ເຜີຍແຜ່ຄຳສັ່ງຄຳແນະນຳກ່ຽວກັບການກໍ່ສ້າງໜ່ວຍພັກປອດໃສເຂັ້ມແຂງໜັກແໜ້ນປະຈຳ ປີ 2018

ຂປລ. ກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ ເຜີຍແຜ່, ເຊື່ອມຊຶມຄຳສັ່ງ, ຄຳແນະນຳ ໃນການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈຳປີ 2018 ມີຂຶ້ນໃນວັນທີ 4 ຕຸລາ 2018 ໃຫ້ກຽດປາຖະກະຖາ, ໂດຍ ທ່ານ ບົວເງິນ ຊາພູວົງ ຮອງລັດຖະມົນຕີ ກະຊວງຖະ ແຫລງຂ່າວ, ວັດທະນະທຳ ແລະ ທ່ອງທ່ຽວ, ທ່ານ ສະຫວັນຄອນ ລາຊະມຸນຕີ ຮອງລັດຖະມົນຕີ ກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ, ມີຫົວໜ້າກົມ, ຮອງກົມ, ຫົວໜ້າພະແນກ ແລະ ສະມາຊິກພັກ ພາຍໃນກະຊວງ ເຂົ້າຮ່ວມ.

ການເຜີຍແຜ່ໃນຄັ້ງນີ້, ແນໃສເພື່ອສືບຕໍ່ເສີມຂະຫຍາຍ ມູນເຊື້ອອັນດີງາມ ຜົນງານທີ່ໂດດເດັ່ນ ແລະ ດ້ານດີ, ເດັດດ່ຽວປັບປຸງ, ແກ້ໄຂຈຸດອ່ອນຂໍ້ຄົງຄ້າງ ແລະ ສິ່ງທ້າທ້າຍທົດສອບ ທີ່ເປັນໄພອັນ ຕະລາຍຕໍ່ພັກເຮົາ ແນໃສ່ເຊີດຊູບົດບາດຄວາມສາມາດ ນຳພາຂອງໜ່ວຍພັກ ແລະ ຍົກສູງຄວາມເປັນແບບຢ່າງນຳໜ້າ ຖັນແຖວສະມາຊິກພັກ ຮັບປະກັນໃຫ້ພັກມີຄວາມປອດໃສ, ເຂັ້ມແຂງ, ໝັກແໜ້ນ, ເພື່ອຍົກສູງຄຸນນະພາບ ຂອງໜ່ວຍພັກ ແລະ ສະມາຊິກພັກ ໃຫ້ມີການຫັນປ່ຽນຢ່າງຕັ້ງໜ້າ ດ້ວຍບາດກ້າວບຸກທະລຸ ສາມາດເປັນແກນນຳທີ່ເຂັ້ມແຂງ ໃນລະບົບການເມືອງຢູ່ຮາກຖານ, ເພື່ອຮັບປະກັນ ເຮັດໃຫ້ການນຳພາຂອງພັກ ຕອບສະໜອງໄດ້ຄວາມເລັ່ງທວງ ຂອງການພັດທະນາ ປະເທດຊາດໃນເງື່ອນໄຂ ແລະ ສະພາບແວດລ້ອມໃໝ່. ພັກເຮົາມີຄວາມຈໍາເປັນ ຕ້ອງກໍ່ສ້າງພັກ, ຄະນະໜ່ວຍພັກ ແລະ ສະມາຊິກພັກ ໃຫ້ມີຄວາມສາມາດ ນຳພາຈັດຕັ້ງປະຕິບັດໜ້າທີ່ ການເມືອງຂອງພັກ ແລະ ມີແຜນພັດທະນາ ເສດຖະກິດ-ສັງຄົມ ຂອງລັດວາງອອກ ແຕ່ລະໄລຍະໃຫ້ກົດຜົນເປັນຈິງ. ຜ່ານການຈັດຕັ້ງປະຕິບັດຄຳສັ່ງດັ່ງກ່າວ, ເຮັດໃຫ້ໜ່ວຍພັກ ແລະ ສະມາຊິກພັກ ມີການເຕີບໃຫຍ່ຂະຫຍາຍຕົວ ທາງດ້ານຈຳນວນ ແລະ ຄຸນນະພາບ, ໜ່ວຍພັກ, ສະມາຊິກພັກ ໃນຂອບເຂດທົ່ວປະເທດ ໄດ້ພະຍາຍາມຍົກສູງ ຄວາມສາມາດນຳພາຂອງຕົນສູງຂຶ້ນ ແລະ ອື່ນໆ.
ໃນໂອກາດດຽວກັນ, ກໍໄດ້ມີພິທີມອບ-ຮັບ ບັດສະມາຊິກພັກສົມບູນ ໃຫ້ສະມາຊິກພັກ 22 ສະ ຫາຍ, ຍິງ 5 ສະຫາຍ. ປັດຈຸບັນ ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ມີສະມາ ຊິກພັກທັງໝົດ 793 ສະຫາຍ, ຍິງ 283 ສະຫາຍ, ສໍາຮອງ 49 ສະຫາຍ, ຍິງ 18 ສະຫາຍ ໄດ້ຮັບອະນຸມັດອອກບັດສະມາຊິກພັກ ຈາກຄະນະຈັດຕັ້ງສູນກາງພັກ 631 ສະຫາຍ, ຍິງ197 ສະຫາຍ.