ປະທານປະເທດ ໂອ້ລົມທະຫານແຂວງ ຫລວງພະບາງ

ຂປລ.ໃນຕອນບ່າຍ ຂອງວັນທີ 14 ເມສາ 2018 ນີ້, ທີ່ຫ້ອງປະຊຸມໃຫຍ່ ຂອງທະຫານແຂວງ ຫລວງພະບາງ ທ່ານ ບຸນຍັງ ວໍລະຈິດ ປະທານປະເທດ ແຫ່ງ ສປປ ລາວ ໄດ້ເຂົ້າຢ້ຽມຢາມ ແລະ ພົບປະນາຍ ແລະ ພົນທະຫານ ກອງບັນຊາການທະຫານ ແຂວງຫລວງພະບາງ, ໂດຍ ໃຫ້ກຽດຕ້ອນຮັບຂອງ ທ່ານ ພົນຈັດຕະວາ ຄຳຫລ້າ ວົງວິໄລ ຫົວໜ້າການທະຫານ ກອງບັນຊາການທະຫານແຂວງ, ທ່ານ ຄຳຂັນ ຈັນທະວີສຸກ ເຈົ້າແຂວງ ຫລວງພະບາງ, ມີຄະພັກ, ຄະນະບັນຊາ ຕະຫລອດຮອດນາຍ ແລະ ພົນທະຫານ ເຂົ້າຮ່ວມ.

ໂອກາດນີ້, ທ່ານ ພັນເອກ ບຸນຊູ ດວງຄໍາມີ ຫົວໜ້າການເມືອງກອງບັນຊາການ ທະຫານແຂວງ ໄດ້ຂຶ້ນກ່າວຕ້ອນຮັບ ພ້ອມທັງລາຍງານຫຍໍ້ ໃຫ້ຮູ້ເຖິງສະພາບກົມກອງໃຫ້ ທ່ານ ປະທານປະເທດ ໄດ້ຮັບຮູ້, ໂດຍລວມ ແລ້ວທົ່ວແຂວງ ຫລວງພະບາງ ແມ່ນມີຄວາມສະຫງົບ ໂດຍພື້ນຖານ ປະຊາຊົນຢູ່ທ່າງ ທຳມາຫາກິນ ຜະລິດເສດຖະກິດ ແກ້ໄຂຊີວິດການເປັນຢູ່ດີຂຶ້ນ ຢ່າງຕໍ່ເນື່ອງ, ການໄປມາຫາສູ່ກັນ ມີ ຄວາມສະດວກສະບາຍ ປະຊາຊົນມີຄວາມເຊື່ອໝັ້ນ ຕໍ່ການນຳພາຂອງພັກ-ລັດ ເປັນຢ່າງດີ. ສະພາບກົມກອງ ພະນັກງານນັກຮົບ ມີຄວາມ ອຸ່ນອ່ຽງທຸ່ນທ່ຽງ ມີຄວາມເຊື່ອໝັ້ນ ຕໍ່ການນຳພາຂອງພັກຂອງລັດ, ມີຄວາມຫ້າວຫັນ ປະຕິບັດວຽກງານ ທີ່ຂັ້ນເທິງມອບໝາຍໃຫ້ ມີຜົນສຳເລັດ. ກອງບັນຊາການທະຫານ ແຂວງ ຫລວງພະບາງ ປະກອບມີ ອົງການ 5 ຫ້ອງ, ມີ 12 ກອງບັນຊາການ ທະຫານເມືອງ, ມີ 3 ກອງພັນນ້ອຍ, 11 ກອງ ຮ້ອຍເອກະລາດ, ມີ 2 ໜ່ວຍປະຕິບັດງານ ແລະ 1 ໂຮງຮຽນການທະຫານ ທ້ອງຖິ່ນ. ການຈັດຕັ້ງປະຕິບັດ ເຄື່ອນໄຫວໜ້າທີ່ວຽກງານ ເຮັດໃຫ້ສະພາບ ມີຄວາມສະຫງົບ ແມ່ນໄດ້ຫັນເອົາການລົງຮາກຖານ ການເມືອງຕາມ 4 ເນື້ອໃນ 4 ຄາດໝາຍ, ໂດຍລົງແບບມູນເຊື້ອມອບໃຫ້ ແຕ່ລະກົມກອງ ຢູ່ບ່ອນໃດ ແມ່ນມອບໃຫ້ກົມກອງນັ້ນຮັບຜິດຊອບ. ນອກນີ້, ຍັງໄດ້ສຸມໃສ່ ວຽກງານອື່ນໆ ທີ່ປິ່ນອ້ອມ ເຮັດໃຫ້ວຽກງານ ດັ່ງກ່າວ ມີການຂະຫຍາຍຕົວ ແລະ ມີຜົນສຳໃຫຍ່ຫລວງກວ່າເກົ່າ.
ຕອນທ້າຍ ທ່ານ ບຸນຍັງ ວໍລະຈິດ ໄດ້ມີຄຳເຫັນ ໂອ້ລົມ ກ່ອນອື່ນ ທ່ານ ໄດ້ສະແດງຄວາມຍ້ອງຍໍຊົມເຊີຍ ກັບຜົນສຳເລັດ ທີ່ກອງບັນຊາການທະຫານ ແຂວງຫລວງພະບາງ ຍາດມາໄດ້. ພ້ອມເນັ້ນໃຫ້ສືບຕໍ່ເຊີດຊູ ບົດບາດການເປັນຜູ້ນໍາ ເປັນຫລັກ ເປັນກຳລັງຫລັກແຫລ່ງ ໃນການປົກປັກຮັກສາຜືນແຜນດິນອັນຄົບຖ້ວນ ໄວ້ໃຫ້ໝັ້ນຄົງ, ສືບຕໍ່ເສີມຂະຫຍາຍມູນເຊື້ອ ເປັນກຳລັງຫລັກແຫລ່ງ ຫັນລົງກໍ່ສ້າງຮາກຖານ ການເມືອງ ທົ່ວປວງຊົນ ໃຫ້ເຂັ້ມແຂງ ໃນການປະກອບສ່ວນ ຢ່າງຕັ້ງໜ້າ ເຂົ້າໃນການປັບປຸງອຳນາດ ທິປະໄຕປະຊາຊົນ. ພ້ອມນີ້, ຕ້ອງຕັ້ງໜ້າຝຶກຝົນຫລໍ່ຫລອມ ທາງດ້ານຄຸນທາດການເມືອງຄຸນສົມບັດ ສິນທຳປະຕິວັດໃຫ້ໜັກແໜ້ນ ຍົກສູງຄວາມຮັບຜິດຊອບ ຕໍ່ຄວາມໝັ້ນຄົງຂອງຊາດ ກໍຄື ແຂວງຫລວງພະບາງ ໃຫ້ມີຄວາມສະຫງົບປອດໄພ. ເປັນເຈົ້າການ ເຄົາລົບ ແລະ ປະຕິບັດກົດໝາຍຂອງຂັ້ນເທິງ ວາງອອກຢ່າງເຂັ້ມງວດ, ຕັ້ງໜ້າປັບປຸງແບບແຜນວິທີເຮັດວຽກ ໃຫ້ມີປະສິດທິພາບ ມີປະສິດທິຜົນສູງ, ເພີ່ມທະວີຄວາມສາມັກຄີ ພາຍໃນກົມກອງໃຫ້ໜັກແໜ້ນ ເຂັ້ມແຂງ, ສືບຕໍ່ ສູ້ຊົນປະຕິບັດ 4 ແຜນງານ 26 ໂຄງການ ຂອງຄະນະພັກກະຊວງ ການປ້ອງກັນປະເທດວາງອອກ ໃຫ້ມີຜົນສຳເລັດ. ຕັ້ງໜ້າປັບປຸງ ແລະ ແກ້ໄຂຊີວິດການເປັນຢູ່ ຂອງກົມກອງໃຫ້ດີຂຶ້ນ, ຄຸ້ມຄອງປົກປັກຮັກສາພາຫະນະ ດ້ານເຕັກນິກທີ່ທັນສະໄໜ ເພື່ອຕອບສະໜອງ ໃຫ້ທັນເວລາ, ເອົາໃຈໃສແກ້ໄຂປະກົດການ ຫຍໍ້ທໍ້ຕ່າງໆ ທີ່ຈະເກີດຂຶ້ນ, ຕ້ານ ແລະ ສະກັດກັ້ນ ພະຍາດອາດຍາສິດ ລັດທິເອກະຊົນ, ຕ້ານການສໍ້ລາດບັງຫລວງ ທຸກຮູບແບບຢູ່ພາຍໃນພັກ, ຢູ່ໃນກົມກອງ ໃຫ້ມີປະສິດທິພາບ ສືບຕໍ່ພົວພັນຮ່ວມມື ກັບປະເທດເພື່ອນມິດ ນັບມື້ໃຫ້ດີຂຶ້ນ.
ການມາຢ້ຽມຢາມຂອງ ທ່ານ ປະທານປະເທດ ໃນຄັ້ງນີ້, ກໍໄດ້ລະດົມທຶນມາຊ່ວຍເຫລືອ ກອງບັນຊາການທະຫານ ແຂວງຫລວງພະບາງ ເຊັ່ນ: ທືນກໍ່ສ້າງຕຶກອາຄານ ແລະ ມອບຄອມພິວເຕີຈຳນວນ 10 ຊຸດ, ມູນຄ່າທັງໝົດ 1 ຕື້ກວ່າກີບ.