ປະຊາຊົນແຂວງຄໍາມ່ວນ ຫລິ້ນບຸນປີໃໝ່ລາວ ດ້ວຍຄວາມ ເບີກບານມ່ວນຊື່ນ

ຂປລ. ບັນຍາກາດ ການສົ່ງທ້າຍປີເກົ່າ ພສ 2560 ແລະ ຕ້ອນຮັບປີໃໝ່ລາວ ພສ 2561 ແມ່ນໄດ້ເລີ່ມ ມາແຕ່ ວັນທີ 14-16 ເມສາ 2018 ຕາມກໍານົດການ ທີ່ທາງລັດຖະການໄດ້ແຈ້ງການຜ່ານສື່ຕ່າງໆ ແຕ່ພິເສດປີນີ້ແມ່ນພັກຍາວມາຮອດວັນທີ 18 ເມສາ 2018. ສະເພາະ ຢູ່ແຂວງຄໍາມ່ວນ ແມ່ນໄດ້ຈັດໃຫ້ມີຫລາຍ ກິດຈະກໍາເຊັ່ນ : ການຫົດສົງພຣະພຸດທະຮູບ ຢູ່ຕາມວັດຕ່າງໆ, ການຂໍພອນນໍາຜູ້ອາວຸໂສ, ການອວຍໄຊໃຫ້ພອນ ຂອງຜູ້ອາວຸໂສແກ່ຜູ້ເກີດໃໝ່ໃຫຍ່ລຸນ, ການແຫ່ນາງສັງຂານ ແລະ ການຕົບພະຊາຍ ນອກຈາກນັ້ນຍັງມີກິດຈະກໍາ ມ່ວນຊື່ນຢູ່ຕາມສໍານັກງານອົງການຕ່າງໆ.

ສໍາລັບ ກິດຈະກໍາທີ່ມວນຊົນເຂົ້າຮ່ວມຫລາຍ ຄືການແຫ່ນາງສັງຂານ ເຊິ່ງປີນີ້ ຖືວ່າມີອຸປະສັກເລັກໜ້ອຍເນື່ອງຈາກວ່າ ສະພາບດິນຟ້າອາກາດບໍ່ເອື້ອອໍານວຍ ເກີດມີຝົນຕົກໃນຂະນະ ຈັດຂະບວນແຫ່ນາງສັງຂານ ແຕ່ສຸດທ້າຍການແຫ່ນາງສັງຂານ ກໍ່ສໍາເລັດລຸລ່ວງໄປດ້ວຍດີ. ສ່ວນນາງສັງຂານ ປະຈໍາປີ 2018 ນີ້ແມ່ນໄດ້ຜ່ານການຄັດເລືອກ ຈາກຄະນະກໍາມະການມາແຕ່ ວັນທີ 10 ເມສາ 2018 ເຊິ່ງມີຜູ້ສະໝັກທັງໝົດ 37 ຄົນຜ່ານການຄັດເລືອກຈາກຄະນະກໍາມະການ ຍັງເຫລືອ 7 ຄົນ ໂດຍຜູ້ທີ່ໄດ້ເປັນນາງສັງຂານ ປະຈໍາປີນີ້ໄດ້ແກ່ນາງ ວາລີ ທໍາມະວົງ ອາຍຸ 22 ປີ ມາຈາກບ້ານປາກດົງ ເມືອງທ່າແຂກ ແຂວງຄໍາມ່ວນ ແລະ ເປັນຜູ້ທີ່ໄດ້ຂຶ້ນນັ່ງ ເທິງຫລັງນົກຍຸງ ໂດຍແມ່ນລູກສາວຜູ້ທີ 7 ຂອງພະຍາກະບິນລະພົມ.
ຈາກນັ້ນ ວັນທີ 15 ເມສາ 2018 ອໍານາດການປົກຄອງ ພ້ອມດ້ວຍມວນຊົນຊາວເມືອງທ່າແຂກ ກໍໄດ້ແຫ່ຂະບວນນາງສັງຂານ ໄປຕາມສາຍທາງພາຍໃນເທສະບານ ເມືອງທ່າແຂກ ເຊິ່ງເລີ້ມຈາກ ຫໍຫລັກເມືອງ (ຖະໜົນສິງກະໂປສີໂຄດຈຸນລະມະນີ) ກ້ຽວມາຫາຖະໜົນວຽງຈັນ (ວົງວຽນນໍ້າພຸຫລັກ 2) ຕໍ່ໃສ່ຖະໜົນ ກຸວໍລະວົງ, ກ້ຽວມາຫາຖະໜົນອານຸວົງ ແລະ ໄດ້ອັນເຊີນພຣະພຸດທະຮູບ ແກ່ນຈັນປະຈໍາຫໍຫລັກເມືອງ ພ້ອມດ້ວຍພະສຽນ (ຫົວ) ຂອງພະຍາກະບິນລະພົມ ເພື່ອລົງຫົດສົງ ແລະ ທໍາພິທີທາງສາສະໜາ. ທາງການແຫ່ຂະບວນນາງສັງຂານ ໄປຕາມສາຍທາງພາຍໃນເທສະບານ ເມືອງທ່າແຂກ ນໍາໂດຍທ່ານ ຄໍາສີ ອຸດທິວົງ ຮອງເຈົ້າແຂວງໆ ຄໍາມ່ວນ, ທ່ານ ຈັນ ບຸບຜາລີວັນ ເຈົ້າເມືອງທ່າແຂກ ພ້ອມດ້ວຍຫົວໜ້າພະແນກການ ທີ່ກ່ຽວຂ້ອງ.