ລັດຖະມົນຕີ ຖວທ ຕ້ອນຮັບຜູ້ປະສານງານອົງການ UNESCO

ຂປລ.ໃນວັນທີ 12 ກຸມພາ 2018, ທ່ານ ບໍ່ແສງຄໍາ ວົງດາລາ ລັດຖະມົນຕີ ກະຊວງຖະແຫລງ ຂ່າວ, ວັດທະນະທໍາ ແລະ ທ່ອງທ່ຽວ (ຖວທ) ໄດ້ຕ້ອນຮັບ ການເຂົ້າຢ້ຽມຂໍ່ານັບ ຂອງ ທ່ານ ແອກເວ ໂຊລິຍັກ, ທີ່ປຶກສາແຄວັນ ອາກແດຊ, ຜູ້ປະສານງານ UNESCO ສໍາລັບ ຖໍ້າໂຊເວ ປະຈໍາສະຫະພັນຄຸ້ມຄອງພື້ນທີ່ ອະນຸລັກຖໍ້າໂຊເວ (SMERGC) ພ້ອມດ້ວຍຄະນະ ໃນໂອກາດ ທີ່ເດີນທາງມາຢ້ຽມຢາມ ແລະ ເຮັດວຽກ ຢູ່ ສປປ ລາວ ລະຫວ່າງ ວັນທີ 7-12 ກຸມພາ 2018.

ໃນໂອກາດດັ່ງກ່າວ, ທ່ານ ທ່ານ ບໍ່ແສງຄໍາ ວົງດາລາ ໄດ້ ສະແດງຄວາມຊົມເຊີຍ, ຍິນດີຕ້ອນ ຮັບ ແລະ ຕີລາຄາສູງຕໍ່ ທ່ານ ແອກເວ ໂຊລີຍັກ ທີ່ໄດ້ນຳພາຄະນະ ເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ໃນຄັ້ງນີ້, ເຊິ່ງເປັນການ ປະກອບສ່ວນ ສຳຄັນເຂົ້າ ໃນການພົວພັນຮ່ວມມື ລະ ຫວ່າງ ກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ ແລະ ອົງການຝຮັ່ງ ເພື່ອການພັດທະນາ ໃຫ້ໄດ້ຮັບການ ພັດທະນາ ແລະ ແຕກດອກອອກຜົນ ງອກງາມຍິ່ງໆຂຶ້ນ.
ໃນໂອກາດດຽວກັນນີ້, ທ່ານ ແອກເວ ໂຊລີຍັກ ກໍໄດ້ສະແດງ ຄວາມຂອບໃຈ ຕໍ່ ທ່ານ ບໍ່ແສງຄໍາ ວົງດາລາ ທີ່ໄດ້ ສະຫລະເວລາອັນມີຄ່າ ໃຫ້ການຕ້ອນຮັບ ອັນອົບອຸ່ນໃນຄັ້ງນີ້, ພ້ອມທັງແຈ້ງຈຸດປະສົງ ຂອງການເດີນທາງ ມາຢ້ຽມຢາມ ສປປ ລາວ ໃນຄັ້ງນີ້, ໃຫ້ ທ່ານລັດຖະມົນຕີ ຊາບຕື່ມອີກ.