ລັດຖະມົນຕີ ຖວທ ຕີລາຄາສູງການພົວພັນ ມືສອງສຳນັກ ຂ່າວສານປະເທດລາວ-ຊິນຮວາ

ຂປລ. ວັນທີ 2 ກຸມພາ 2018 ນີ້, ທ່ານ ບໍ່ແສງຄຳ ວົງດາລາ ກຳມະການສູນກາງພັກ, ລັດຖະມົນຕີກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ໄດ້ຕ້ອນຮັບການພົບ ປະຢ້ຽມຢາມຂອງ ທ່ານ ໄຈ ມີງເຈົ້າ ກຳມະການສູນກາງພັກ, ຮອງຫົວໜ້າຄະນະ ໂຄສະນາອົບຮົມສູນກາງພັກ ກອມມູນິດຈີນ, ປະທານສຳນັກຂ່າວສານຊິນຮວາ ສປ ຈີນ. ໃນໂອກາດທີ່ທ່ານເດີນທາງມາຢ້ຽມຢາມ ແລະ ຈັດກອງປະຊຸມເວທີປຶກສາຫາລືການຮ່ວມມື ລາວ-ຈີນ ໃນຂອບ “ໜຶ່ງແລວ ໜຶ່ງເສັ້ນທາງ” ຢູ່ ສປປ ລາວ ໃນລະຫວ່າງວັນທີ 1-4 ກຸມພາ ນີ້.

ທ່ານລັດຖະມົນຕີ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງຕໍ່ທ່ານ ໄຈ ມີງເຈົ້າ ທີ່ໄດ້ເດີນທາງມາຢ້ຽມຢາມ ແລະ ຈັດກອງປະຊຸມເວທີປຶກສາຫາລື ໃນຄັ້ງນີ້ ເຊິ່ງເປັນນິມິດ ໝາຍສຳຄັນທີ່ສຸດ ລະຫວ່າງ ສອງປະເທດພວກເຮົາ ໂດຍສະເພາະ ແມ່ນໃນຂດວຽກງານຂ່າວສານ ຕະຫລອດໄລຍະຜ່ານມາ ກໍຄື ປັດຈຸບັນການຮ່ວມມືແລກປ່ຽນ ທາງດ້ານສື່ມວນຊົນ ລະຫວ່າງ ສອງປະເທດ ໄດ້ດຳເນີນໄປຢ່າງຕໍ່ເນື່ອງ ພາຍໃຕ້ການຊີ້ນຳນຳພາຂອງ ພັກ-ລັດຖະບານ ຢ່າງມີປະສິດທິຜົນສູງ ອັນໄດ້ປະກອບສ່ວນເຂົ້າໃນວຽກງານການຮ່ວມມື ຍຸດທະສາດ ຮອບດ້ານ ລະຫວ່າງ ລາວ-ຈີນ. ໂອກາດນີ້ ທ່ານລັດຖະມົນຕີ ໄດ້ຕີລາຄາສູງຕໍ່ ການພົວພັນຮ່ວມມື ແລະ ການສະໜັບສະໜູນຊ່ວຍເຫລືອເຊິ່ງກັນ ແລະ ກັນລະຫວ່າງ ສຳນັກຂ່າວສານ ປະເທດລາວ ແລະ ສຳນັກຂ່າວສານຊິນຮວາ ຕະຫລອດໄລຍະຜ່ານມາ, ພ້ອມທັງສະແດງຄວາມຂອບໃຈ ມາຍັງສຳນັກຂ່າວຊິນຮວາ ກໍຄື ສປ ຈີນ ທີ່ໄດ້ໃຫ້ການຊ່ວຍເຫລືອ ແກ່ສຳນັກຂ່າວສານປະເທດລາວ ໃນ ໄລຍະຜ່ານມາ ແລະ ສະແດງຄວາມເຊື່ອໝັ້ນວ່າ ຂ່າວສານຊິນຮວາຈະສືບຕໍ່ ໃຫ້ການຊ່ວຍເຫລືອ ໂດຍສະເພາະ ດ້ານບຸກຄະລາກອນ, ອຸປະກອນ ແລະ ເຕັກນິກທີ່ທັນສະໄໝ.
ໂອກາດນີ້ ທ່ານ ໄຈ ມີງເຈົ້າ ໄດ້ສະແດງຄວາມຂອບອົກຂອບໃຈມາຍັງ ທ່ານລັດຖະມົນຕີ ບໍ່ແສງຄຳ ວົງດາລາ ທີ່ໄດ້ສະຫລະເວລາອັນມີຄຸນຄ່າ ໃຫ້ການຕ້ອນຮັບຢ່າງອົບອຸ່ນ ແລະ ຖືໂອກາດນີ້ ສະແດງຄວາມຂອບໃຈມາຍັງ ຄະນະໂຄສະນາອົບຮົມສູນກາງພັກ ປປ ລາວ, ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ແລະ ສຳນັກຂ່າວສານປະເທດລາວ ທີ່ໄດ້ໃຫ້ຄວາມຮ່ວມມື ແລະ ອຳນວຍຄວາມສະດວກທຸກຢ່າງ ເຮັດໃຫ້ເວທີປຶກສາຫາລືຄັ້ງນີ້ ດຳເນີນໄປຢ່າງມີຜົນສຳເລັດຈົບງາມ, ພ້ອມນີ້ ທ່ານຍັງສະແດງຄວາມເຊື່ອໝັນວ່າ ການພົວພັນຮ່ວມມື ລະຫວ່າງ ສອງສຳນັກຂ່າວສານຊິນຮວາ ແລະ ສຳນັກຂ່າວສານປະເທດລາວ ຈະສືບຕໍ່ໄດ້ຮັບການເສີມຂະຫຍາຍຕະຫລອດໄປ.