ປະດັບຫລຽນໄຊແຮງງານ ໃຫ້ອາດີດປະທານ ສະມາຄົມມິດ ຕະພາບຂອງລາວ ກັບຕ່າງປະເທດ, ຄະນະສັນຕິພາບ ແລະ ສາມັກຄີຂອງລາວ

ຂປລ. ພິທີປະດັບຫລຽນ ໄຊແຮງງານໃຫ້ແກ່ບັນດາ ອາດີດປະທານ ແລະ ຮອງປະທານສະມາ ຄົມມິດຕະພາບຂອງລາວ ກັບຕ່າງປະເທດ, ຄະນະສັນຕິພາບ ແລະ ສາມັກຄີຂອງລາວ ຈຳນວນ 22 ທ່ານ, ໄດ້ຈັດຂຶ້ນໃນວັນທີ 15 ຕຸລາ 2018, ເຊິ່ງໃຫ້ກຽດປະດັບຫລຽນໄຊແຮງງານໂດຍ, ທ່ານ ນາງ ສູນທອນ ໄຊຍະຈັກ ຫົວໜ້າຄະນະພົວພັນ ຕ່າງປະເທດສູນກາງພັກ.

ພິທີດັ່ງກ່າວ, ໄດ້ປະດັບຫລຽນໄຊແຮງງານຊັ້ນ I ໃຫ້ບັນດາອາດີດປະທານສະມາຄົມມິດຕະ ພາບລາວຂອງ ກັບຕ່າງປະເທດ, ຄະນະສັນຕິພາບ ແລະ ສາມັກຄີຂອງລາວ ຈຳນວນ 15 ທ່ານ ແລະ ປະດັບຫລຽນໄຊແຮງງານຊັ້ນ II ໃຫ້ຮອງປະທານສະມາ ຄົມມິດຕະພາບຂອງລາວ ກັບຕ່າງປະເທດ, ຄະນະສັນຕິພາບ ແລະ ສາມັກຄີຂອງລາວ ຈຳນວນ 7 ທ່ານ ເພື່ອຕອບບຸນແທນຄຸນ ຕໍ່ການປະກອບສ່ວນອັນໃຫຍ່ຫລວງ ໃນການເຄື່ອນໄຫວທີ່ຫ້າວຫັນ ຂອງບັນດາອາດີດປະທານ ແລະ ຮອງປະທານ ສະມາຄົມ ດັ່ງກ່າວ, ໃນການເພີ່ມພູນຄູນສ້າງ ສາຍພົວພັນມິດຕະພາບ ລະຫວ່າງລາວ ກັບຕ່າງປະເທດ ກໍຄື ການປະກອບສ່ວນດ້ານສະຕິປັນຍາ, ເຫື່ອແຮງ ໃນໄລຍະຜ່ານມາ.
ໄປຄຽງຄູ ກັບການເຄື່ອນໄຫວວຽກງານການຕ່າງປະເທດຂອງພັກ, ລັດ ຍັງໄດ້ປະກອບສ່ວນເຂົ້າໃນການໂຄສະນາ ແນວທາງນະໂຍບາຍຂອງພັກ, ລັດຖະບານ ຕໍ່ຕ່າງປະເທດ, ເປັນເຈົ້າການໃນການພົວພັນ ຮ່ວມມືກັບຕ່າງປະເທດ ເພື່ອເສີມຂະຫຍາຍສາຍພົວພັນມິດຕະພາບ ແລະ ສົ່ງເສີມການຮ່ວມມື ກັບບັນດາອົງການມິດຕະພາບ ຂອງຕ່າງປະເທດແບບສອງຝ່າຍ ແລະ ຫລາຍຝ່າຍ, ມີການຖອດຖອນບົດຮຽນເຊິ່ງກັນ ແລະ ກັນ ໃນດ້ານຕ່າງໆ ເພື່ອຊຸກຍູ້ການຮ່ວມມືກັນ ເພື່ອການພັດທະນາ, ເປັນເຈົ້າການຊຸກຍູ້ຮ່ວມມື ໃນຂົງເຂດເສດຖະກິດ, ການຄ້າ, ການລົງທຶນ, ວັດທະນະທຳ-ສັງຄົມ ແລະ ອື່ນໆ ໃຫ້ເປັນຮູບປະທຳ ແລະ ມີປະສິດທິຜົນຍິ່ງໆຂຶ້ນ.
ພ້ອມກັນນັ້ນ, ກໍໄດ້ເປັນເຈົ້າການໃນການອະທິບາຍ ສະພາບຄວາມເປັນຈິງຂອງລາວ ຕໍ່ຕ່າງປະເທດ, ຍາດແຍ່ງເອົາການສະໜັບສະໜູນ ຊ່ວຍເຫລືອຂອງຕ່າງປະເທດ ເພື່ອນຳມາສ້າງສາພັດທະນາປະເທດ ໂດຍສະເພາະ, ດ້ານການກໍ່ສ້າງພື້ນຖານໂຄງລ່າງ ດ້ານການສຶກສາ, ສາທາລະນະສຸກ, ສັງຄົມ-ວັດທະນະທຳ ແລະ ອື່ນໆ.