກ້ໄຂແລ້ວ 242 ກໍລະນີ; ເຊົ່າ - ສໍາປະທານ ມີ 23 ກໍລະນີ, ແກ້ໄຂແລ້ວ 5 ກໍລະນີ; ສານຕັດສິນຢຶດເປັນດິນລັດ ມີ 33 ກໍລະນີ, ແກ້ໄຂແລ້ວ 8 ກໍລະນີ; ຄໍ້າປະກັນກູ້ຢືມເງິນ 2.874 ກໍລະນີ, ແກ້ໄຂແລ້ວ 920 ກໍລະນີ ແລະ ປະເພດຂໍ້ຂັດແຍ່ງທີ່ເກີດຂຶ້ນຍ້ອນໃບຕາດິນຊໍ້າຊ້ອນ ມີ 15 ກໍລະນີ. ບັນດາບັນຫາທີ່ເກີດຂຶ້ນນັ້ນ ໄດ້ເຮັດໃຫ້ເກີດມີປະກົດການຫຍໍ້ທໍ້ໃນການຄຸ້ມຄອງລັດ, ຄຸ້ມຄອງສັງຄົມດ້ວຍກົດໝາຍ ແລະ ຄວາມສະຫງົບຂອງສັງຄົມ ສ້າງຜົນກະທົບດ້ານລົບໃຫ້ແກ່ລັດ, ສັງຄົມ.
ຕໍ່ກັບບັນດາບັນຫາດັ່ງກ່າວ, ທ່ານ ບຸນປອນ ສີສຸລາດ ປະທານກໍາມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ ໄດ້ປະກອບຄຳເຫັນ ວ່າ: ສຳລັບການອອກໃບຕາດິນຊໍ້າຊ້ອນ ມີຫຼາຍສາເຫດ ແຕ່ອັນຫຼັກແມ່ນມາຈາກພະນັກງານ-ລັດຖະກອນ ຈໍານວນໜຶ່ງ ທີ່ມີສ່ວນກ່ຽວຂ້ອງ ກັບການອອກໃບຕາດິນ ຍັງຖືເບົາຈັນຍາບັນ - ຈັນຍາທໍາ ບໍ່ເຂັ້ມງວດໃນການຈັດຕັ້ງປະຕິບັດກົດໝາຍ ແລະ ນິຕິກຳລຸ່ມກົດໝາຍທີ່ວາງອອກ. ພ້ອມທັງສະເໜີແກ້ໄຂບັນຫາດັ່ງກ່າວ ເປັນຕົ້ນແມ່ນ ຕ້ອງຮີບຮ້ອນຄົ້ນຄວ້າ ແກ້ໄຂບັນຫາການອອກໃບຕາດິນຊໍ້າຊ້ອນ ໃຫ້ເປັນຮູບປະທໍາຫຼາຍຂຶ້ນ ເພື່ອສ້າງຄວາມເຊື່ອໝັ້ນ ແລະ ຄວາມຍຸຕິທຳໃນການຄຸ້ມຄອງທີ່ດິນ ຂອງລັດຖະບານ ໃຫ້ໄປຕາມກົດໝາຍ ແລະ ລະ ບຽບການຕ່າງໆ, ເຂັ້ມງວດປະ ຕິບັດຕາມແຜນແມ່ບົດຈັດສັນທີ່ດິນແຫ່ງຊາດ, ກົດໝາຍວ່າດ້ວຍທີ່ດິນ ແລະ ນິຕິກຳອື່ນໆທີ່ກ່ຽວຂ້ອງ ເພື່ອເຮັດໃຫ້ວຽກງານດັ່ງກ່າວມີຄວາມໂປ່ງໃສ ແລະ ສາມາດກວດສອບໄດ້.
ທ່ານ ສາຍທອງ ແກ້ວດວງດີ ສສຊ ເຂດ 1 ນະຄອນຫຼວງວຽງຈັນ ປະທານກຳມາທິການກົດໝາຍ ສະພາແຫ່ງຊາດ ປະກອບຄຳເຫັນວ່າ: ຄວນມີມາດຕະການຂັ້ນເດັດຂາດຕໍ່ພະນັກງານທີ່ພົວພັນເຖິງການອອກໃບຕາດິນຊ້ຳຊ້ອນ.
ໃນຂະນະທີ່ ທ່ານ ນາງບົວພັນ ລີໄກຢາ ສສຊ ເຂດ 7 ແຂວງໄຊຍະບູລີ ກ່າວວ່າ: ຄວນສຶກສາອົບຮົມທັດສະນະທ່າທີຂອງພະນັກງານໃນການອອກໃບຕາດິນ ຮັບໃຊ້ປະຊາຊົນຢ່າງແທ້ຈິງ.