ກະຊວງ ຖວທ ເຜີຍແຜ່ເອກະສານ ສະພາບການຊາຍແດນ ລາວ-ກໍາປູເຈຍ

ຂປລ. ຄະນະພັກ, ພະນັກງານ-ລັດຖະກອນ ກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ (ຖວທ) ໄດ້ຮັບຟັງການເຜີຍແຜ່ສະພາບການຊາຍແດນ ລາວ-ກໍາປູເຈຍ ໃນວັນທີ 12 ກໍລະກົດ 2018, ໂດຍການບັນຍາຍເອກະສານຂອງ ທ່ານ ສະຫວັນຄອນ ລາຊະມຸນຕີ ຮອງລັດຖະມົນຕີກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ. ກອງປະຊຸມຄັ້ງນີ້, ເພື່ອເຮັດໃຫ້ສະມາຊິກພັກ, ພະນັກງານ-ລັດຖະກອນ ພາຍໃນກະຊວງ ຖວທ ໄດ້ຮັບຮູ້ສະພາບການ ແລະ ບັນຫາທີ່ເກີດຂຶ້ນ ທີ່ພົວພັນເຖິງຊາຍແດນ ລະຫວ່າງ ລາວ-ກໍາປູເຈຍ ຢ່າງຖືກຕ້ອງ, ເລິກເຊິ່ງ ແລະ ກວ້າງຂວາງທົ່ວເຖິງທຸກເປົ້າໝາຍ.

ທ່ານ ສະຫວັນຄອນ ລາຊະມຸນຕີ ໄດ້ຍົກໃຫ້ເຫັນຄວາມເປັນມາທາງດ້ານປະຫວັດສາດ ແຫ່ງການພົວພັນລະຫວ່າງ ລາວ-ກໍາປູເຈຍ ທີ່ມີມູນເຊື້ອຄວາມສາມັກຄີ ຮັກແພງຊ່ວຍເຫລືອເຊິ່ງກັນ ແລະ ກັນມາແຕ່ບູຮານນະການ, ທັງສອງຊາດ ລ້ວນແລ້ວແຕ່ມີພາສາປາກເວົ້າ, ມີໂຕໜັງສືຂຽນ, ມີຮີດຄອງປະເພນີ, ມີປະຫວັດສາດ ແລະ ວັດທະນະທໍາ ອັນເກົ່າແກ່ທີ່ເປັນເອກະລັກ ຂອງໃຜລາວ, ມີການພົວພັນການຮ່ວມມືລະຫວ່າງ ສອງປະເທດລາວ-ກໍາປູເຈຍ ໄດ້ຮັບການປັບປຸງ ແລະ ພັດທະນາຢ່າງຕໍ່ເນື່ອງ.
ສປປ ລາວ ແລະ ຣາຊະອານາຈັກ ກໍາປູເຈຍ ມີສາຍແດນຮ່ວມກັນປະມານ 535 ກິໂລແມັດ, ເບື້ອງລາວ ມີແຂວງຈໍາປາສັກ ແລະ ແຂວງອັດຕະປື, ເບື້ອງກໍາປູເຈຍ ມີແຂວງເພຣຍວີເຮຍ, ແຂວງຊຽງແຕງ ແລະ ແຂວງລັດຕະນະຄິຣີ ເພື່ອເປັນບ່ອນອີງໃຫ້ແກ່ການຈັດຕັ້ງ ປະຕິບັດວຽກງານສາຍແດນ ກໍຄືການສໍາຫລວດ ແລະ ປັກຫລັກໝາຍຊາຍແດນຮ່ວມກັນ; ໃນວັນທີ 22 ພະຈິກ 1995 ຄະນະຜູ້ແທນລັດຖະບານ ຂອງສອງປະເທດ ໄດ້ພ້ອມກັນພິຈາລະນາ ແລະ ຮັບຮອງເອົາ 4 ຫລັກການພື້ນຖານນໍາກັນ, ໂດຍມີເນື້ອໃນລະອຽດ ບົນພື້ນຖານ ຮັບຮູ້ເຂດແດນຕິດຕໍ່ກັນ, ເຂດແດນທີ່ມີມາແຕ່ສະໄໝຕົກເປັນຫົວເມືອງ ໂດຍອີງຕາມແຜນທີ່ 1/100.000 ແລະ ແຜນທີ່ອື່ນໆ ທີ່ກ່ຽວຂ້ອງພິມອອກແຕ່ປີ 1933-1953, ໂດຍພະແນກແຜນທີ່ ຂອງອິນດູຈີນ, ບົນພື້ນຖານຫລັກການຕ່າງໆ ທີ່ສາກົນຮັບຮູ້ກ່ຽວກັບການຂີດເສັ້ນສາຍແດນ, ການຄໍານຶງເຖິງເຂດທີ່ປະຊາຊົນ ຄຸ້ມຄອງຕົວຈິງ ທີ່ສືບທອດກັນມາຫລາຍເຊັ່ນຄົນແລ້ວ ແລະ ບົນພື້ນຖານຂອງຄວາມສະເໝີພາບທ່ຽງທໍາ, ສົມເຫດສົມຜົນ, ຜ່ອນສັ້ນຜ່ອນຍາວໃຫ້ກັນ, ເຄົາລົບສິດ ແລະ ຜົນປະໂຫຍດຂອງກັນ ແລະ ເປັນເອກະພາບຢ່າງສົມບູນ.