ຂະແໜງທ່ອງທ່ຽວ ທົບທວນຜົນການຈັດຕັ້ງປະຕິບັດ ປີ ທ່ອງທ່ຽວລາວ 2018

ຂປລ. ໃນວັນທີ 13 ກໍລະກົດ 2018 ທີ່ຫໍວັດທະນະທຳແຫ່ງຊາດ ນະຄອນ ຫລວງວຽງຈັນ, ໄດ້ຈັດກອງປະຊຸມທົບທວນ ຜົນການຈັດຕັ້ງປະຕິບັດປີທ່ອງທ່ຽວ 2018 ແລະ ທິດທາງແຜນການ ໃນຕໍ່ໜ້າ, ໂດຍການເປັນປະທານຂອງ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ທັງເປັນປະທານຊີ້ນຳລະດັບຊາດໃນການຈັດປີທ່ອງທ່ຽວລາວ 2018, ມີ ທ່ານ ບໍ່ແສງຄຳ ວົງດາລາ ລັດຖະມົນຕີ ກະຊວງ ຖະແຫລງຂ່າວ, ວັດທະນະທຳ ແລະ ທ່ອງທ່ຽວ, ບັນດາລັດຖະມົນຕີ, ຮອງລັດຖະມົນຕີ, ຮອງຫົວໜ້າຫ້ອງວ່າການ ສຳນັກງານນາຍົກລັດຖະມົນຕີ, ຮອງເຈົ້າຄອງນະ ຄອນຫລວງວຽງ ຈັນ, ບັນດາ ຮອງເຈົ້າ ແຂວງ, ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.


ກອງປະຊຸມດັ່ງກ່າວ, ຈັດຂຶ້ນເພື່ອສະຫລຸບ ຜົນການຈັດຕັ້ງປະຕິບັດ ບັນດາກິດຈະກຳສົ່ງເສີມ ແລະ ໜ້າວຽກອື່ນໆ ທີ່ຕິດພັນກັບການສົ່ງເສີມ ການທ່ອງທ່ຽວລາວ ໃນ 6 ເດືອນຕົ້ນປີ; ພ້ອມທັງຈະໄດ້ປຶກສາຫາລື-ທົບທວນຄືນ ກ່ຽວກັບການຈັດກິດຈະກຳດັ່ງກ່າວ ແລະ ຮ່ວມກັນກຳນົດທິດທາງແຜນ ການ ສຳລັບ 6 ເດືອນທ້າຍປີ ແນ່ໃສ່ເຮັດໃຫ້ການຈັດປີທ່ອງທ່ຽວລາວ 2018 ໃນຄັ້ງນີ້, ປະສົບຜົນສຳເລັດຢ່າງຈົບງາມ ໂດຍສະເພາະ ແມ່ນການໂຄສະນາດຶງດູດນັກທ່ອງທ່ຽວ ໃຫ້ເຂົ້າມາທ່ອງທ່ຽວລາວ ໃຫ້ໄດ້ 5 ລ້ານເທື່ອຄົນ ໃນປີ 2018, ພ້ອມດຽວກັນ ກໍເປັນການສ້າງຂະບວນການທົ່ວສັງຄົມ ໃນການປະກອບສ່ວນພັດທະນາ ແລະ ສົ່ງເສີມການທ່ອງທ່ຽວ.
ໃນໂອກາດດັ່ງກ່າວ, ທ່ານ ສອນໄຊ ສີພັນດອນ ໄດ້ກ່າວວ່າ: ການຈັດປີທ່ອງທ່ຽວ 2018 ນີ້, ຖືເປັນວຽກງານທີ່ສຳຄັນທີ່ສຸດ, ນອກຈາກເປັນການສົ່ງເສີມການທ່ອງທ່ຽວແລ້ວ ຍັງເປັນການອະນຸ ລັກວັດທະນະທຳ ທີ່ເປັນເອກະລັກ ແລະ ຮີດຄອງປະເພນີອັນດີງາມ ຂອງ ສປປ ລາວ. ພ້ອມນີ້, ການຈັດປີທ່ອງທ່ຽວລາວ 2018 ຍັງເປັນການສ້າງຂະບວນການ ໂຄສະນາເຜີຍແຜ່ວຽກງານທ່ອງທ່ຽວ ເພື່ອກະຕຸ້ນເສດຖະກິດທາງກົງ ແລະ ທາງອ້ອມ, ໂດຍສະເພາະ ແມ່ນບັນດາຫົວໜ່ວຍທຸລະກິດ ທີ່ປິ່ນອ້ອມໃນຂະແໜງການທ່ອງທ່ຽວ. ໃນຊຸມປີຜ່ານມາລັດຖະບານແຫ່ງ ສປປ ລາວ ໄດ້ຖືເອົາການທ່ອງ ທ່ຽວເປັນຂະແໜງການບູລິມະສິດໜຶ່ງ ເພື່ອຊຸກຍູ້ການພັດທະນາເສດຖະກິດ-ສັງຄົມ, ເປັນຂະແໜງການທີ່ພາໃຫ້ມີການສະສົມເງິນຕາ ແລະ ມີການໝູນວຽນເງິນຕາ ພາຍໃນປະເທດເປັນຢ່າງດີ, ສ້າງວຽກ ເຮັດ ງານທຳໃຫ້ແກ່ປະຊາຊົນ ໃນຂົງເຂດວຽກງານບໍລິການ ແລະ ການຜະລິດ, ເປັນຕົ້ນ ແມ່ນການຜະລິດກະສິກຳ ແລະ ຫັດຖະກຳ, ໂດຍຖືເປັນການສົ່ງອອກກັບທີ່ ແລະ ການກະຈາຍລາຍໄດ້ ໃຫ້ສູ່ທ້ອງຖິ່ນ ກໍຄືເຂດຊົນນະບົດຫ່າງໄກສອກຫລີກ.