4 ແຂວງພາກເໜືອຫາລືການປັບປຸງຫົວໜ່ວຍທຸລະກິດທ່ອງທ່ຽວ

ຂປລ. ບັນດາຜູ້ຕາງໜ້າຈາກພະແນກແຫລງຂ່າວ, ວັດທະນະທຳ ແລະ ທ່ອງທ່ຽວ(ຖວທ) 4 ແຂວງພາກເໜືອ ປະກອບມີ ແຂວງບໍ່ແກ້ວ, ຫລວງນໍ້າທາ, ອຸດົມໄຊ ແລະ ແຂວງຜົ້ງສາລີ ໄດ້ເຂົ້າຮ່ວມກອງປະຊຸມປູກຈິກສຳນຶກ ແລະ ປັບປຸງບັນດາຫົວໜ່ວຍທຸລະກິດ ໃນຂະແໜງການທ່ອງທ່ຽວ ເພື່ອສົ່ງເສີມປີທ່ອງທ່ຽວລາວ 2018 ໃນວັນທີ 2 ຕຸລາ 2018 ຢູ່ແຂວງບໍ່ແກ້ວ ໂດຍການເຂົ້າຮ່ວມ ຂອງທ່ານ ໄຊສົມບັດ ບູນນະຜົນ ຮອງຫົວໜ້າກົມຄຸ້ມຄອງການທ່ອງທ່ຽວ ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ. ທັງນີ້ ກໍເພື່ອ ເຮັດໃຫ້ວຽກງານດັ່ງກ່າວ ກໍຄື ການດຳເນີນກິດຈະການ ຂອງຜູ້ປະກອບການໂຮງແຮມ, ເຮືອນພັກ ແລະ ຮ້ານບັນເທີງ ໃຫ້ເຂົ້າສູ່ ລະບຽບກົດໝາຍ.

ກອງປະຊຸມ ໄດ້ປຶກສາຫາລືມາດຖານໃນການຈັດສະຖານທີ່ ຮ້ານບັນເທີງ, ໂຮງແຮມ, ເຮືອນພັກ ທີ່ບໍ່ໄດ້ຕາມມາດຖານ ແລະ ເງື່ອນໄຂທີ່ໄດ້ກຳນົດໄວ້ໂດຍສະເພາະ ແມ່ນຫົວໜ່ວຍທຸລະກິດ ບໍລິການ ບັນເທີງ ຕ້ອງປະຕິບັດຕາມເງື່ອນໄຂຄື: ສະຖານທີ່ຕັ້ງຕ້ອງຫ່າງ ໄກຈາກສະຖານທີ່ການສຶກສາ, ໂຮງໝໍ, ສຳນັກງານຂອງລັດ ແລະ ສຳນັກງານອົງການຈັດຕັ້ງສາກົນ, ສາສະນະສະຖານ, ອະນຸສອນສະຖານ, ບູຮານສະຖານ, ປູຊະນິຍະສະຖານ, ຖໍ້າ, ສະຖານທີ່ສັກສິດ ແລະ ສະຖານທີ່ສຳຄັນອື່ນໆຂອງຊາດ 500 ແມັດ ຂຶ້ນໄປ; ບ່ອນຈອດລົດ ຂອງສະຖານທີ່ບັນເທີງ ຢູ່ພາຍໃນໂຮງແຮມ, ຣີສອດ, ຮ້ານອາຫານ ແລະ ພັດຕາຄານ ຕ້ອງມີເນື້ອທີ 600 ຕາແມັດຂຶ້ນໄປ; ການປຸກສ້າງ ຕ້ອງໄດ້ຮັບອະນຸຍາດ ຈາກຂະແໜງໂຍທາທິການ ແລະ ຂົນສົ່ງທີ່ກ່ຽວຂ້ອງ ແລະ ການຕົບແຕ່ງປະດັບປະດາ ຕ້ອງສອດ ຄ່ອງກັບມາດຕະຖານຂອງການບັນເທີງ ທີ່ໄດ້ກຳນົດໄວ້; ອຸປະກອນເຄື່ອງສຽງ ແລະ ພາບ ສຳລັບການບໍລິການບັນເທີງ ຕ້ອງຮັບປະກັນຄຸນນະພາບ, ມາດຕະຖານ ແລະ ມີຄວາມປອດໄພຮອບດ້ານ 100%; ຄວາມດັງຂອງສຽງ ຕ້ອງຕໍ່າກວ່າ 85 Decibel A (dB); ບໍ່ສົ່ງສຽງເນືອງນັນ ລົບກວນພາຍນອກ ຫລື ບໍລິເວນໄກ້ຄຽງ; ບໍ່ສົ່ງຜົນຮ້າຍ ຫລື ອັນຕະລາຍຕໍ່ລະບົບປະສາດ ແລະ ສຸຂະພາບ.
ສ່ວນດ້ານການບໍລິການ ຕ້ອງມີຈັນຍາບັນ, ຕ້ອງຮັບປະກັນຄຸນນະພາບ, ມາດຕະຖານ, ຄວາມສະອາດ, ປອດໄພຮອບດ້ານຮ້ອຍສ່ວນຮ້ອຍ; ບໍລິການດ້ວຍຄວາມບໍລິສຸດສັດຊື່, ໂປ່ງໃສ, ຍຸຕິທຳ ແລະ ຖືກຕ້ອງ; ພະນັກງານບໍລິການຕ້ອງມີອາຍຸ 18 ປີຂຶ້ນໄປ ແລະ ຜູ້ໃຊ້ບໍລິການຕ້ອງມີ ອາຍຸ 18 ປີຂຶ້ນໄປ, ຕ້ອງມີພະນັກງານຮັກສາຄວາມປອດໄພ ຕະຫລອດເວລາ ແລະ ອື່ນໆ.