ຮອງນາຍົກລັດຖະມົນຕີ ຕິດຕາມການແກ້ໄຂໄພນໍ້າຖ້ວມ ທີ່ແຂວງຫລວງພະບາງ

ພາຍຫລັງສໍາເລັດການເຄື່ອນໄຫວ, ຕິດຕາມ ແລະ ແກ້ໄຂໄພພິບັດນໍ້າຖ້ວມ ຢູ່ແຂວງຈໍາປາສັກ ແລະ ແຂວງອັດຕະປື, ໃນວັນທີ 9 ກັນຍາ 2018, ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ປະທານຄະນະກໍາມະການສະເພາະກິດ ແກ້ໄຂໄພພິບັດລະດັບຊາດ ພ້ອມດ້ວຍຄະນະໄດ້ສືບຕໍ່ຕິດຕາມ ແລະ ແກ້ໄຂໄພພິບັດ ທີ່ເກີດຂຶ້ນຢູ່ທີ່ແຂວງຫລວງພະບາງ, ໂດຍມີ ທ່ານ ຄໍາຂັນ ຈັນທະວີສຸກ ເຈົ້າແຂວງໆ ຫລວງພະບາງ, ອໍານາດການປົກຄອງແຂວງ, ເມືອງ ແລະ ປະຊາຊົນ ແຂວງ ຫລວງພະບາງ ໃຫ້ການຕ້ອນຮັບ.

ໃນໂອກາດດັ່ງກ່າວ, ທ່ານ ສອນໄຊ ສີພັນດອນ ໄດ້ເດີນ ທາງໄປເບິ່ງສະພາບນໍ້າຖ້ວມ ຢູ່ທີ່ ບ້ານນາຕານ, ນະຄອນ ຫລວງພະບາງ ເຊິ່ງອໍານາດການປົກຄອງບ້ານນາຕານ ໄດ້ລາຍງານໃຫ້ຊາບວ່າ: ໃນວັນທີ 29 ສິງຫາ 2018 ທີ່ຜ່ານມາ ໄດ້ເກີດມີ ເຫດການນໍ້າໄຫລຊຸເຮືອນ ແລະ ເນື້ອທຜະລິດຂອງປະຊາຊົນ, ເຮັດໃຫ້ເຮືອນຂອງປະຊາຊົນໄດ້ຮັບຜົນກະທົບ ຈໍານວນ 40 ຫລັງ, ໃນນີ້ມີເຮືອນ 8 ຫລັງໄດ້ຮັບຜົນກະທົບໜັກ, ເນື້ອທີ່ນາ ແລະ ເນື້ອທີ່ປູກພືດເສຍຫາຍ 10 ກວ່າເຮັກຕາ. ນອກນັ້ນ, ຍັງ ມີສັດລ້ຽງ, ພາຫະນະ ແລະ ອຸປະກອນທໍາການຜະລິດຂອງປະຊາຊົນ ໄດ້ຮັບຜົນເສຍ ເປັນຈໍານວນຫລວງຫລາຍພໍສົມຄວນ ເຊິ່ງອໍານາດການປົກຄອງແຂວງ, ເມືອງ ກໍ່ຄື ບ້ານນາຕານ ກໍໄດ້ສຸມທຸກກໍາລັງເຂົ້າ ໃນການຊ່ວຍສຸກເສີນເບື້ອງຕົ້ນ ໄດ້ ມີ ການຍົກຍ້າຍປະຊາຊົນ ທີ່ຖືກຜົນກະທົບມາຢູ່ບ່ອນທີ່ປອດໄພ, ສະໜອງເຄື່ອງອຸປະໂພກ-ບໍລິໂພກທີ່ຈໍາເປັນຈໍານວນໜຶ່ງ ເປັນຕົ້ນແມ່ນ ເຂົ້າສານ, ເຄື່ອງນຸ່ງຫົ່ມ, ຢາປົວພະຍາດ ແລະ ອື່ນໆ.
ໂອກາດຕິດຕາມການແກ້ໄຂສະພາບໄພພິບັດ ທີ່ເກີດຂຶ້ນໃນຄັ້ງນີ້, ທ່ານ ສອນໄຊ ສີພັນດອນ ໄດ້ຊີ້ນໍາໃຫ້ອໍານາດການປົກຄອງແຂວງ, ນະຄອນ ກໍຄື ອໍານາດການປົກຄອງບ້ານນາຕານ ສືບຕໍ່ຕິດຕາມກ່ຽວກັບການປ່ຽນແປງ ຂອງສະພາບ ດິນ ຟ້າອາກາດ ຢ່າງໃກ້ຊິດ ຈາກກົມອຸຕຸນິຍົມ ແລະ ອຸທຸກກະສາດ; ເອົາໃຈໃສ່ຊ່ວຍ ເຫລືອຜູ້ທີ່ໄດ້ຮັບຜົນກະທົບ, ໂດຍສະເພາະ ຜູ້ເຖົ້າ ແລະ ເດັກນ້ອຍ; ໃຫ້ສໍາຫລວດ ແລະ ປະເມີນຄວາມເສຍຫາຍທີ່ເກີດຂຶ້ນໃນຄັ້ງນີ້, ພ້ອມທັງໃຫ້ເອົາ ໃຈໃສ່ແຈ້ງ ເຕືອນ ຂໍ້ມູນຂ່າວສານ ໃຫ້ປະຊາຊົນໄດ້ຮັບຮູ້ຢ່າງທັນການ, ສໍາຄັນແມ່ນ ຕ້ອງມີການສ້າງແຜນ ເພື່ອຮັບມືກັບໄພພິບັດທີ່ອາດຈະເກີດຂຶ້ນໃນຕໍ່ໜ້າ ເພື່ອເຮັດໃຫ້ໄດ້ຮັບຜົນກະທົບໜ້ອຍທີ່ສຸດ. ພ້ອມດຽວກັນນັ້ນ ກໍໃຫ້ສືບຕໍ່ຮັກສາ ມູນເຊື້ອ ຄວາມ ສາ ມັກຄີ, ຊ່ວຍເຫລືອເຊິ່ງກັນ ແລະ ກັນ ເພື່ອຟື້ນຟູໄພພິບັດທີ່ເກີດຂຶ້ນ ໃຫ້ກັບຄືນສູ່ສະພາບປົກກະຕິໂດຍໄວ.
ໂອກາດລົງມາກວດກາ ສະພາບຜົນເສຍຫາຍຢູ່ບ້ານນາຕານ ໃນຄັ້ງນີ້, ທ່ານຮອງນາຍົກລັດຖະມົນຕີ ຍັງໄດ້ມອບເງິນຈໍານວນ 10 ລ້ານກີບ ໃຫ້ແກ່ບ້ານເພື່ອນໍາໄປໃຊ້ເຂົ້າ ໃນການຊ່ວຍເຫລືອປະຊາຊົນໃນບ້ານ. ຈາກນັ້ນ ກໍໄດ້ເດີນທາງໄປເບິ່ງ ສະພາບ ຄວາມເສຍຫາຍຂອງສົ້ນຂົວນໍ້າເຊືອງ ທີ່ຍຸບລົງ ເຊິ່ງເຮັດໃຫ້ການສັນຈອນໄປ- ມາຂອງປະຊາຊົນ ພົບຄວາມຫຍຸ້ງຍາກ. ຕໍ່ບັນຫາດັ່ງກ່າວ, ຮອງນາຍົກລັດຖະມົນຕີ ກໍໄດ້ຊີ້ນໍາໃຫ້ຂະແໜງການທີ່ກ່ຽວຂ້ອງ ກວດກາຄືນຄວາມເສຍຫາຍ, ສາ ເຫດຂອງຍຸບ ເພື່ອຊອກຫາວິແກ້ໄຂ ໃຫ້ສໍາເລັດໂດຍໄວ.
ປັດຈຸບັນຂົວນໍ້າເຊືອງ ໄດ້ປິດການສັນຈອນຊົ່ວຄາວ ແລະ ໄດ້ນໍາໃຊ້ເຮືອບັກ ເພື່ອລໍາລຽງຂົນສົ່ງພາຫະນະ ທີ່ເດີນທາງໄປມາສູ່ພາກເຫນືອ.