ຫວນຄືນມູນເຊື້ອເມືອງວຽງໄຊ-ຖານທີ່ໝັ້ນຂອງການປະຕິວັດ

ຂປລ.ຄະນະໂຄສະນາອົບຮົມສູນກາງພັກ ໄດ້ຈັດພິທີເຜີຍແຜ່ແນະນຳ ແລະ ປາຖະກະຖາ ວັນສ້າງຕັ້ງເມືອງວຽງໄຊ-ຖານທີ່ໝັ້ນ ຂອງການປະຕິວັດ ຄົບຮອບ 50 ປີ (30/11/1968-30/11 /2018) ໃນວັນທີ 2 ພະຈິກ 2018 ທີ່ນະຄອນຫລວງວຽງຈັນ ພາຍໃຕ້ການເປັນປະທານຂອງ ທ່ານ ກິແກ້ວ ໄຂຄຳພິທູນ ຫົວໜ້າຄະນະໂຄສະນາອົບຮົມສູນກາງພັກ, ມີພະນັກງານການນຳຫລັກແຫລ່ງ ເຂົ້າຮ່ວມຈຳນວນຫລາຍ.

ທ່ານ ກິແກ້ວ ໄຂຄຳພິທູນ ກ່າວວ່າ: ການເຜີຍແຜ່ແນະນຳ ແລະ ປາຖະກະຖາ ວັນສ້າງຕັ້ງເມືອງວຽງໄຊ-ຖານທີ່ໝັ້ນ ຂອງການປະຕິວັດ ຄົບຮອບ 50 ປີ ໃນຄັ້ງນີ້, ເປັນການ ຫວນຄືນມູນເຊື້ອ ຄວາມປີຊາສາມາດ, ຄວາມສະຫລາດສ່ອງໃສ ຂອງພັກປະຊາຊົນ ປະຕິວັດລາວ ໃນການນຳພາການປະຕິວັດ, ເປັນການລະນຶກຈົດຈຳລໍ້າລຶກ ໄຊຊະນະອັນຍິ່ງໃຫຍ່ ຂອງກອງທັບ ແລະ ປະຊາຊົນບັນ ດາເຜົ່າ ກໍຄືຜົນງານອັນລໍ້າເລີດ ແລະ ຄຸນງາມຄວາມດີ ອັນໃຫຍ່ຫລວງ ຂອງການນຳຮຸ້ນກ່ອນ ໂດຍສະເພາະ ປະທານໄກສອນ ພົມວິຫານ ແລະ ຜູ້ນຳອື່ນໆ ທີ່ໄດ້ນຳພາພາລະກິດ ປະຕິວັດຕໍ່ສູ້ປົດປ່ອຍ ປະເທດຊາດ, ສ້າງເມືອງວຽງໄຊ ເປັນຖານທີ່ໝັ້ນອັນແຂງແກ່ນ ເພື່ອເຮັດສຳເລັດການປະຕິວັດຊາດ ປະຊາທິປະໄຕ ນຳເອົາປະເທດຊາດ ກ້າວຂຶ້ນ ສູ່ສັງກາດໃໝ່. ທັງນີ້ຍັງແນ່ໃສ່ສຶກສາ ອົບຮົມພະນັກງານ, ສະມາຊິກພັກ, ນັກຮົບ ແລະ ປະຊາຊົນບັນດາເຜົ່າ ໂດຍສະເພາະ ແມ່ນຄົນຮຸ້ນໃໝ່ໃຫ້ຮັບຮູ້-ເຂົ້າໃຈຢ່າງເລິກເຊິ່ງ ກ່ຽວກັບ ເສັ້ນທາງ ກ້າວເດີນ ອັນລະອິດລະອ້ຽວ ຂອງການປະຕິວັດ, ມູນເຊື້ອຕໍ່ສູ້ອັນມີໄຊ ແລະ ການນຳພາອັນສະຫລາດສ່ອງໃສ ຂອງພັກປະຊາຊົນປະຕິວັດລາວ ກໍຄືການຄົ້ນຄວ້າຮໍ່າຮຽນ ເອົາເປັນ ແບບຢ່າງໃນຄຸນ ສົມບັດສິນທຳປະຕິວັດ ຂອງບັນດາທ່ານຜູ້ນຳປະຕິວັດຮຸ້ນກ່ອນ. ສິ່ງສຳຄັນເປັນການ ເສີມຂະຫຍາຍມູນເຊື້ອ ແຫ່ງການຊີ້ນຳ-ນຳພາ ຮອບດ້ານຂອງພັກ, ມູນເຊື້ອພິ ລະອາດຫານ ຂອງກອງທັບ ແລະ ປະຊາຊົນບັນດາເຜົ່າ, ມູນເຊື້ອສາມັກຄີປອງດອງຊາດ ແລະ ມູນເຊື້ອດຸໝັ່ນຂະຫຍັນພຽນ ໃນການອອກແຮງງານ ສ້າງສາພັດທະນາ ຊີວິດການເປັນຢູ່ ຂອງປະຊາຊົນລາວເຮົາ ເຂົ້າໃນພາລະກິດປົກປັກຮັກສາ ແລະ ສ້າງສາ ພັດທະນາປະເທດຊາດ ເພື່ອກ້າວຂຶ້ນສູ່ຈຸດໝາຍ ທີ່ໄດ້ກຳນົດໄວ້ຢ່າງມີໄຊ
ພ້ອມດຽວກັນນີ້, ທ່ານ ກິແກ້ວ ໄຂຄຳພິທູນ ຍັງໄດ້ຍົກໃຫ້ເຫັນເຖິງ ຄວາມໝາຍຄວາມສໍາຄັນ ຂອງ ການສ້າງຕັ້ງເມືອງວຽງໄຊ-ຖານທີ່ໝັ້ນ ຂອງການປະຕິວັດລາວ, ເມືອງວຽງໄຊ-ສູນກາງ ການຊີ້ນໍາຂອງພັກ ຕໍ່ພາລະກິດຕໍ່ສູ້ກູ້ຊາດ ຕ້ານລັດທິລ່າເມືອງຂຶ້ນແບບເກົ່າ ແລະ ແບບໃໝ່ ສາມາດປົດປ່ອຍ ປະເທດຊາດຢ່າງສົມບູນ, ເມືອງວຽງໄຊ ເປັນຖານທີ່ ໝັ້ນທີ່ແຂງແກ່ນ, ເປັນສູນກາງ ແຫ່ງການຊີ້ນຳ-ນຳພາຮອບດ້ານຂອງພັກ ໃນພາລະກິດປົດປ່ອຍປະເທດຊາດຢ່າງມີໄຊ ສ້າງສາປະເທດລາວ ໃຫ້ເປັນປະເທດສັນຕີພາບ, ເອກະລາດ, ປະຊາທິປະໄຕ, ເອກະພາບ ແລະ ວັດທະນາຖາວອນ.