ລາວ-ຈີນ ເສີມຂະຫຍາຍການຮ່ວມມືຂົງເຂດວັດທະນະທຳ

ຂປລ. ທ່ານ ບົວເງິນ ຊາພູວົງ ຮອງລັດຖະມົນຕີກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ໄດ້ມີຄຳເຫັນໃນກອງປະຊຸມ ເວທີປຶກສາຫາລືການຮ່ວມມື ລາວ-ຈີນ "ໜຶ່ງແລວ ໜຶ່ງເສັ້ນທາງ" ໃນວັນທີ 2 ກຸມພາ 2018 ນີ້ ໂດຍ ຕີລາຄາສູງ ແລະ ໃຫ້ຄວາມສຳຄັນ ຕໍ່ການສະໜັບສະໜູນຮອບດ້ານ ແລະ ຕໍ່ເນື່ອງທີ່ ສປ ຈີນ ໃຫ້ການປະກອບສ່ວນຊ່ວຍເຫລືອ ເພື່ອພັດທະນາວັດທະນະທຳ ໃນຂົງເຂດບັນດາ ປະເທດ ລຸ່ມແມ່ນໍ້າຂອງໃຫ້ມີຄວາມຍືນຍົງ ໂດຍຜ່ານກິດຈະກຳ ເຄື່ອນໄຫວຫລາຍຮູບແບບເຊັ່ນ: ການແລກປ່ຽນບຸກຄະລາກອນ ແລະ ຝຶກອົບຮົມທາງດ້ານເຕັກນິກ.


ສປປ ລາວ ໄດ້ມີຄວາມພະຍາຍາມຕັ້ງໜ້າ ໃຫ້ໄດ້ເຂົ້າຮ່ວມບັນດາກິດຈະກຳຕ່າງໆ ທີ່ ສປ ຈີນ ເປັນເຈົ້າພາບ ເປັນຕົ້ນ ແມ່ນບັນດາກອງປະຊຸມສຳມະນາດ້ານວິຊາການ ເພື່ອສົ່ງເສີມ ແລະ ປົກປັກຮັກ ສາມໍລະດົກວັດທະນະທຳ, ການຮ່ວມຂຸດຄົ້ນດ້ານ ວັດຖຸບູຮານເພື່ອປົກປັກຮັກສາ, ການວາງສະແດງວັດທະນະທຳ ແລະ ໂຄງການແລກປ່ຽນ ທາງດ້ານສິລະປະຮ່ວມກັນ, ທັງມີການແລກປ່ຽນ ການຢ້ຽມຢາມ ສື່ມວນຊົນ ແລະ ມີການສົ່ງເສີມຢ່າງກ້ວາງຂວາງ ໃຫ້ແກ່ວຽກງານວັດທະນະທຳ ແລະ ທ່ອງທ່ຽວ. ໃນນັ້ນ, ແມ່ນກິດຈະກຳ ຄາລາວານມິດຕະພາບ ເຊິ່ງໄດ້ປະກອບສ່ວນຮັດແໜ້ນ ສາຍພົວພັນມິດຕະພາບອັນດີ ລະຫວ່າງ ປະຊາຊົນໃນຂົງເຂດພາກພື້ນ ແມ່ນໍ້າຂອງ-ແມ່ນໍ້າລ້ານຊ້າງ, ໄລຍະບໍ່ດົນມານີ້ ສປປ ລາວ ກໍໄດ້ຮັບກຽດເປັນເຈົ້າພາບ ຈັດຕັ້ງກອງປະຊຸມເວ ທີປຶກສາຫາລື ການທ່ອງທ່ຽວແມ່ນໍ້າຂອງ ປີ 2017 ທີ່ແຂວງຫລວງພະບາງ ເມືອງມໍລະດົກໂລກ ໃນຫົວຂໍ້" ຄວາມມຸ່ງຫວັງ ແລະ ຄວາມຈະເລີນ".
ທ່ານ ບົວເງິນ ຊາພູວົງ ຊີ້ໃຫ້ເຫັນຕື່ມວ່າ: ໃນໄລຍະຜ່ານມາ ການຮ່ວມມື ລາວ-ຈີນ ໄດ້ຮັບການເສີມຂະຫຍາຍ ທັງທາງກ້ວາງ ແລະ ລວງເລິກ, ເປັນປະເທດໃກ້ຄຽງທີ່ດີ. ລາວ-ຈີນ ໄດ້ຢຶດຫມັ້ນທາງການພົວພັນ ແບບຄູ່ຮ່ວມມືຍຸດທະສາດ ຮອບດ້ານຫມັ້ນຄົນ ວ່າງຍາວນານ ຕາມທິດ 4 ດີ, ເປັນຄູ່ຮ່ວມຊະຕາກຳສັງຄົມນິຍົມ ທີ່ບໍ່ສາມາດຕັດແຍກອອກຈາກກັນໄດ້.