ກອງປະຊຸມສຸດຍອດສື່ມວນຊົນ ຂອບການຮ່ວມມື ແມ່ນໍ້າຂອງ-ແມ່ນ້ຳລ້ານຊ້າງ 2018 ຈະຈັດຂຶ້ນ 1-3 ກໍລະກົດນີ້

ຂປລ. ໃນວັນທີ 27 ມິຖຸນາ 2018 ທີ່ນະຄອນຫລວງວຽງຈັນ, ທ່ານ ສະຫວັນຄອນ ລາຊະມົນຕີ ຮອງລັດຖະມົນຕີ ກະຊວງຖະຫລງຂ່າວ, ວັດທະນະທຳ ແລະ ທ່ອງທ່ຽວ ໄດ້ຖະແຫລງຂ່າວ ກ່ຽວກັບກອງປະຊຸມສຸດຍອດສື່ມວນຊົນ ຂອບການຮ່ວມມືແມ່ນ້ຳຂອງ-ແມ່ນ້ຳລ້ານຊ້າງ 2018 ທີ່ຈະຈັດຂຶ້ນໃນລະຫວ່າງ ວັນທີ 1-3 ກໍລະກົດ 2018 ນີ້, ທີ່ນະຄອນຫລວງວຽງຈັນ ໂດຍການເປັນປະທານຮ່ວມ ລະຫວ່າງ ກະຊວງຖະຫລງຂ່າວ, ວັດທະນະທຳ ແລະ ທ່ອງທ່ຽວ ແລະ ໜັງສືພິມປະ ຊາຊົນລາຍວັນ ສປ.ຈີນ ພາຍໃຕ້ຫົວຂໍ້ “ການຮ່ວມມືປະຊາຄົມ ແມ່ນ້ຳຂອງ-ແມ່ນ້ຳລ້ານຊ້າງ ເພື່ອອານາຄົດອັນສະຫວ່າງສະໄຫວ”,

ໂດຍຈະມີການນຳຂັ້ນສູງພັກ-ລັດ ຂອງ ສປປ ລາວ ແລະ ສປ.ຈີນ, ການນຳ ແລະ ຜູ້ແທນສື່ມວນຊົນ ຈາກ 6 ປະເທດສະມາຊິກຂອບການຮ່ວມມື ແມ່ນ້ຳຂອງ-ແມ່ນ້ຳລ້ານຊ້າງເຂົ້າຮ່ວມ ເຊັ່ນ: ລາວ, ຈີນ, ກຳປູເຈຍ, ຫວຽດນາມ, ໄທ, ແລະ ມຽນມາ.
ທ່ານ ສະຫວັນຄອນ ລາຊະມົນຕີ ໃຫ້ຮູ້ວ່າ: ເນື້ອໃນທີ່ຈະປຶກສາຫາລື ໃນກອງປະຊຸມໃນຄັ້ງນີ້, ຈະສັງເກດຕີລາຄາລວມ ການຈັດຕັ້ງປະຕິບັດຖະແຫລງການຮ່ວມ ຂອງກອງປະຊຸມສຸດຍອດສື່ມວນຊົນ ຂອບການຮ່ວມມືແມ່ນ້ຳຂອງ-ແມ່ນ້ຳລ້ານຊ້າງ 2017 ທີ່ໄດ້ເຊັນຮັບຮອງ ທີ່ນະຄອນຫລວງປັກກິ່ງ, ພ້ອມທັງຈະປຶກສາຫາລື ແລກປ່ຽນຄວາມຄິດຄວາມເຫັນນຳກັນ ເພື່ອສືບຕໍ່ການຮ່ວມມື ໃນຂົງເຂດສື່ມ່ວນຊົນ, ໂດຍຈະເນັ້ນໃສ່ 2 ຫົວຂໍ້ ຄື: ສື່ແບບໃໝ່ ແລະ ການສົ່ງເສີມການທ່ອງທ່ຽວ. ພ້ອມນີ້. ກອງປະ ຊຸມຍັງຈະໄດ້ປະຕິບັດ ຜົນກອງປະຊຸມຜູ້ນໍາ ປະເທດແມ່ນ້ຳຂອງ-ແມ່ນ້ຳລ້ານຊ້າງ ຄັ້ງທີ 2 ທີ່ຈັດຂຶ້ນໃນກາງເດືອນມັງກອນ 2018 ທີ່ນະຄອນຫລວງພະນົມເປັນ ຣາຊະອານາຈັກກຳປູເຈຍ ພາຍໃຕ້ຫົວຂໍ້ “ແມ່ນ້ຳແຫ່ງສັນຕິພາບຂອງພວກເຮົາ ແລະ ການພັດທະນາແບບຍືນຍົງ” ເຊິ່ງຜູ້ນຳ 6 ປະເທດໄດ້ເປັນເອກະພາບກັນ ແລະ ຮັບຮອງເອົາ 4 ເອກະສານສຳຄັນ ຄື: ຖະແຫລງການພະນົມເປັນວ່າດ້ວຍ “ແມ່ນ້ຳແຫ່ງສັນຕິພາບຂອງພວກເຮົາ ແລະ ການພັດທະນາແບບຍືນຍົງ”, ແຜນປະຕິບັດງານ 5 ປີ ຂອບການຮ່ວມມືແມ່ນ້ຳຂອງ-ແມ່ນ້ຳລ້ານຊ້າງ ປີ 2018-2022, ບັນຊີໂຄງການ ໄດ້ຮັບການສະໜັບສະໜູນ ສປ ຈີນ ໄລຍະທີ 2 ເຊິ່ງບັນຊີດັ່ງກ່າວ ແມ່ນ 6 ປະເທດສະມາຊິກເປັນຜູ້ສະເໜີ ຕໍ່ ສປ ຈີນ ໃນນັ້ນລາວ ໄດ້ສະເໜີ 26 ໂຄງການ ແລະ ບົດລາຍງານຂອງ 6 ໜ່ວຍງານວິຊາການ ຂອງ 5 ຂະແໜງການບູລິມະສິດ ຂອງຂອບການຮ່ວມມືແມ່ນ້ຳຂອງ-ແມ່ນ້ຳລ້ານຊ້າງ.
ພ້ອມນີ້, ບັນດານັກຂ່າວ ທີ່ຈະມາເຂົ້າຮ່ວມ ກອງປະຊຸມສຸດຍອດສື່ມວນຊົນ ຂອບການຮ່ວມມືແມ່ນ້ຳຂອງ-ແມ່ນ້ຳລ້ານຊ້າງ 2018 ທີ່ນະຄອນຫລວງວຽງຈັນ ຈະໄດ້ໄປຢ້ຽມຢາມ ແລະ ເກັບກຳຂ່າວ ຢູ່ແຂວງຫລວງພະບາງ ແລະ ແຂວງຈຳປາສັກ.