ນາຍົກລັດຖະມົນຕີ ລົງຕິດຕາມສະພາບນໍ້າຖ້ວມຢູ່ນະຄອນຫລວງວຽງຈັນ

ຂປລ. ໃນຕອນແລງວັນທີ 20 ສິງຫາ 2018, ທ່ານ ທອງລຸນ ສີສຸລິດ ນາຍົກລັດຖະມົນຕີແຫ່ງ ສປປ ລາວ ພ້ອມດ້ວຍຄະນະ ໄດ້ລົງຕິດຕາມສະພາບນໍ້າຂອງໄຫລຖ້ວມ ຢູ່ນະຄອນຫລວງວຽງຈັນ, ໂດຍສະເພາະແມ່ນ ຢູ່ເຂດສວນເຈົ້າອະນຸວົງ ເມືອງຈັນທະບູລີ ແລະເຂດເມືອງສີໂຄດຕະບອງ ນະຄອນຫລວງວຽງຈັນ, ໂດຍມີ ທ່ານເຈົ້າຄອງນະຄອນຫລວງວຽງຈັນ, ນາຍບ້ານໆໜອງດາ, ເຈົ້າໜ້າທີ່ກ່ຽວ ຂ້ອງ ລົງຕິດຕາມສະພາບນໍ້າຖ້ວມ ຢູ່ເຂດເມືອງດັ່ງກ່າວ.

ຕາມການລາຍງານຂອງເຈົ້າເມືອງ ເມືອງສີໂຄດຕະບອງໄດ້ໃຫ້ຮູ້ວ່າ: ປັດຈຸບັນ ສະພາບນໍ້າຂອງໄດ້ໄຫລຖ້ວມ 6ບ້ານ ມີ 480ຄອບຄົວ, ຈໍານວນ 2.384ຄົນ ເຊັ່ນ: ບ້ານໜອງດາ, ບ້ານໂນນ ຂີ້ ເຫລັກ, ບ້ານຕາດທອງ, ບ້ານດ່ານຄໍາ, ບ້ານອ່າງຄໍາ, ບ້ານດອນຊິງຊູ້. ໃນນັ້ນ, ບ້ານທີ່ໄດ້ຮັບຜົນກະທົບໜັກ ມີບ້ານໜອງດາ, ບ້ານໂນນຂີ້ເຫລັກ, ບ້ານຕາດທອງ. ປັດຈຸບັນ, ປະຊາຊົນບ້ານດັ່ງກ່າວ, ໄດ້ ຖືກຍົກຍ້າຍມາຢູ່ໂຮງຮຽນປະຖົມໜອງດາ, ວັດຕາດທອງ, ຫ້ອງການບ້ານໂນນຂີ້ເຫລັກ ເປັນທີ່ຮຽບຮ້ອຍແລ້ວ, ສ່ວນປະຊາຊົນ ຢູ່ບ້ານດ່ານຄໍາ ແມ່ນໄດ້ຍົກຍ້າຍໄປອາໄສຢູ່ກັບຍາດພີ່ນ້ອງ.
ໂອກາດດຽວກັນນີ້,ທ່ານນາຍົກລັດຖະມົນຕີ ກໍໄດ້ລົງຢ້ຽມຢາມປະຊາຊົນທີ່ພັກອາໄສຢູ່ໂຮງ ຮຽນປະຖົມບ້ານໜອງດາ ແລະ ສູນອື່ນໆ ໂດຍທ່ານ ໄດ້ຊີ້ນໍາໃຫ້ພາກສ່ວນກ່ຽວຂ້ອງເອົາໃຈໃສ່ໃຫ້ ການ ຊ່ວຍເຫລືອ ພໍ່ແມ່ປະຊາຊົນ ທີ່ໄດ້ຮັບຜົນກະທົບຈາກໄພນໍ້າຖ້ວມຢ່າງຮີບດ່ວນ.
ແຈ້ງການພະຍາກອນອາກາດ ຈາກກົມອຸຕຸນິຍົມໃຫ້ຮູ້ວ່າ: ຕອນແລງຂອງວັນທີ 21 ສິງຫາ 2018, ລະດັບນໍ້າຂອງຍັງສືບຕໍ່ຈະສູງຂຶ້ນຕື່ມ. ດັ່ງນັ້ນ, ຈຶ່ງແຈ້ງມາຍັງພໍ່ແມ່ປະຊາຊົນໃຫ້ມີສະຕິ ກຽມຮັບ ມືກັບສະພາບນໍ້າຖ້ວມໃນຄັ້ງນີ້ ແລະ ໃຫ້ຕິດການແຈ້ງການຈາກກົມອຸຕຸນິຍົມເປັນປະຈໍາ.