ມວນຊົນເມືອງຊຳເໜືອຕ້ອນຮັບຂະບວນຄາລາວານສະຫະພັນກຳມະບານລາວຫວນຄືນສູ່ເມືອງວຽງໄຊຖານທີ່ໝັ້ນການປະຕິວັດລາວ

ຂປລ. ໃນວັນທີ 17 ຕຸລາ 2018, ມວນຊົນຊາວເມືອງຊຳເໜືອ ນຳໂດຍ ທ່ານ ລຽນໄຊ ບຸນມະ ນີວັນ ເລຂາພັກເມືອງ, ເຈົ້າເມືອງຊໍາເໜືອ ພ້ອມດ້ວຍຄະນະ ໄດ້ຈັດພິທີຕ້ອນຮັບ ຂະບວນຄາລາວານ ຂອງສະຫະພັນກຳມະບານລາວ ຫວນຄືນສູ່ເມືອງວຽງໄຊ ຖານທີ່ໝັ້ນຂອງການປະຕິວັດລາວ ຢ່າງສົມກຽດ ຢູ່ທີ່ເດີນສວນແກ້ວຫລັກເມືອງ ຕົວເມືອງຊຳເໜືອ ແຂວງຫົວພັນ.

ຂະບວນຄາລາວານດັ່ງກ່າວ, ນຳໂດຍ ທ່ານ ປ້ານ ນ້ອຍມະນີ ກຳມະການສູນກາງພັກ ສະມາຊິກສະພາແຫ່ງຊາດ ປະທານສູນກາງສະຫະພັນກຳມະບານລາວ, ມີປະທານ, ຮອງປະທານສະຫະພັນ ກຳມະບານ ຈາກກະຊວງທະບວງກົມ, ອົງການຈັດຕັ້ງຂອງລັດ ແລະ ບັນດາແຂວງໃນຂອບເຂດທົ່ວປະເທດ, ມີຂະບວນລົດ ທັງໝົດ 76 ຄັນ.
ການຈັດຂະບວນຄາລາວານ ຫວນຄືນສູ່ເມືອງວຽງໄຊໃນຄັ້ງນີ້, ເປັນການຫວນຄືນ ສູ່ມູນເຊື້ອປະຫວັດສາດ ຂອງການນຳພາອັນສະຫລາດສ່ອງໃສ ໃນໄລຍະຕໍ່ສູ້ກູ້ຊາດອັນລະອິດລະອ້ຽວ, ເຊິ່ງໄດ້ເຮັດ ໃຫ້ເມືອງວຽງໄຊ ກາຍເປັນຖີ່ນກຳເນີດ ຂອງ ສປປ ລາວ ທັງເປັນການປະກອບສ່ວນສ້າງຂະບວນການ ໃຫ້ແກ່ງານສະເຫລີມສະຫລອງ ວັນສ້າງຕັ້ງເມືອງວຽງໄຊ ຄົບຮອບ 50 ປີ ທີ່ຈະຈັດຂຶ້ນ ໃນທ້າຍເດືອນພະຈິກ 2018 ນີ້ ໃຫ້ມີຄວາມໝາຍສຳຄັນ, ພ້ອມທັງຕິດພັນກັບກິດຈະກຳ ປີທ່ອງທ່ຽວລາວ 2018.
ໂອກາດດຽວກັນນີ້, ຂະບວນຄາລາວານດັ່ງກ່າວ ຍັງໄດ້ທ່ຽວຊົມ ບັນດາຖໍ້າທ່ານຜູ້ນຳ ທີ່ເມືອງວຽງໄຊ, ງານຕະຫລາດນັດວາງສະແດງສິນຄ້າ ແລະ ຈັດກອງປະຊຸມເປີດກວ້າງ ຄົບຄະນະບໍລິຫານງານ ຄັ້ງທີ 4 ສະໄໝທີ 7 ຂອງສະຫະພັນກຳມະບານລາວ ຢູ່ທີ່ຖໍ້າຊ້າງຫລອດ ເມືອງວຽງໄຊ ແຂວງຫົວພັນ ຕຶ່ມອີກ.