ຮອງນາຍົກລັດຖະມົນຕີ ຜູ້ຊີ້ນຳຄະນະຮັບຜິດຊອບສືບສວນ -ສອບສວນ ຄູກັນນໍ້າເຂື່ອນໄຟຟ້າ ເຊປ່ຽນ-ເຊນໍ້ານ້ອຍແຕກພັງ ເຄື່ອນໄຫວ ວຽກງານ ທີ່ແຂວງຈໍາປາສັກ ແລະ ແຂວງ ອັດຕະປື

ຂປລ.ຈາກເຫດການສັນເຂື່ອນ D ຫລື Saddle dam D ຂອງເຂື່ອນໄຟຟ້າເຊປ່ຽນ-ເຊນໍ້ານ້ອຍແຕກພັງ ໃນຄໍ່າຄືນຂອງວັນທີ 23 ກໍລະກົດ 2018 ຜ່ານມາ ເຮັດໃຫ້ມວນນໍ້າຈໍານວນ500 ລ້ານກວ່າແມັດກ້ອນ ໄຫລລົງສູ່ເມືອງສະໜາມໄຊ ແຂວງ ອັດຕະປື ຢ່າງໄວວາ. ເຫດການນີ້, ເກີດຂຶ້ນມາຮອດປັດຈຸບັນ ກໍເປັນເວລາ 1 ເດືອນກວ່າແລ້ວ ການຄົ້ນຫາຜູ້ສູນຫາຍຍັງຄົງສືບຕໍ່ ການຊ່ວຍເຫລືອຜູ້ປະສົບໄພ ຈາກພາກສ່ວນຕ່າງໆ ຍັງຄົງຮີບຮ້ອນ ແລະ ເລັ່ງດ່ວນ ເພື່ອຟຶ້ນຟູຊີວິດການເປັນຢູ່ຂອງປະຊາຊົນ ທີ່ໄດ້ຮັບຜົນກະທົບໃຫ້ກັບຄືນສູ່ສະພາບປົກກະຕິ ໄວເທົ່າທີ່ຈະໄວໄດ້.

ຈາກເຫດການສັນເຂື່ອນແຕກພັງລົງດັ່ງກ່າວ, ໄດ້ສ້າງຄວາມເສຍຫາຍຕໍ່ຊີວິດ, ຊັບສິນຂອງປະຊາຊົນ ເປັນຈຳນວນມະຫາສານ ໂດຍສະເພາະ ແມ່ນເມືອງສະໜາມໄຊ ທີ່ເປັນເມືອງຕັ້ງຢູ່ລຸ່ມສັນເຂື່ອນ D ອັນໄດ້ເຮັດໃຫ້ປະຊາຊົນຢູ່ໃນ 13 ບ້ານ ໄດ້ຮັບຜົນກະທົບຢ່າງກະທັນຫັນ. ໃນນັ້ນ, ມີຈຳນວນ 6 ບ້ານ ທີ່ເປັນບ້ານລຽບຕາມສາຍນ້ຳເຊປຽນ ໄດ້ຮັບຜົນກະທົບ 100%; ມີປະຊາຊົນທີ່ຖືກຜົນກະທົບ ແລະ ເສຍຫາຍໜັກ 1.611 ຄອບຄົວ, 7.095 ຄົນ ໃນນີ້ມີຜູ້ເສຍຊີວິດ 39 ຄົນ ແລະ ສູນຫາຍອີກ 98 ຄົນ (ອີງໃສ່ຕົວເລກວັນທີ 14 ສິງຫາ 2018); ສັດລ້ຽງ ແລະ ພື້ນທີ່ກະສິກໍາຂອງປະຊາຊົນ ເສຍຫາຍຢ່າງຫລວງຫລາຍ ແລະ ປະຊາຊົນແຂວງຈຳປາສັກ ກໍ່ໄດ້ຮັບຜົນກະທົບ ຈາກເຫດການນີ້ຈຳນວນໜຶ່ງ.
ຍ້ອນຄວາມເປັນຫ່ວງເປັນໃຍ ຂອງພັກ-ລັດ ຕໍ່ເຫດການດັ່ງກ່າວ ແລະ ເພື່ອກວດກາ, ສືບ ສວນ-ສອບສວນ ຫາສາເຫດຂອງການພັງລົງມາຂອງສັນເຂື່ອນ D ນັ້ນ, ກອງປະຊຸມຂອງກົມການເມືອງ ຄັ້ງວັນທີ 30 ກໍລະກົດ 2018 ໄດ້ເຫັນດີໃຫ້ລັດຖະບານ ແຕ່ງຕັ້ງຄະນະພັກສະເພາະກິດ ເພື່ອກວດກາເຫດການດັ່ງກ່າວ, ມາຮອດວັນທີ 8 ສິງຫາ 2018 ນາຍົກລັດຖະມົນຕີ ໄດ້ອອກຂໍ້ຕົກລົງ ເລກທີ 54/ນຍ ແຕ່ງຕັ້ງຄະນະຮັບຜິດຊອບ ສືບສວນ-ສອບສວນ ສາເຫດຄູກັ້ນນໍ້າເຂື່ອນໄຟຟ້າ ເຊປ່ຽນ-ເຊນໍ້ານ້ອຍພັງ ແລະ ອອກຂໍ້ຕົກລົງ ເລກທີ 55/ນຍ ແຕ່ງຕັ້ງຄະນະກວດກາຄວາມຮັບຜິດຊອບຂອງບຸກ ຄົນທີ່ຕິດພັນກັບສາເຫດ ທີ່ີເຮັດໃຫ້ຄູກັ້ນນໍ້າຂອງເຂື່ອນໄຟຟ້າເຊປ່ຽນ-ເຊນໍ້ານ້ອຍແຕກພັງ, ໂດຍມີ ທ່ານ ບຸນທອງ ຈິດມະນີ ຮອງນາຍົກລັດຖະມົນຕີ, ປະທານອົງການກວດກາລັດຖະບານ, ຫົວໜ້າຄະນະຕ້ານການສໍ້ລາດບັງຫລວງຂັ້ນສູນກາງ ເປັນຜູ້ຊີ້ນໍາທັງສອງຄະນະ ຈາກນັ້ນ, ຄະນະດັ່ງກ່າວ ໄດ້ສ້າງແຜນການເຄື່ອນໄຫວ ແລະ ແຕ່ງຕັ້ງບັນດາໜ່ວຍງານ ຮັບຜິດຊອບຊ່ວຍວຽກຕ່າງໆ ຂຶ້ນມາ ພ້ອມທັງເຊີນຜູ້ຊ່ຽວຊານ ຈາກຕ່າງປະເທດເພື່ອມາກວດກາຊ່ວຍ.
ມາຮອດວັນທີ 19-20 ສິງຫາ 2018 ທ່ານ ບຸນທອງ ຈິດມະນີ ຮອງນາຍົກລັດຖະມົນຕີ, ປະທານອົງການກວດກາລັດຖະບານ, ຫົວໜ້າອົງການຕ້ານການສໍ້ລາດບັງຫລວງຂັ້ນສູນກາງ ຜູ້ຊີ້ນຳຄະນະຮັບຜິດຊອບສືບສວນ-ສອບສວນ ຄູກັນນໍ້າເຂື່ອນໄຟຟ້າເຊປ່ຽນ-ເຊນໍ້ານ້ອຍແຕກພັງ, ໂດຍມີ ທ່ານ Schlies ANTON ຈາກປະເທດ ສະວິດ ພ້ອມດ້ວຍນັກວິຊາການທີ່ກ່ຽວຂ້ອງຈຳນວນໜຶ່ງ ໄດ້ເດີນທາງລົງໄປກວດສະພາບການແຕກພັງຕົວຈິງ ຂອງສັນເຂື່ອນ D ແລະ ພຶ້ນທີ່ເຂື່ອນຊ່ວຍອື່ນໆ. ໂດຍມີເຈົ້າແຂວງຈໍາປາສັກ ແລະ ແຂວງ ອັດຕະປື ລົງຕິດຕາມນໍາ.
ໃນໂອກາດນີ້, ທ່ານຮອງນາຍົກລັດຖະມົນຕີ ໄດ້ຮັບຟັງການລາຍງານສະພາບໂດຍລວມເຕັກ ນິກຂອງໂຄງການ, ລາຍງານສາເຫດສັນເຂື່ອນແຕກພັງຈາກ ບໍລິສັດ ຜູ້ລົງທຶນ, ການລາຍງານກ່ຽວກັບຜົນຂອງການ ກວດສອບສາເຫດການແຕກພັງເບຶ້ອງຕົ້ນ ຈາກຜູ້ຮັບເໝົາ ແລະ ປຶກສາຫາລືບັນຫາຕ່າງໆ ຮ່ວມກັບບໍລິສັດຮັບເໝົາ ແລະ ວິຊາການຝ່າຍຕ່າງໆ ໃນການກວດກາບັນດາເຕັກນິກການກໍ່ສ້າງ ລວມທັງການຊອກຫາສາເຫດຕົ້ນຕໍ ທີ່ສົ່ງຜົນເຮັດໃຫ້ສັນເຂື່ອນແຕກພັງຄັ້ງນີ້.ໂອກາດນີ້, ທ່ານຮອງນາຍົກລັດຖະມົນຕີ, ກໍ່ໄດ້ໂອ້ລົມຕໍ່ການນໍາທັງສອງແຂວງ ຈໍາປາສັກ ແລະ ອັດຕະປື ເຊິ່ງທ່ານໄດ້ເນັ້ນໃຫ້ການນຳທັງ 2 ແຂວງ ສືບຕໍ່ເອົາໃຈໃສ່ ໃນການຊ່ວຍເຫລືອປະຊາຊົນທີ່ໄດ້ຮັບຜົນກະທົບ ຈາກໄພພິບັດນ້ຳຖ້ວມເປັນຕົ້ນແມ່ນແຂວງອັດຕະປື ສືບຕໍ່ເອົາໃຈໃສ່ຟື້ນຟູການເປັນຢູ່ ຂອງປະຊາຊົນໃຫ້ຄືນສູ່ສະພາບເດີມໂດຍໄວ ເພື່ອ ເຮັດໃຫ້ປະຊາຊົນມີຊີວິດດີຂື້ນ. ສ່ວນບັນດາທ່ານທີ່ຮັບຜິດຊອບໃນການກວດກາ, ສືບ ສວນ-ສອບສວນ ຕ້ອງໄດ້ເອົາໃຈໃສ່ ຮີບຮ້ອນໃນການກວດກາຊອກຫາສາເກດການ ແຕກພັງຂອງສັນເຂື່ອນ ໂດຍອີງໃສ່ບັນດາຂໍ້ມູນທີ່ທາງບໍລິສັດອອກແບບ, ບໍລິສັດຜູ້ຮັບເໝົາກໍ່ສ້າງ, ບໍລິສັດລົງທຶນ ສະໜອງໃຫ້ ລວມທັງຂໍ້ມູນຈາກການລົງກວດກາຕົວຈິງ, ຂໍ້ມູນຈາກວີດີໂອ, ຮູບຖ່າຍຕ່າງໆ ທັງກ່ອນ ແລະ ຫລັງການກໍ່ສ້າງ ເພື່ອມາເປັນຂໍ້ມູນໃນການວິເຄາະຫາສາເຫດ. ພ້ອມທັງຍົກສູງສະຕິຕໍ່ຄວາມຮັບຜິດຊອບ ຕໍ່ໜ້າທີ່ໃນໜ້າທີ່ທີ່ໄດ້ຮັບການມອບໝາຍ ຈາກຂັ້ນເທິງ ເພື່ອຮັບປະກັນຄວາມໂປ່ງໃສ, ຍຸຕິທໍາໃນການກວດກາ. ບັນດາບໍລິສດຜູ້ຮັບເໝົາຕ້ອງໄດ້ເອົາໃຈໃສ່ສະໜອງຂໍ້ມູນຕ່າງໆ ໃຫ້ແກ່ນັກວິຊາການທັງລາວ ແລະ ຕ່າງປະເທດ ແລະ ອໍານວຍຄວາມສະດວກ ໃນການເຄື່ອນໄຫວວຽກງານກວດກາ ຂອງຄະນະຮັບຜິດຊອບເພື່ອເຮັດໃຫ້ການກວດາ, ສືບສວນ-ສອບສວນສໍາເລັດ ຕາມກໍານົດເວລາ ແລະ ສາມາດແກ້ໄຂບັນຫາທີ່ເກີດຂຶ້ນມີປະສິດທິພາບ, ປະສິດທິຜົນ, ຖືກຕ້ອງຕາມກົດໝາຍ ແລະ ຄວາມເປັນຈິງ.