ກອງປະຊຸມອະລິຍະທຳອາຊີ ເນັ້ນການແລກປ່ຽນ ແລະ ແບ່ງປັນ

 

 

 

ຂປລ. ກອງປະຊຸມປຶກສາຫາລືອະລິຍະທໍາອາຊີ ໄດ້ໄຂຂຶ້ນຢ່າງເປັນທາງການໃນຕອນເຊ້ົາຂອງວັນທີ15 ພຶດສະພາ 2019 ທີ່ຫໍປະຊຸມແຫ່ງຊາດ, ນະຄອນຫລວງປັກກິ່ງ ສປ ຈີນ, ໂດຍໃຫ້ກຽດເຂົ້າຮ່ວມພິທີເປີດຂອງທ່ານ ສີ ຈິ້ນຜີງ ປະທານປະເທດ ແຫ່ງ ສປ ຈີນ, ສະເພາະຄະນະຜູ້ແທນລາວນໍາໂດຍທ່ານ ບໍ່ແສງຄໍາ ວົງດາລາ ລັດຖະມົນຕີກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ ພ້ອມບັນດາປະມຸກລັດ ແລະ ຄະນະຜູ້ແທນຈາກອາຊີ 47 ປະເທດ, ອົງການຈາດພາກລັດ-ສາກົນ ແລະ ປະເທດອື່ນໆ ກ່ຽວຂ້ອງເຂົ້າຮ່ວມປະມານ 2.000 ຄົນ.

ກອງປະຊຸມພາຍໃຕ້ຫົວຂໍ້ແລກປ່ຽນອະລິຍະທໍາຮ່ວມກັນ ແລະ ແບ່ງປັນຊຸມຊົນແຫ່ງອະນາຄົດນີ້,ຜູ້ເຂົ້າຮ່ວມໄດ້ປຶກສາຫາລື ແລະແລກປ່ຽນຄວາມຄິດຄວາມເຫັນ ແລະ ແບ່ງປັນປະສົບການສີສັນແຫ່ງອະລິຍະທໍາ, ຂະນົບທໍານຽມຮີດຄອງປະເພນີ, ວັດທະນະທໍາ,
ການສຶກສາ,ທ່ອງທ່ຽວ ແລະ ອື່ນໆ.ທ່ານ ສີ ຈິ້ນ ຜີງ ປະທານປະເທດແຫ່ງ ສປ ຈີນ ກ່າວເປີດກອງປະຊຸມວ່າ: ນອກເໜືອຈາກຄວາມເຂັ້ມແຂງທາງເສດຖະກິດ ແລະ ເຕັກໂນໂລຊີ,ພ້ອມກັບສິ່ງທ້າທາຍ ແລະ ປະຕິບັດເຈຕະນາລົມອະນາຄົດອັນສົດໃສແລ້ວ, ມະນຸດເຮົາຈໍາເປັນຕ້ອງການຄວາມເຂັ້ມແຂງດ້ານວັດທະນະທໍາເພື່ອຄວບຄຸມສິ່ງທ້າທາຍໃນຕໍ່ໜ້າ.ຄວາມທ້າທາຍທີ່ເພີ່ມທະວີຄວາມຮຸນແຮງຂຶ້ນທົ່ວໂລກທີ່ມະນຸດພວມຜະເຊີນຢູ່ໃນປັດຈຸບັນຕ້ອງການຄວາມຮ່ວມມືທີ່ເປັນຮູບປະທໍາໃນທົ່ວໂລກ ແລະ ອະລິຍະທໍາອາຊີແມ່ນສິ່ງຍອດຍິ່ງໃນອະລິຍະທໍາຂອງມະນຸດ ເຊິ່ງໄດ້ກາຍເປັນໜຶ່ງຫລື ຫລັກຖານໃນການຕັ້ງຖິ່ນຖານຂອງມະນຸດທີ່ເກົ່າແກ່ທີ່ສຸດ ແລະ ເປັນແຫລ່ງກໍາເນີດທີ່ສໍາຄັນຂອງອະລິຍະທໍາມະນຸດອາຊີໂດຍໜຶ່ງສ່ວນສາມຂອງພື້ນທ່ີທັງໝົດທົ່ວໂລກ ແລະ ມີປະຊາກອນສອງສ່ວນສາມຂອງປະຊາກອນປະກອບມີ 47 ປະເທດ ແລະ ມີຫລາຍກວ່າ 1.000 ຊົນເຜົ່າໄດ້ດໍາລົງຊີວິດຮ່ວມກັນມາແຕ່ບູຮານ. ໃນນັ້ນຄົນອາຊີໄດ້ມີຜົນງານອັນໂດດເດັ່ນ ແລະຜົນສໍາເລັດດ້ານວັດທະນະທໍາມາຫລາຍກວ່າພັນໆປີແລ້ວຢ່າງບໍ່ໜ້າເຊື່ອ ເຊິ່ງປັດຈຸບັນນີ້ພວກເຮົາຍັງໄດ້ສືບຕໍ່ເສີມຂະຫຍາຍ ແລະ ປະຕິບັດເຈຕະນາລົມຮ່ວມກັນເພື່ອແລກປ່ຽນຄວາມເຂົ້າອົກເຂົ້າໃຈ, ບົດຮຽນ ອັນຍອດຍິ່ງເຊິ່ງກັນ ແລະ ກັນ. ປະທານປະເທດແຫ່ງ ສປ ຈີນ ກ່າວຕື່ມວ່າ: ຄວາມມຸ່ງມາດປາຖະໜາສໍາລັບຊີວິດທີ່ດີກວ່າຂອງຄົນອາຊີຄວນກາຍເປັນຄວາມຈິງ ໂດຍເງ່ືອນໄຂທາງພູມສາດ ແລະ ວັດທະນະທໍາເຊື່ອມໂຍງກັນ, ມີປະຫວັດສາດຄ້າຍຄືກັນ ແລະ ຄວາມຝັນຄືກັນ. ດ້ວຍເຫດນັ້ນຈຶ່ງຈໍາເປັນຕ້ອງຮ່ວມມືກັນ ແລະ ຜ່ານຜ່າທຸກຄວາມພະຍາຍາມ ເພື່ອເຮັດໃຫ້ຊີວິດການເປັນຢູ່ຂອງປະຊາຊົນດີຂຶ້ນເປັນກ້າວໆ ແລະ ຫວັງວ່າທຸກໆປະເທດໃນອາຊີຈະເຄົາລົບ ແລະ ເຊື່ອໝັ້ນກັນ, ຢູ່ຮ່ວມ ກັນດ້ວຍຄວາມສາມັກຄີຮັກແພງ, ໄປມາສະດວກສະບາຍ, ແລກປ່ຽນອະລິຍະທໍາຮ່ວມກັນ, ມີສັນຕິພາບ, ຮ່ວມກັນສົ່ງເສີມໂລກາພິວັດດ້ານເສດຖະກິດມີລັກສະນະເປີດກວ້າງ, ສ້າງຄວາມເທົ່າທຽມກັນຕໍ່ທຸກຄົນ ແລະ ອື່ນໆ ເພື່ອພ້ອມກັນລົບລ້າງຄວາມທຸກຍາກ ແລະ ນໍາພາປະເທດຊາດກ້າວໄປສູ່ຄວາມຈະເລີນຮຸ່ງເຮືອງ ແລະຜາສຸກ. ຂະນະທີ່ຕອນບ່າຍມື້ດຽວກັນ, ທ່ານ ບ່ໍແສງຄໍາ ວົງດາລາ ລັດຖະມົນຕີກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວໄດ້ປະກອບຄໍາເຫັນໃນກອງປະຊຸມໂດຍກ່າວວ່າ: ດັ່ງທີ່ຮູ້ ນໍາກັນ, ວັດທະນະທໍາໄດ້ສະແດງບົດບາດສໍາຄັນປະກອບສ່ວນພັດທະນາເສດຖະກິດ-ສັງຄົມຂອງຊາດ. ການພັດທະນາຊຸມຊົນບໍ່ສາມາດປະສົບຜົນສໍາເລັດຖ້າທ່ານຖືເບົາ ຫລື ລະເລີຍວັດທະນະທໍາອັນຊົງຄຸນຄ່າຂອງຕົນ.ວັດທະນະທໍາແມ່ນພື້ນຖານສໍາຄັນສໍາລັບການສ້າງ ແລະ ຮັກສາສາຍພົວພັນມິດຕະພາບແບບຍືນຍົງ ເຊິ່ງມັນມີຄວາມໝາຍສໍາຄັນຫລາຍຕໍ່ການດໍາລົງຊີວິດປະຈໍາວັນ ແລະບໍ່ສາມາດຕັດແຍກອອກຈາກຊີວິດຂອງມະນຸດໄດ້. ປັດຈຸບັນເນື່ອງຈາກວັດທະນະທໍາໄດ້ຕິດພັນກັບໂອກາດການພັດທະນາເສດຖະກິດ-ສັງຄົມແບບຍືນຍົງຂອງປະເທດ, ລາວເປັນປະເທດໜຶ່ງໃນຫລາຍປະເທດທີ່ຕັ້ງຢູ່ແຫລມອິນດູຈີນ,ມີຊາຍແດນຕິດກັບ 5 ປະເທດ ຄື ສປຈີນ, ສສ ຫວຽດນາມ, ກໍາປູເຈຍ,ໄທ ແລະ ມຽນມາ) ແລະ ມີ 50ຊົນເຜົ່າທີ່ມີຫລາຍສີສັນທາງສິ ລະປະວັດທະນະທໍາ ແລະ ຮີດຄອງປະເພນີອັນດີງາມ, ເຕັມໄປດ້ວຍຄວາມອຸດົມສົມບູນດ້ານມໍລະດົກ ແລະປະຫວັດສາດອັນຍາວນານ.ນັບແຕ່ສ້າງຕັ້ງ ສປປ ລາວ ໃນປີ 1975,ພວກເຮົາໄດ້ຮັບຮູ້ ແລະ ເຂົ້າໃຈຄວາມຈິງຢ່າງໜັກແໜ້ນວ່າວັດທະນະທໍາແມ່ນຮາກເຫົ້ງາຂອງຊາດພວກເຮົາ,ຂະນະດຽວກັນກໍໄດ້ຮັບຮູ້ ແລະ ເຂົ້າໃຈວ່າແມ່ນທ່າແຮງແລະ ເປົ້າໝາຍສໍາຄັນໃນການຂັບເຄ່ືອນການພັດທະນາເສດຖະກິດ-ສັງຄົມຂອງຊາດ. ລັດຖະມົນຕີກະຊວງຖະແຫລງຂ່າວ,ວັດທະນະທໍາແລະ ທ່ອງທ່ຽວ ກ່າວຕື່ມວ່າ:ຈາກຄວາມສໍາຄັນດັ່ງກ່າວ, ລັດຖະບານລາວໄດ້ຖືເອົາວຽກວັດທະນະທໍາທີ່ເຄົາລົບເປັນຢ່າງສູງ, ກໍານົດນະໂຍບາຍ ແລະ ຍຸດທະສາດເພື່ອປົກປັກຮັກສາ, ສົ່ງເສີມ ແລະ ພັດທະນາຂອງພວກເຮົາໃຫ້ເປັນລັກສະນະຊາດໂດຍຈຸດປະສົງສູງສຸດຄືເພື່ອນໍາພາປະເທດຊາດຈະເລີນຮຸ່ງເຮືອງ; ຍົກລະດັບຊີວິດການເປັນຂອງປະຊາຊົນດີຂຶ້ນເປັນກ້າວໆ,ສະຫງົບ, ຍຸຕິທໍາ ແລະ ສາມັກຄີ; ປົກປັກຮັກສາຮີດຄອງປະເພນີອັນດີງາມ ແລະ ວັດທະນະທີ່ເປັນເອກະລັກຂອງຊາດໃຫ້ຢູ່ຄຽງຄູ່ຕະຫລອດໄປສູ່ຮຸ່ນລູກຫລານ. ແນວໃດກໍດີເພື່ອນໍາເອົາປະເທດຊາດ ອອກຈາກປະເທດດ້ອຍພັດທະນາ ແລະ ລົບລ້າງຄວາມທຸກຍາກນັ້ນ, ການມີສ່ວນຮ່ວມພັດທະນາທີ່ກ່ຽວຂ້ອງກັບອະລິຍະທໍາອາຊີຕ້ອງຕິດພັນກັບສິ່ງເຄົາລົບນັບຖື ແລະ ເອກະລັກນັ້ນເອງ. ວັດທະນະທໍາຍັງເປັນເຄື່ອງມືສໍາຄັນເພື່ອສົ່ງເສີມການໄປມາຫາສູ່ກັນລະຫວ່າງປະຊາຊົນສອງຊາດເຊິ່ງຈະເປັນການປະກອບສ່ວນຢ່າງແຂງແຮງສ້າງຄວາມເຂົ້າອົກເຂ້ົາໃຈຫລາຍຂ້ຶນກວ່າເກ່ົາ ແລະຮັດແໜ້ນສາຍພົວພັນໃຫ້ຫລາຍຂຶ້ນກ່ວາເກົ່າລວມທັງການສົ່ງເສີມນະໂຍບາຍຂໍ້ລິເລີ່ມໜຶ່ງແລວໜຶ່ງເສັ້ນທາງ ຕາມທີ່ທ່ານຜູ້ນໍາສອງປະເທດໄດ້ກ່າວໄວ້ຮ່ວມກັນພ້ອມນ້ີຍັງເປັນການຕອບສະໜອງເຈຕະນາລົມ ແລະ ຄວາມຕັ້ງໃຈຂອງສອງປະເທດໄດ້ຮ່ວມກັນເປີດປີທ່ອງທ່ຽວລາວ-ຈີນອີກດ້ວຍ.