ນາຍົກລັດຖະມົນຕີ ຕ້ອນຮັບການເຂົ້າຢ້ຽມຂ່ຳນັບຂອງປະທານອົງການກອຍກາ

 

 

 

ຂປລ. ໃນວັນທີ 15 ພຶດສະພາ 2019 ຢູ່ສຳນັກງານນາຍົກລັດຖະມົນຕີ, ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວໄດ້ຕ້ອນຮັບການເຂ້ົາຢ້ຽມຂ່ຳນັບຂອງທ່ານ Lee Mi Kyung ປະທານອົງການກອຍ ກາ (KOICA) ພ້ອມດ້ວຍຄະນະໃນໂອກາດເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ໃນຄັ້ງນີ້.

ໃນໂອກາດນ້ີ, ທ່ານ ທອງລຸນ ສີສຸລິດ ໄດ້ສະແດງຄວາມຍິນດີຕ້ອນຮັບທ່ານ Lee Mi Kyung ພ້ອມດ້ວຍຄະນະທ່ີເດີນທາງມາຢ້ຽມຢາມ ສປປ ລາວ ໃນຄັ້ງນີ້, ຊຶ່ງເປັນການປະກອບສ່ວນອັນສຳຄັນເຂ້ົາໃນການເສີມຂະຫຍາຍສາຍພົວພັນມິດຕະພາບ, ການຮ່ວມມື ແລະ ຊ່ວຍເຫລືອລະຫວ່າງ ສປປ ລາວ ແລະ ສ ເກົາຫລີ ໃຫ້ແໜ້ນແຟ້ນຍ່ິງຂ້ຶນ. ນອກຈາກນ້ີ, ທ່ານນາຍົກລັດຖະມົນຕີ ໄດ້ຕີລາຄາສູງຕ່ໍການປະຕິບັດງານຂອງອົງການKOICA ທ່ີກາຍເປັນອົງການທ່ີສຳຄັນໃນການປະຕິບັດໂຄງການຊ່ວຍເຫລືອຕ່າງໆທ່ີລັດຖະບານ ສ ເກົາຫລີ ໄດ້ໃຫ້ການຊ່ວຍເຫລືອລ້າແກ່ ສປປ ລາວ ຕະຫລອດມາ,ເຊິ່ງເຮັດໃຫ້ລັດຖະບານ ກໍ່ຄື ປະຊາຊົນລາວ ແລະ ສ ເກົາຫລີ ມີຄວາມເຂົ້າອົກເຂົ້າໃຈກັນຫລາຍຂຶ້ນ ແລະ ເຮັດໃຫ້ການພົວພັນລະຫວ່າງ 2 ປະເທດນັບມື້ກ້າວເຂົ້າສູ່ລວງເລິກ.ໃນຊຸມປີຜ່ານມາ ເຫັນວ່າມີຫລາຍໂຄງການໄດ້ຮັບການຈັດຕັ້ງປະຕິບັດໂດຍຜ່ານ KOICA ເປັນຕົ້ນແມ່ນໂຄງການພັດທະນາຊົນນະບົດແບບມີສ່ວນຮ່ວມຢູ່ແຂວງວຽງຈັນ,ແຂວງສະຫວັນນະເຂດ ແລະ ອື່ນໆແມ່ນມີຜົນສຳເລັດໄດ້ຮັບຜົນດີ.ສະນັ້ນ, ຈຶ່ງຢາກໃຫ້ອົງການ KOICA ຊ່ວຍສືບຕໍ່ເພື່ອເປັນ ການປະກອບສ່ວນເຮັດໃຫ້ ສປປ ລາວ ຫລຸດພົ້ນອອກຈາກສະຖານະພາບຄວາມດ້ອຍພັດທະນາ ແລະ ບັນລຸເປົ້າໝາຍຂອງ SDGs ຕາມຄາດໝາຍ. ພ້ອມນັ້ນ, ກໍສະແດງຄວາມຍິນດີທີ່ເຫັນວ່າຈະມີການຊ່ວຍເຫລືອເພື່ອຊ່ວຍຟ້ືນຟູເຂດທ່ີໄດ້ຮັບຜົນກະທົບຈາກໄພພິບັດຢູ່ແຂວງອັດຕະປື ຜ່ານອົງການ KOICA ໃນ 2 - 3 ປີ ຕໍ່ໜ້າ.ໃນໂອກາດດຽວກັນນ້ີ, ທ່ານ Lee Mi Kyung ປະທານອົງການKOICA ໄດ້ສະແດງຄວາມຂອບໃຈເປັນຢ່າງສູງຕ່ໍທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ທີ່ໄດ້ສະຫລະເວລາໃຫ້ການຕ້ອນຮັບອັນອົບອຸ່ນໃນຄ້ັງນ້ີ,ພ້ອມຕີລາຄາສູງຕໍ່ການພົວພັນຮ່ວມມືຂອງສອງລັດຖະບານ ສປປ ລາວແລະ ສ ເກົາຫລີ ກໍຄື ອົງການ KOICAໃນໄລຍະຜ່ານມາ, ພ້ອມສະແດງຄວາມຍີນດີສືບຕໍ່ເສີມຂະຫຍາຍສາຍພົວພັນມິດຕະພາບອັນເປັນມູນເຊື້ອໃຫ້ນັບມື້ແໜ້ນແຟ້ນຍິ່ງຂຶ້ນ.