ຮອງປະທານສະພາແຫ່ງຊາດ ເຄື່ອນໄຫວຢ້ຽມຢາມ ກອງພົນທີ 1

ຂປລ. ທ່ານ ພົທ ແສງນວນ ໄຊຍະລາດ ຮອງປະທານສະພາແຫ່ງຊາດ ພ້ອມຄະນະ ໄດ້ລົງ ເຄື່ອນໄຫວຢ້ຽມຢາມ ແລະ ໂອ້ລົມຄະນະພັກ, ຄະນະບັນຊາຂັ້ນຕ່າງໆ ແລະ ພະນັກງານ-ນັກຮົບຢູ່ ກອງພົນທີ 1 ໃນວັນທີ 27 ມັງກອນ, ໂດຍມີ ພັນເອກ ແສງຍືນ ລັດສະໝີ ເລຂາຄະນະພັກ ຫົວໜ້າ ການເມືອງ ກອງພົນທີ 1 ແລະ ພັນເອກ ພັນສາຍ ຂັນທະໄຊ ຮອງເລຂາຄະນະພັກ ຫົວໜ້າ ການທະ ຫານ ກອງພົນທີ 1 ພ້ອມຄະນະ ໃຫ້ກຽດຕ້ອນຮັບ.

ທ່ານ ພັນເອກ ແສງຍືນ ລັດສະໝີ ໄດ້ລາຍງານໂດຍສັງເຂບ ກ່ຽວກັບປະຫວັດການກໍາເນີດ ແລະ ປັບປຸງກໍ່ສ້າງເຕີບໃຫຍ່ຂະຫຍາຍຕົວ ໜັກແໜ້ນເຂັ້ມແຂງຮອບດ້ານ ແລະ ການເຄື່ອນໄຫວ ເຮັດ ໜ້າທີ່ຂອງກອງພົນທີ 1 ໃນປັດຈຸບັນ ຕາມພະລະບົດບາດ ຂອບເຂດສິດໜ້າທີ່ ທີ່ຮັບການ ມອບໝາຍຈາກ ພັກ-ລັດ, ໂອກາດ ທີ່ເຄື່ອນໄຫວ ຢ້ຽມຢາມກອງພົນທີ 1 ຂອງ ທ່ານ ພົທ ແສງນວນ ໄຊຍະລາດ ໃນຄັ້ງນີ້, ໃນນາມທ່ານ ເຄີຍເປັນອະດີດຜູ້ບັນຊາການກອງພົນທີ 1 ທ່ານ ກໍໄດ້ສະແດງ ຄວາມຍ້ອງຍໍຊົມເຊີຍ ຕີລາຄາສູງຕໍ່ຜົນງານ ແລະ ມູນເຊື້ອທີ່ກອງພົນທີ 1 ໄດ້ອອກແຮງເຄື່ອນໄຫວ ແລະ ຍາດໄດ້ຜົນສໍາເລັດ ໃນຫລາຍດ້ານ ໃນຜ່ານມາ ພ້ອມທັງໃຫ້ທິດຊີ້ນໍາ ຫລາຍບັນຫາສຳຄັນຕໍ່ ຄະນະພັກ-ຄະນະບັນ ຊາການກອງພົນທີ 1 ຈົ່ງອອກແຮງເສີມຂະຫຍາຍທາດແທ້ ມູນເຊື້ອປະຕິວັດ ນໍ້າໃຈອົງອາດກ້າຫານ, ເດັດດ່ຽວ, ໜຽວແໜ້ນ, ໃຫ້ເລິກເຊິ່ງ ແທດເໝາະກັບສະພາບການໃໝ່ ສຳຄັນ ແມ່ນເອົາໃຈໃສ່ເຮັດວຽກ ງານສຶກສາອົບຮົມ ການເມືອງແນວຄິດ ຖັນແຖວສະມາຊິກພັກ ພະນັກງານ-ນັກຮົບ ໃຫ້ມີຄຸນທາດການ ເມືອງໜັກແໜ້ນ, ຍາມໃດກໍມີຄວາມຈົງຮັກ, ພັກດີ, ບໍລິສຸດຜຸດຜ່ອງ ຕໍ່ພັກ, ປະເທດຊາດ ແລະ ປະຊາຊົນ, ມີລະບຽບວິໄນເຂັ້ມງວດ. ເຊື່ອໝັ່ນຕໍ່ການ ນໍາພາຂອງພັກ, ມີຄວາມເດັດດ່ຽວໜຽວແໜ້ນ, ພິລາດອາດຫານ, ມີນໍ້າໃຈເສຍສະຫລະ ອັນສູງສົ່ງເພື່ອຊາດ, ເພື່ອປະ ຊາຊົນ, ເພື່ອອຸດົມການສັງຄົມນິຍົມ, ບໍ່ຫວັ່ນໄຫວ ຄອນແຄນຕໍ່ອຸປະສັກ, ມີມານະຈິດອົດທົນ ຜ່ານຜ່າທຸກຄວາມຫຍຸ້ງຍາກ ນາໆປະການ ແລະ ຍອມເສຍສະຫລະຊີວິດ, ເລືອດເນື້ອ ເພື່ອການ ປະຕິວັດ, ມີນໍ້າໃຈດຸໝັ່ນ ຂະຫຍັນພຽນໃນການອອກແຮງງານ, ເພີ່ມພູນຜະລິດຜົນ ແລະ ປະຢັດ ທັດທ່ຽງ, ຍາມໃດກໍ່ມີຄວາມສາມັກຄີ, ຊ່ວຍເຫລືອປະຊາຊົນບັນ ດາເຜົ່າຢ່າງສຸດອົກສຸດໃຈ.
ໂອກາດດັ່ງກ່າວ, ເພື່ອສະແດງເຖິງ ຄວາມເປັນຫ່ວງເປັນໃຍ ແລະ ເພື່ອຊຸກຍູ້ນໍ້າໃຈຟົດຟື້ນ ປະຕິວັດຂອງ ພະນັກງານ-ນັກຮົບ ກອງພົົນທີ 1 ທ່ານ ພົທ ແສງນວນ ໄຊຍະລາດ ກໍໄດ້ນໍາເອົາ ວັດຖຸປັດໄຈ, ເຄື່ອງອຸປະໂພກ-ບໍລິໂພກ ແລະ ອຸປະກອນຫລີ້ນກີລາ ທີ່ໄດ້ຮັບການສະໜັບສະໜູນ ຊຸກຍູ້ຊ່ວຍເຫລືອ ຈາກອົງການຈັດຕັ້ງມະຫາຊົນ ພາຍໃນສະພາແຫ່ງຊາດ; ມູນນິທິ ຊ່ວຍເຫລືອ ຄົນທຸກຍາກ; ຕົວແທນບໍລິສັດ ອີຊູຊຸລາວ, ອົງການຈັດຕັ້ງຕ່າງໆ ແລະ ບໍລິສັດຫ້າງຮ້ານຕ່າງໆ ລວມມູນຄ່າ 100 ກວ່າລ້ານກີບ ມອບໃຫ້ກອງພົນທີ 1 ເພື່ອແຈກຢາຍ ໃຫ້ພະນັກງານ-ນັກຮົບ ກົມກອງຮາກຖານ ຕ່າງໆທີ່ເຄື່ອນໄຫວເຮັດໜ້າທີ່ຢູ່ ເຂດຫ່າງໄກສອກຫລີກ ທຸລະກັນດານ ໄດ້ນໍາໃຊ້ ອີກດ້ວຍ.