ເປີດການແຂ່ງຂັນຄັດເລືອກຜະລິດຕະພັນສື່ ແລະ ພິມຈຳໜ່າຍ

ຂປລ. ເນື່ອງໃນໂອກາດວັນສື່ມວນຊົນ ແລະ ວັນພິມຈຳໜ່າຍຄົບຮອບ 68 ປີ (13/8/1950-13/8/2018) ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ຮ່ວມກັບ ສະມາຄົມນັກຂ່າວ ແຫ່ງ ສປປ ລາວ ຈັດການແຂ່ງຂັນ ຄັດເລືອກຜະລິດຕະພັນສື່ ແລະ ພິມຈຳໜ່າຍດີເດັ່ນ ໃນຫົວຂໍ້ “ ປີທ່ອງທ່ຽວ 2018 ”.

ທ່ານ ສະຫວັນຄອນ ລາຊະມຸນຕີຮອງລັດຖະມົນຕີ ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ໄດ້ກ່າວໃນງານຖະແຫລງຂ່າວ ໃນວັນທີ 19 ກໍລະກົດ 2018 ນີ້ວ່າ: ການຈັດການແຂ່ງຂັນດັ່ງກ່າວ, ແມ່ນໜຶ່ງໃນກິດຈະກຳ ສະເຫລີມສະຫລອງ ວັນສື່ມວນຊົນ ແລະ ວັນພິມຈຳໜ່າຍ ຄົບຮອບ 68 ປີ ທັງເປັນການສົ່ງເສີມ ພາລະບົດບາດຂອງສື່ມວນຊົນ ໃນການ ປະກອບ ສ່ວນຊຸກຍູ້ ການພັດທະນາເສດຖະກິດ-ສັງຄົມ, ໂດຍການແຂ່ງຂັນປະກອບມີ 5 ປະເພດ ຄື: ຂ່າວປີທ່ອງທ່ຽວລາວ 2018, ບົດສາລະຄະດີ ປີທ່ອງທ່ຽວລາວ 2018, ພາບນິ້ງ ປີທ່ອງ ທ່ຽວລາວ 2018, ພາບວີດີໂອໂຄສະນາ ປີທ່ອງທ່ຽວລາວ 2018 (Video Clip) ແລະ ປຶ້ມຂໍ້ມູນຂ່າວສານ ດ້ານການທ່ອງທ່ຽວປີ 2018. ສຳລັບຜະລິດຕະພັນທີ່ໄດ້ຮັບການຄັດເລືອກ ຈະໄດ້ຮັບເງິນລາງວັນ ປະເພດລະ 5 ລ້ານກີບ ເຊິ່ງຈະເລີ່ມຄັດເລືອກໃນ ລະຫວ່າງ ວັນທີ 9-10 ສິງຫາ ແລະ ມອບລາງວັນ ໃນວັນທີ 13 ສິງຫາ 2018.
ໃນການຄັດເລືອກດັ່ງກ່າວ, ບັນດາອົງການສື່ ແລະ ສຳນັກພິມຕ່າງໆ ໃນຂອບເຂດທົ່ວປະ ເທດ ສາມາດຄັດເລືອກເອົາຜະລິດຕະພັນດີເດັ່ນ ຂອງຕົນ ສົ່ງເຂົ້າແຂ່ງຂັນປະເພດລະຢ່າງ ແລະ ສາມາດສົ່ງໄດ້ທັງ 5 ປະເພດ ໂດຍບໍ່ເສຍຄ່າ, ເຊິ່ງຜະລິດຕະພັນແຕ່ລະຊະນິດ ຕ້ອງມີອົງປະກອບຄົບຖ້ວນ, ມີເນື້ອໃນສ່ອງແສງເຖິງ ປີທ່ອງທ່ຽວລາວ 2018 ແລະ ຕ້ອງຜ່ານການພິມ ຫລື ກະຈາຍອອກ ໃນລະຫວ່າງວັນທີ 13 ສິງຫາ 2017 ຫາ ວັນທີ 5 ສິງຫາ 2018. ອົງການສື່ ຫລື ສຳນັກພິມ ຕ້ອງອັດຜະລິດຕະພັນດີເດັ່ນ, ຊື່ຫົວຂໍ້, ຄວາມຍາວ, ວັນອອກອາກາດ ຫລື ຈຳໜ່າຍ, ຊື່ຜູ້ຜະລິດ, ຊື່ທີ່ຢູ່ ແລະ ເລກໂທລະສັບຕິດຕໍ່ ຂອງຜູ້ສົ່ງລົງໃສ່ແຜນ CD ແລະ DVD.
ທ່ານໃດຫາກມີຄວາມສົນໃຈ ຢາກສົ່ງຜະລິດຕະພັນ ຂອງຕົນເຂົ້າແຂ່ງຂັນ ສາມາດສົ່ງໄດ້ທີ່ຫ້ອງການໂທລະພາບແຫ່ງຊາດ ແລະ ຫ້ອງການສະມາຄົມນັກຂ່າວຫລັງໃໝ່, ໂດຍຈະປິດຮັບສະໜັກ ບໍ່ໃຫ້ກາຍວັນທີ 5 ສິງຫາ 2018 ນີ້.