ລັດຖະມົນຕີ ຖວທ ພົບປະສອງຝ່າຍກັບລັດຖະມົນຕີ ວັດທະນະທໍາ, ກິລາ ແລະ ທ່ອງທ່ຽວ ຫວຽດນາມ

ຂປລ. ວັນທີ 9 ກັນຍາ 2018, ທີ່ນະຄອນຫລວງຮ່າໂນ້ຍ ສສ.ຫວຽດນາມ; ທ່ານ ບໍ່ແສງຄຳ ວົງດາລາ ລັດຖະມົນຕີ ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ແຫ່ງ ສປປ ລາວ ແລະ ຄະນະ ໄດ້ພົບປະສອງຝ່າຍກັບ ທ່ານ ຫງວຽນ ຫງອກ ທຽນ ລັດຖະມົນຕີ ກະຊວງວັດທະນະທຳ, ກິລາ ແລະ ທ່ອງທ່ຽວແຫ່ງ ສສ.ຫວຽດນາມ ພ້ອມດ້ວຍຄະນະ ໃນໂອກາດທີ່ ທ່ານລັດຖະມົນຕີ ຖວທ ເດີນທາງໄປຢ້ຽມຢາມ ສສ.ຫວຽດນາມ ເພື່ອຮັດແໜ້ນສາຍພົວພັນອັນເປັນມູນເຊື້ອ, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງຊາດ ລາວ-ຫວຽດນາມ ເວົ້າລວມ, ເວົ້າສະເພາະແມ່ນການ ຮ່ວມມືດ້ານວັດທະນະທຳ ແລະ ທ່ອງທ່ຽວ ໃຫ້ນັບມື້ເລິກເຊິ່ງ ແລະ ມີປະສິດທິຜົນສູງຂຶ້ນໄປເລື້ອຍໆ.

ໃນໂອກາດພົບປະ, ສອງຝ່າຍລ້ວນແຕ່ໄດ້ຕີລາຄາສູງ ແລະ ຊົມເຊີຍບັນດາຜົນສຳເລັດຂອງການພົວພັນຮ່ວມມື ທີ່ພ້ອມກັນຍາດມາໄດ້, ໃນຊຸມປີຜ່ານມານີ້ ເຊິ່ງສອງຝ່າຍ ໄດ້ພ້ອມກັນຖະນຸບຳລຸງເຮັດໃຫ້ການ ພົວພັນຮ່ວມມືອັນເປັນມູນເຊື້ອ, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງສອງຊາດ ລາວ-ຫວຽດນາມ, ຫວຽດນາມ-ລາວ, ເວົ້າສະເພາະ ແມ່ນລະຫວ່າງສອງກະຊວງ ນັບມື້ເກີດດອກອອກຜົນເປັນກ້າວໆ. ສອງຝ່າຍ ຍັງໄດ້ກ່າວສະແດງຄວາມຂອບໃຈ ເຊິ່ງກັນ ແລະ ກັນ ທີ່ເຫັນວ່າບັນດາ ແຜນການພົວພັນຮ່ວມມື ໄດ້ຮັບການຈັດຕັ້ງ ປະຕິບັດຢ່າງມີຄວາມເອົາໃຈໃສ່ເປັນພິເສດ, ເປັນຕົ້ນແມ່ນບັນດາກິດຈະກຳຈັດຕັ້ງ ສະເຫລີມສະຫລອງວັນສໍາຄັນຕ່າງໆ ແລະ ການຜັດປ່ຽນຈັດງານ ສັບປະດາວັດທະນະທໍາຂອງສອງຊາດ ເຕັມໄປດ້ວຍບັນຍາກາດອັນຟົດຟື້ນ ທີ່ເຕັມໄປດ້ວຍຄວາມໝາຍ ຄວາມສໍາຄັນອັນເລິກເຊິ່ງ. ນອກນັ້ນ, ການແລກປ່ຽນຢ້ຽມຢາມ ຂອງຄະນະຜູ້ແທນໃນລະດັບຕ່າງໆ ກໍ່ໄດ້ຮັບການຈັດຕັ້ງປະຕິບັດຢ່າງເປັນປົກກະຕິ ແລະ ມີຜົນສຳເລັດສູງພໍສົມຄວນ.
ໃນໂອກາດພົບປະ, ສອງຝ່າຍ ຍັງໄດ້ແຈ້ງໃຫ້ກັນຊາບ ສະພາບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ຂອງແຕ່ລະປະເທດ, ເວົ້າສະເພາະແມ່ນຂົງເຂດ ວັດທະນະທຳ ແລະ ທ່ອງທ່ຽວ ທີ່ພວມໄດ້ຮັບການພັດທະນາ ຂຶ້ນເປັນກ້າວໆໄປຄຽງຄູ່ກັນ ແລະ ກັນ. ພ້ອມດຽວກັນ, ຍັງໄດ້ມີການສົນທະນາປຶກສາຫາລື ແລະ ແລກປ່ຽນຄຳຄິດຄຳເຫັນ ບາງວຽກງານທີ່ສອງຝ່າຍໃຫ້ຄວາມສົນໃຈ ເພື່ອພ້ອມກັນເພີ່ມທະວີການຮັດແໜ້ນການພົວພັນ ແລະ ຮ່ວມມືສອງຝ່າຍ ໃຫ້ນັບມື້ເກີດດອກອອກຜົນ ແລະ ກ້າວສູ່ຄຸນນະພາບໃໝ່ຍິ່ງໆຂຶ້ນໄປ.
ການພົບປະສອງຝ່າຍ ລະຫວ່າງ ຄະນະຜູ້ແທນຂັ້ນສູງຂອງກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວແຫ່ງ ສປປ ລາວ ແລະ ກະຊວງວັດທະນະທຳ, ກິລາ ແລະ ທ່ອງທ່ຽວ ແຫ່ງ ສສ ຫວຽດນາມ ໃນຄັ້ງນີ້, ໄດ້ດຳເນີນໄປດ້ວຍບັນຍາກາດແຫ່ງໄມຕີຈິດມິດຕະພາບ ອັນສະໜິດສະໜົມແຕ່ຕົ້ນ ຕະຫລອດປາຍ.