ນະຄອນຫລວງວຽງຈັນ ກຽມປູກຕົ້ນໄມ້ 1 ລ້ານກ່ວາຕົ້ນສະຫລອງວັນທີ 1 ມິຖຸນາ

ເພື່ອສືບຕໍ່ຈັດຕັ້ງປະຕິບັດນະໂຍບາຍ 6 ສ ໂດຍສະເພາະແມ່ນ ສ ສີຂຽວແນໃສ່ເນື້ອທີ່ປົກຫຸ້ມຂອງປ່າໄມ້ຕິດພັນກັບຂະບວນການຮັກ ຊາດ ແລະ ການພັດທະນາ ປີນີ້ພະແນກກະສິກໍາ ແລະ ປ່າໄມ້ນະຄອນຫລວງວຽງຈັນ ປຸກລະດົມຢ່າງກ້ວາງຂວາງໃຫ້ຊາວນະຄອນ ຫລວງກະກຽມ ແລະ ຜະລິດເບ້ຍໄມ້ ປະຈຸບັນເກັບແກ່ນໄມ້ໄດ້ 1.003,2 ກິໂລ ແລະ ຜະລິດເບ້ຍໄມ້ໄດ້ 1,31 ລ້ານເບ້ຍ ມີເນື້ອທີ່ຮອງ ຮັບປູກຕົ້ນໄມ້ທັງໝົດ 300 ເຮັກຕາ.

 

ເມື່ອບໍ່ດົນມານີ້ ທ່ານ ຫລ້າສາຍ ນວນຫາວົງ ຫົວໜ້າພະແນກກະສິກໍາ ແລະ ປ່າໄມ້ນະຄອນຫລວງວຽງຈັນ ໃຫ້ສໍາພາດຕໍ່ສື່ມວນຊົນ ວ່າ: ເນື່ອງໃນການກະກຽມການສະເຫລີມສະຫລອງວັນປູກຕົ້ນໄມ້ແຫ່ງຊາດ 1 ມິຖຸນາ ຕິດພັນກັບວັນເດັກນ້ອຍສາກົນປະຈໍາ ປີ 2019 ທຸກໆປີທາງພະແນກກະສິກໍາ ແລະ ປ່າໄມ້ນະຄອນຫລວງວຽງຈັນ ກໍປຸກລະດົມພະນັກງານລັດຖະກອນ, ນັກຮຽນຮູ້ປັນຍາຊົນ ພ້ອມກັນ ກ້າເບ້ຍໄມ້ມາປູກຂາຍຢ່າງເປັນຂະບວນຟົດຟື້ນ ເພື່ອສືບຕໍ່ແຜນພັດທະນາກະສິກໍາ ແລະ ປ່າໄມ້ 5 ປີ 2016-2020 ຂອງ ພະແນກ ໂດຍນະຄອນຫລວງມີເນື້ອທີ່ທັງໝົດ 3,92 ແສນເຮັກຕາ, ໃນນັ້ນມີເນື້ອທີ່ປົກຫຸ້ມປ່າໄມ້ 1,22 ແສນເຮັກຕາ ເທົ່າກັບ 31,25 % ແລະ ເນື້ອທີ່ກຫຸ້ມສີຂຽວ 2,26 ແສນເຮັກຕາ ເທົ່າກັບ 57,77%.
ສໍາລັບປີນີ້ ພະແນກມີແຜນກະກຽມປູກໂດຍປະຈຸບັນເກັບແກ່ນໄມ້ໄດ້ 1.003,2 ກິໂລ ແລະ ຜະລິດເບ້ຍໄມ້ໄດ້ 1,31 ລ້ານເບ້ຍ ມີເນື້ອ ທີ່ຮອງຮັບປູກຕົ້ນໄມ້ທັງໝົດ 300 ເຮັກຕາ ຄືເມືອງສັງທອງ 120 ເຮັກຕາ, ໄຊທານີ 100 ເຮັກຕາ, ປາກງື່ມ 40 ເຮັກຕາ, ຫາດຊາຍ ຟອງ 5 ເຮັກຕາ, ສີໂຄດຕະບອງ 5 ເຮັກຕາ ແລະ ເມືອງໄຊເສດຖາ 5 ເຮັກຕາ.
(ແຫຼ່ງຂໍ້ມູນຈາກ: ໜັງສືພິມ ເສດຖະກິດ-ສັງຄົມ)