ທ່ານ ຄຳໄຕ ສີພັນດອນ ເນັ້ນແຂວງເຊກອງ ສ້າງບ້ານເປັນຫົວໜ່ວຍພັດທະນາເພື່ອເຮັດໃຫ້ບ້ານມີການຫັນປ່ຽນທີ່ດີຂຶ້ນ

ຂປລ. ໃນວັນທີ 31 ມັງກອນ 2018, ທ່ານ ຄໍາໄຕ ສີພັນດອນ ອະດີດປະທານປະເທດ ແຫ່ງ ສປປ ລາວ, ໄດ້ລົງເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງເຊກອງ, ເຊິ່ງທ່ານ ໄດ້ເນັ້ນໜັກໃຫ້ຄະນະນໍາ ແຂວງເຊກອງ ຈົ່ງພອ້ມກັນເອົາໃຈໃສ່ ສືບຕໍ່ປັບປຸງ, ການຄຸ້ມຄອງການນຳພາ ໃຫ້ດີຂຶ້ນກວ່າເກົ່າ, ສືບຕໍ່ກໍ່ສ້າງ ວຽກງານພັກ-ພະນັກງານ ໃຫ້ໜັກແໜ້ນເຂັ້ມແຂງ, ສ້າງຮາກຖານ ການເມືອງ ຕິດພັນກັບວຽກງານ 3 ສ້າງ, ໂດຍສະເພາະ ການສ້າງບ້ານ ໃຫ້ເປັນຫົວໜ່ວຍພັດທະນາ ເຮັດໃຫ້ສະພາບຢູ່ຂັ້ນບ້ານ ມີການຫັນປ່ຽນ ທີ່ດີຂຶ້ນ ປະຊາຊົນມີຄວາມຢູ່ດີກິນດີ.

ພ້ອມດຽວກັນນັ້ນ, ທ່ານ ອະດີດປະທານປະເທດ ຍັງເນັ້ນໃຫ້ຄະນະນຳ ແຂວງເຊກອງ ເອົາໃຈໃສ່ ການປະຕິບັດ ລະບຽບກົດໝາຍ, ສະກັດກັ້ນບັນຫາ ຢາເສບຕິດ ແລະ ການສໍ້ລາດບັງຫລວງໃຫ້ໝົດໄປ ຢ່າງສີ້ນເຊິງ, ສ້າງພື້ນຖານໂຄງລ່າງ ເສດຖະກິດ-ສັງຄົມ ຢ່າງໜັກແໜ້ນ ດ້ວຍການຊຸກຍູ້ສົ່ງເສີມ ປະຊາຊົນຜະລິດເປັນສີນຄ້າ ຄຽງຄູ່ກັບການ ສະໝອງເຕັກນິກ ແລະ ເຄື່ອງມືການ ຜະລິດທີ່ທັນສະໄໝ ເພື່ອຕອບສະໝອງໄດ້ການ ບໍລິໂພກພາຍໃນ ແລະ ສົ່ງອອກ ອັນເປັນພື້ນຖານ ທີ່ສຳຄັນຂອງການສ້າງ ເສດຖະກິດ ຂອງແຂວງ ໃຫ້ແຂງແຮງ, ສ້າງກົນໄກທີ່ສອດຄ່ອງ ແລະ ສັກສິດ ຕໍ່ກັບການປະຕິບັດ ລະບຽບກົດໝາຍ, ຊຸກຍູ້ການສ້າງ ຄວາມສາມັກຄີປອງດອງ ຂອງປະຊາຊົນ ບັນດາເຜົ່າໃຫ້ໜັກແໜ້ນ, ສ້າງ ແລະ ພັດທະນາຊັບພະຍາກອນມະນຸດ ໃຫ້ມີຄຸນນະພາບ, ປະຕິບັດວຽກງານປອ້ງກັນຊາດ-ປອ້ງກັນຄວາສະຫງົບ ໃຫ້ໜັກແໜ້ນ-ເຂັ້ມແຂງ, ສ້າງໃຫ້ໄດ້ໜໍ່ແໜງ ສັງຄົມນິຍົມ ຢູ່ຮາກຖານເທື່ອລະກ້າວ. ຄຽງຄູ່ກັນນີ້, ກໍໃຫ້ເອົາໃຈໃສ່ການ ຈັດສັນງົບປະມານ ເຂົ້າໃສ່ການ ພັດທະນາເສດຖະກິດ- ສັງຄົມ ດ້ານທີ່ມີຄວາມຈໍາເປັນ ຕາມເງື່ອນໄຂຕົວຈິງ, ອຳນວຍຄວາມສະດວກ ໃຫ້ບັນດາຫົວໜວ່ຍທຸລະກິດ ທັງພາຍໃນ ແລະ ຕ່າງປະເທດ ເຂົ້າມາລົງທຶນ ຢູ່ແຂວງຕົນ ໃຫ້ນັບມື້ນັບຫລາຍຂຶ້ນ ເພື່ອສ້າງໃຫ້ປະຊາຊົນ ມີວຽກເຮັດງານທຳ ພັດທະນາຄອບຄົວ ຂອງຕົນໃຫ້ມີຄວາມຢູ່ດີກິນດີ ເທື່ອລະກ້າວ.
ໃນໂອກາດນີ້, ທ່ານ ຄຳເຜີຍ ບຸດດາວຽງ ເລຂາພັກແຂວງ, ເຈົ້າແຂວງໆເຊກອງ ໄດ້ລາຍງານ ການຊີ້ນໍາ-ນໍາພາ ຈັດຕັ້ງປະຕິບັດ ການພັດທະນາ ເສດຖະກິດ-ສັງຄົມ ຂອງແຂວງເຊກອງ ປີ 2017 ວ່າ: ໃນ 1 ປີຜ່ານມາ ສະພາບລວມ ຂອງແຂວງເຊກອງ ຍັງສືບຕໍ່ມີສະຖຽນລະພາບ ທາງດ້ານການເມືອງ, ສັງຄົມມີຄວາມສະຫງົບ, ເສດຖະກິດຂອງ ແຂວງ ສືບຕໍ່ຂະຫຍາຍຕົວ ດ້ວຍຈັງຫວະໝັ້ນທ່ຽງ, ລວມຍອດຜະລິດຕະພັນພາຍໃນ ຫລື GDP ຂະຫຍາຍຕົວໃນລະດັບ 9,1% ສະເລ່ຍຕໍ່ຫົວຄົນບັນລຸໄດ້ 12,64 ລ້ານກີບ ຫລື ເທົ່າກັບ 1.580 ໂດລາສະຫະລັດ, ການຂຸດຄົ້ນລາຍຮັບ ເຂົ້າງົບປະມານ ຂອງລັດໝົດປີບັນລຸ ໄດ້ລື່ນແຜນການທີ່ວາງໄວ້, ການປະຕິບັດດ້ານລາຍຈ່າຍອັນເປັນພື້ນຖານ ແມ່ນຮັບປະກັນການ ເບີກຈ່າຍ ເງິນເດືອນຂະບວນການຜະລິດ, ການປູກ-ການລ້ຽງ ຂອງປະຊາຊົນ ສືບຕໍ່ຂະຫຍາຍຕົວເພີ່ມຂຶ້ນ.