ສະຫວັນນະເຂດ ພົບຜູ້ຕິດເຊື້ອພະຍາດໄຂຍຸງລາຍ ຫຼາຍກວ່າ 400 ກໍລະນີ

ແຂວງສະຫວັນນະເຂດພົບຜູ້ຕິດເຊື້ອໄຂ້ຍຸງແລ້ວ 417 ຄົນ, ກວມເອົາ 114 ບ້ານ, ໃນນັ້ນ ເມືອງອາດສະພອນ ພົບຜູ້ຕິດເຊື້ອສູງ ເຖິງ 130 ຄົນ. ຕາມການໃຫ້ສໍາພາດຂອງ ທ່ານ ສີສຸມາ ພຸດທະວົງສາ ຮອງຫົວຫນ້າຂະແຫນງຄວບຄຸມພະຍາດຕິດຕໍ່, ພະແນກ ສາທາລະນະສຸກ ແຂວງສະຫວັນນະເຂດ ໄດ້ໃຫ້ຮູ້ວ່າ:

ໃນ ປີ 2019 ນີ້, ແຂວງ ສະຫວັນນະເຂດພວກເຮົາແມ່ນເກີດມີການລະບາດຂອງພະຍາດໄຂ້ຍຸງ ຫຼື ໄຂ້ເລືອດອອກ ຊຶ່ງເລີ່ມມາແຕ່ ເດືອນມັງກອນເປັນຕົ້ນມາ ແລະ ລະບາດຫນັກໃນໄລຍະເດືອນມີນາ ຫາ ເດືອນເມສາ, ຊຶ່ງມາຮອດປັດຈຸບັນນີ້, ພົບຜູ້ ຕິດເຊື້ອພະ ຍາດດັ່ງກ່າວໃນທົ່ວແຂວງແລ້ວ ຈຳນວນ 417 ຄົນ, ເສຍຊີວິດ 3 ຄົນ ໃນນີ້ເມືອງທີ່ມີຄົນເຈັບຫຼາຍທີ່ ສຸດແມ່ນເມືອງອາດສະ ພອນ ມີຜູ້ເປັນພະຍາດໄຂ້ຍຸງທັງຫມົດ 130 ຄົນ, ເສຍຊີວິດ 3 ຄົນ (ບ້ານນາເດື່ອ 1 ຄົນ, ບ້ານດົງທະດາ 2 ຄົນ) ແລະ ເມືອງທີ່ບໍ່ມີ ການແຜ່ລະບາດຂອງພະຍາດໄຂ້ຍຸງລາຍແມ່ນເມືອງນອງ, ບ້ານທີ່ຖືກ ກະທົບ ລວມມີ 114 ບ້ານ ໃນທົ່ວແຂວງ. ຕໍ່ສະພາບການ ດັ່ງກ່າວ, ຂະແຫນງຄວບຄຸມພະຍາດຕິດຕໍ່ຂອງພວກ ເຮົາກໍບໍ່ໄດ້ນິ້ງນອນໃຈໄດ້ລົງຕິດຕາມ ແລະ ຈັດຕັ້ງປະຕິບັດເຜີຍແຜ່ມາດ ຕະການປ້ອງກັນພະຍາດໄຂ້ຍຸງໃຫ້ແກ່ປະຊາຊົນໂດຍໄດ້ເນັ້ນຫນັກໃຫ້ປະຊາຊົນໃນແຕ່ລະບ້ານປະຕິບັດ 5 ປ ຄື: ປິດຝາພາຊະນະທີ່ ໃຊ້ ເກັບນໍ້າພາຍໃນເຮືອນຂອງຕົນ, ປ່ຽນນໍ້າ ແລະ ຜັດຖູພາຊະນະ ເຊັ່ນ: ເຕົ້າດອກໄມ້, ນໍ້າຮອງຕີນຕູ້ເຢັນ ແລະ ອື່ນໆ, ປ່ອຍປາ ຫາງນົກຍູງເພື່ອກິນຫນອນນໍ້າ, ປັບປຸງບໍ່ໃຫ້ມີນໍ້າຂັງທໍາລາຍກະໂປະກະປ໋ອງ, ປະຕິບັດເປັນປະຈໍາທຸກໆອາທິດ. ທ່ານ ສີສຸມາ ພຸດ ທະວົງສາ ຍັງໄດ້ກ່າວຕື່ມອີກວ່າ: ເຊື້ອພະຍາດໄຂ້ຍຸງ ໃນປັດຈຸບັນນີ້ ແມ່ນມີຄວາມຮຸນແຮງຂຶ້ນກວ່າເມື່ອກ່ອນ ແລະ ມີຄວາມຄ້າຍ ຄືກັນກັບພະຍາດຖອກທ້ອງເພາະຈະມີອາການເຈັບທ້ອງ, ຖອກທ້ອງ, ປວດຮາກ, ມີໄຂ້ສູງ, ມີຜື່ນແດງ, ເຫື່ອອອກດັ່ງນັ້ນຈຶ່ງໄດ້ ຮຽກຮ້ອງມາຍັງພໍ່ແມ່ປະຊາຊົນ ຖ້າຫາກມີອາການຄ້າຍຄືທີ່ກ່າວມານີ້ແມ່ນບໍ່ໃຫ້ປິ່ນປົວ ຫຼື ຊື້ຢາມາກິນເອງເພາະຖ້າກິນຢາຜິດ ອາດຈະສົ່ງຜົນໃຫ້ເຊື້ອພະຍາດໃນຮ່າງກາຍແຜ່ກະຈາຍໄດ້ໄວໂດຍໃຫ້ຮີບຟ້າວໄປພົບແພດ-ຫມໍຢູ່ ໂຮງຫມໍ ຫຼື ສຸກສາລາທີ່ໃກ້ທີ່ສຸດ ຈະດີກວ່າ

(ແຫຼ່ງຂໍ້ມູນຈາກ: ໜັງສືພິມ ປະຊາຊົນ)