ຮອງລັດຖະມົນຕີກະຊວງ ຖວທ ຕ້ອນຮັບຊ່ຽວຊານຈາກອົງການອຸຍແນັສໂກ

ຂປລ. ໃນວັນທີ 30 ຕຸລາ 2018, ທ່ານ ບົວເງິນ ຊາພູວົງ ຮອງລັດຖະມົນຕີ ກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ ໄດ້ໃຫ້ກຽດຕ້ອນຮັບ ທ່ານ ຄຣິສໂຕເຟີ ຄລາວ ໂຈເຊບ ຊ່ຽວຊານ ICOMOS ຈາກອົງການອຸຍແນັສໂກ ໃນໂອກາດເດີນທາງມາຢ້ຽມຢາມ ແລະ ເຮັດວຽກໃນການປະເມີນມໍລະດົກໄຫຫີນແຂວງຊຽງຂວາງ ໃນການຮັບຮອງເຂົ້າເປັນມໍລະດົກໂລກ ໃນລະຫວ່າງວັນທີ 20-30 ຕຸລາ 2018.

ໃນໂອກາດດັ່ງກ່າວ, ທ່ານບົວເງິນ ຊາພູວົງ ໄດ້ກ່າວສະແດງຄວາມຍິນດີຕ້ອນຮັບ, ຊົມເຊີຍ ແລະຕີລາຄາສູງ ຕໍ່ທ່ານ ຄຣິສ ໂຕເຟີ ຄລາວ ໂຈເຊບ ທີ່ໄດ້ເດີນທາງມາຢ້ຽມຢາມ ແລະ ເຮັດວຽກຢູ່ ສປປລາວ ໃນຄັ້ງນີ້, ເຊິ່ງເປັນການປະກອບສ່ວນອັນສໍາຄັນເຂົ້າໃນການເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືຮອບດ້ານລະຫວ່າງ ສປປ ລາວ ແລະ ອົງການອຸຍແນັສໂກ ໃຫ້ໄດ້ຮັບການພັດທະນາ ແລະ ແຕກດອກອອກຜົນງອກງາມຍິ່ງໆຂຶ້ນພ້ອມສະແດງຄວາມຂອບໃຈຕໍ່ອົງການ ອຸຍແນັສໂກ ທີ່ໄດ້ໃຫ້ການຊ່ວຍເຫລືອ ແລະ ສະໜັບສະໜູນແກ່ ສປປ ລາວ ຕະຫລອດມາ ໂດຍສະເພາະທ່ານ ຄຣິສໂຕເຟີ ຄລາວ ໂຈເຊບ ທີ່ໄດ້ປະກອບສ່ວນຢ່າງຕັ້ງໜ້າໃນການປະຕິບັດໜ້າທີ່ດຳເນີນການປະເມີນຜົນຕໍ່ແຫລ່ງມໍລະດົກໄຫຫີນ ແຂວງຊຽງຂວາງໃນການຮັບຮອງເຂົ້າເປັນມໍລະດົກໂລກ. ໂອກາດນີ້, ທ່ານ ຄຣິສໂຕ ເຟີ ຄລາວ ໂຈເຊບ ໄດ້ສະແດງຄວາມຂອບໃຈຕໍ່ ທ່ານ ບົວເງິນ ຊາພູວົງ ທີ່ໄດ້ສະຫລະເວລາອັນມີຄ່າໃຫ້ການຕ້ອນຮັບຢ່າງອົບອຸ່ນໃນຄັ້ງນີ້, ພ້ອມທັງແຈ້ງຈຸດປະສົງ ຂອງການເດີນທາງມາຢ້ຽມຢາມ ແລະເຮັດວຽກ ຢູ່ ສປປ ລາວ ໃນຄັ້ງນີ້ໃຫ້ທ່ານຮອງລັດຖະມົນຕີກະຊວງຖວທ ຮັບຊາບຕື່ມອີກ.