ກະຊວງສຶກສາທິການ ແລະ ກິລາ ຈັດພິທີສະເຫລີມສະຫລອງວັນຄູແຫ່ງຊາດ ຄົບຮອບ 24 ປີ

ຂປລ. ໃນວັນທີ 5 ຕຸລາ 2018 ກະຊວງສຶກສາທິການ ແລະ ກິລາ ໄດ້ຈັດພິທີສະເຫລີມສະຫລອງ ວັນຄູແຫ່ງຊາດ ຄົບຮອບ 24 ປີ ທີ່ ຄະນະເສດຖະສາດ ມະຫາວິທະຍາໄລແຫ່ງຊາດ (ມຊ), ໂດຍການເປັນປະທານ ຂອງ ທ່ານ ນາງ ແສງເດືອນ ຫລ້າ ຈັນທະບູນ, ກໍາມະການສູນກາງພັກ ລັດຖະມົນຕີ ກະຊວງສຶກສາທິການ ແລະ ກິລາ. ໃຫ້ກຽດເຂົ້າຮ່ວມໃນພິທີຄັ້ງນີ້, ມີຄະນະນໍາ ຈາກກະຊວງສຶກສາທິການ ແລະ ກິລາ, ມີບັນດາກົມ, ສະຖາບັນສູນອ້ອມຂ້າງ ອະທິການບໍດີ ຈາກມະຫາ ວິທະຍາ ໄລ ແຫ່ງ ຊາດ, ພ້ອມດ້ວຍພາກສ່ວນທີ່ກ່ຽວຂ້ອງ ຄູ-ອາຈານ ແລະນັກຮຽນເຂົ້າຮ່ວມ.

ໃນໂອກາດດັ່ງກ່າວ, ທ່ານ ນາງ ແສງເດືອນ ຫລ້າຈັນທະບູນ ໄດ້ກ່າວວ່າ: ມື້ນີ້, ເປັນມື້ທີ່ມີຄວາມໝາຍ ແລະ ຄວາມສຳຄັນເປັນຢ່າງຍິ່ງ ທີ່ໄດ້ມີການສະເຫລີມສະຫລອງ ວັນຄູແຫ່ງຊາດຄົບຮອບ 24 ປີ, ເນື່ອງໃນໂອກາດວັນສຳຄັນດັ່ງກ່າວ, ຕາງ ໜ້າໃຫ້ຄະນະພັກ, ຄະນະນຳກະຊວງສຶກສາທິການ ແລະ ກິລາ ຂໍສົ່ງຄວາມຮັກແພງ, ຄວາມຢື້ຢາມຖາມຂ່າວອັນອົບອຸ່ນ ແລະ ອວຍພອນອັນປະເສີດມາຍັງພະນັກງານ, ນັກສຶກສາ, ຄູ-ອາຈານ ທຸກຖ້ວນໜ້າ ທັງອະດີດ ແລະ ປັດຈຸບັນ. ຄູໝາຍ ເຖິງຜູ້ປະຕິບັດໜ້າທີ່ສິດສອນ, ຖ່າຍທອດຄວາມຮູ້, ສຶກສາອົບຮົມຄົ້ນຄົ້ວວິໄຈ, ຊຸກຍູ້ສົ່ງເສີມ ແລະ ຊ່ວຍເຫລືອນັກຮຽນ-ນັກສຶກສາ ຫລາຍຮູບແບບ. ເພາະສະນັ້ນ, ຄູຈຶ່ງຖືກຂະໜານນາມວ່າ ຄູ ຄືແມ່ ພິມຂອງຊາດ, ຄູແມ່ນພໍ່ແມ່ຄົນທີ 2, ຄູ ຄືວິສະ ວະກອນແຫ່ງດວງວິນຍານ ແລະ ອື່ນໆ. ທຸກຄໍາ­ເວົ້າລ້ວນແຕ່ຊີ້ໃຫ້ເຫັນວ່າ ຄູມີຄວາມໝາຍຄວາມສຳຄັນລົ້ນເຫລືອ ຫາທີ່ປຽບບໍ່ໄດ້ຕໍ່ການສຶກສາ, ຕໍ່ການພັດທະນາຊັບພະຍາກອນມະນຸດ ກໍ່ຄື ການພັດທະນາປະເທດຊາດ.
ໃນໄລຍະຜ່ານມາ, ກະຊວງສຶກສາທິການ ແລະ ກິລາ ກໍຄື ອຳນາດການປົກຄອງທ້ອງຖິ່ນ, ຜູ້ບໍລິຫານການສຶກສາແຕ່ລະຂັ້ນ ທັງພາກລັດ ແລະ ເອກະຊົນ ໄດ້ມີຄວາມພະຍາຍາມສູງ ໃນການເອົາໃຈໃສ່ພັດທະນາການສຶກສາ, ທັງດ້ານປະລິມານ ແລະ ຄຸນນະພາບ, ໄດ້ຂະຫຍາຍຕາໜ໋າງການສຶກສາ ໄປທົ່ວທຸກທ້ອງຖິ່ນ, ເຂດພູດອຍຫ່າງໄກຫລອກຫລີກ, ສ້າງໂອກາດສິ່ງອໍານວຍຄວາມສະດວກ ໃຫ້ປະຊາຊົນ ໄດ້ມີລະດັບຄວາມຮູ້ຈົບປະຖົມ ແລະ ມັດທະຍົມສຶກສາຕອນຕົ້ນ, ບໍາລຸງດ້ວຍຄວາມ ຮັບຜິດ ຊອບສູງ ເຫັນວ່າຄຸນນະພາບຂອງນັກສຶກສາ ໃນທຸກລະດັບ, ທຸກຊັ້ນ ທຸກສາຍ ກໍໄດ້ຮັບການພັດ ທະນາດີຂຶ້ນເປັນກ້າວໆ.
ໃນໂອກາດດຽວກັນນີ້, ຜູ້ເຂົ້າຮ່ວມ ໄດ້ຮັບຟັງການລາຍງານ ສະພາບການຈັດຕັ້ງປະຕິບັດ ວຽກງານການສຶກສາ ໃນໄລຍະຜ່ານມາ ຈາກຄະນະນຳ ກະຊວງສຶກສາທິການ ແລະ ກິລາ ໄດ້ມີການພົບປະ ກັບອະດີດການນໍາຂັ້ນ ສູງຂອງກະຊວງ ສຶກສາ ແລະ ກິລາ, ພະນັກງານປະຕິວັດ, ອາວຸໂສບຳນານແລະ ຮັບຊົມການສະແດງ ສິລະປະວັນນະຄະດີ ຈາກນັກສຶກສາ ທີ່ສະແດງເຖິງຄວາມຮູ້ບຸນຄຸນຂອງຄູ-ອາຈານ ແລະ ອື່ນໆ.