ໄຟໄໝ້ສູນການຄ້າລາວ-ໄອເຕັກເກີດຈາກໄຟຟ້າຊ໋ອດ.

 

 

 

ໃນວັນທີ 14 ພຶດສະພາ 2019 ພະແນກຕໍາຫຼວດສະກັດກັ້ນ ແລະ ຕ້ານອັກຄີໄພ ( ສຕອ )ປກສ ນະຄອນຫຼວງວຽງຈັນ ໄດ້ແຖະແຫຼງຂ່າວກ່ຽວກັບເຫດການໄຟໄໝ້ສູນການຄ້າລາວ-ເຕັກ ແມ່ນເກີດຈາກໄຟຟ້າ ລັດວົງຈອນ ( ຊ໋ອດກະດານໄຟ ) ຢູ່ຮ້ານປະດົບຍົນ ຈາກນັ້ນ ໄດ້ໄໝ້ລາມໄປຫາຮ້ານຂາຍເຄື່ອງ 30 ຮ້ານ ມູນຄ່າຄວາມເສຍຫາຍຢູ່ໃນຂັ້ນຕອນການປະເມີນຜົນ.

ພັທ ຈັນທະບູນ ມະນີວົງ ຫົວໜ້າພະແນກ ສຕອ ຖະແຫຼງວ່າ: ພາຍຫຼັງເຈົ້າໜ້າທີ່ສາມາດຄອບຄຸມໄຟໄວ້ໄດ້ ຈາກນັ້ນ ກໍກວດເບິ່ງສະຖານທີ່ເກີດເຫດ ພົບວ່າໃນຊັ້ນ 2 ຂອງອາຄານ ມີຮ້ານທັງໝົດ ຈໍານວນ 382 ຮ້ານ. ໃນນີ້ ໄໝ້ຕົວຈິງ 30 ຮ້ານ ໄໝ້ກ້ຽງ 19 ຮ້ານ, ຖືກລວກ 11 ຮ້ານ, ທັງໝົດແມ່ນຮ້ານຂາຍສິ້ນໄໝ ແລະ ເສື້ອຜ້າ. ຜ່ານການກວດກາ, ສອບຖາມຜູ້ຢູ່ໃນເຫດການ ແລະ ຂໍ້ມູນຈາກກ້ອງວົງຈອນປິດ ຈິ່ງຮູ້ວ່າ: ກ່ອນໄຟໄໝ້ໃນເວລາປະມານ 8:30 ໂມງ ມີພະນັກງານໄຟຟ້າປະຈໍາສູນການຄ້າລາວ-ໄອເຕັກ ເຮັດໜ້າທີ່ເປີດໄຟ ແລະ ເປີດແອ ເປັນປະຈໍາ ກ່ອນເປີດໃຫ້ລູກຄ້າເຂົ້າຂາຍ, ຕໍ່ມາປະມານ 35 ນາທີ ໄດ້ຍິນສຽງແຕກດັງຂຶ້ນ 1 ຄັ້ງ ພະນັກງານໄຟຟ້າຈິ່ງເຂົ້າໄປເບິ່ງ ພົບເຫັນ ໄຟໄໝ້ລັດວົງຈອນ ( ຊ໋ອດ ) ຢູ່ກະດານໄຟເທິງຮ້ານຂາຍເຄື່ອງປະດົບຍົນ ຂອງທ້າວ ບຸນທັນ ອາຍຸ 36 ປີ, ບ້ານດົງຄໍາຊ້າງ ເມືອງຫາດຊາຍຟອງ ຈິ່ງນໍາເອົາບັ້ງດັບເພິງມາດັບມອດ ແຕ່ບໍ່ສາມາດດັບໄດ້, ເຮັດໃຫ້ໄໝ້ລາມໄປຕາມສາຍໄຟ ແລະ ຕົກໃນເຄື່ອງປະດັບຍົນຢູ່ລຸ່ມເຊິ່ງເປັນວັດຖຸໄວ ຈາກນັ້ນ ຈິ່ງປະສານມາຫາເຈົ້າໜ້າທີ່ ແລະ ໜ່ວຍກູ້ໄພໃຫ້ຄວາມຊ່ວຍເຫຼືອ.
ຜ່ານການກວດໂຄງສ້າງຂອງອາຄານແມ່ນບໍ່ໄດ້ຮັບຜົນກະທົບ ມີແຕ່ລະບົບສາຍໄຟ ແລະ ເພດານທີ່ໄດ້ຮັບຄວາມເສຍຫຼາຍ ສາມາດສ້ອມແປງໄດ້. ສໍາລັບຄວາມເສຍຫຼາຍຂອງລູກຄ້າ ແມ່ນຢູ່ໃນຂັ້ນຕອນປະເມີນຜົນຂອງພາກສ່ວນທີ່ກ່ຽວຂ້ອງ, ຕໍ່ກັບລະບົບປ້ອງກັນຄວາມປອດໄພ ຂອງສູນການຄ້າລາວ-ໄອເຕັກຍັງບໍ່ທັນຮັບປະກັນໄດ້ເທື່ອ ເປັນຕົ້ນແມ່ນລະບົບດັບເພິງ ( ກ໋ອກນໍ້າ ) ໃນເວລາເກີດເຫດບໍ່ສາມາດນໍາໃຊ້ໄດ້.