ກອງປະຊຸມລັດຖະມົນຕີທ່ອງທ່ຽວອາຊຽນ ຄັ້ງທີ 21 ໄດ້ພິຈາລະນາຮັບຮອງເອົາ 2 ເອກະສານສໍາຄັນ

ຂປລ. ກອງປະຊຸມລັດຖະມົນຕີທ່ອງທ່ຽວອາຊຽນ ຄັ້ງທີ 21 ໄດ້ໄຂຂຶ້ນຢ່າງເປັນທາງການ ພາຍໃຕ້ການເປັນປະທານ ຂອງ ທ່ານ ລັດຖະມົນຕີກະຊວງທ່ອງທ່ຽວ ແລະ ກິລາ ແຫ່ງ ປະເທດໄທ ທ່ານ ວິລະສັກ ໂຄສຸລັດ ທີ່ ຊຽງໃໝ່ ປະເທດໄທ ໃນລະຫວ່າງວັນທີ 25-27 ມັງກອນ 2018, ຄະນະຜູ້ແທນລາວນໍາໂດຍ ທ່ານ ບໍ່ແສງຄໍາ ວົງດາລາ ລັດຖະມົນຕີ ກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ, ມີບັນດາ ທ່ານລັດຖະມົນຕີ, ເລຂາທິການໃຫຍ່ອາຊຽນ, ຮອງລັດຖະມົນຕີ, ບັນດາຫົວໜ້າເຈົ້າໜ້າທີ່ອາວຸໂສ ຮັບຜິດຊອບວຽກງານທ່ອງທ່ຽວ ຈາກບັນດາປະເທດອາຊຽນ ເຂົ້າຮ່ວມຢ່າງພ້ອມພຽງ.

 

ກອງປະຊຸມຄັ້ງນີ້, ແມ່ນກອງປະຊຸມປະຈໍາປີ ຂອງບັນດາລັດຖະມົນຕີທ່ອງທ່ຽວອາຊຽນ ຮ່ວມກັນທົບທວນຜົນ ການຈັດຕັ້ງປະຕິບັດ ບັນດາແຜນວຽກ ການຮ່ວມມືດ້ານການທ່ອງທ່ຽວ ຂອງພາກພື້ນອາຊຽນ 2016-2017 ລວມທັງບັນດາກິດຈະກໍາ ທີ່ຖືກຈັດຕັ້ງປະຕິບັດ ໂດຍບັນດາສູນອາຊຽນ ຂອງປະເທດ +3. ພ້ອມດຽວກັນນີ້, ກອງປະຊຸມຍັງໄດ້ ປຶກສາຫາລືພາຍໃຕ້ຫົວຂໍ້ “ການເຊືອມຈອດ ແບບຍືນຍົງຂອງອາຊຽນ, ຄວາມສີວິໄລບໍ່ມີພົມແດນ” ເພື່ອກໍານົດ ແລະ ຮັບຮອງແຜນການຮ່ວມມືດ້ານການທ່ອງທ່ຽວໄລຍະ 2 ປີ 2018-2019 ຂອງແຜນຍຸດທະສາດ ການທ່ອງທ່ຽວອາຊຽນ 2016-2025 ແລະ ພ້ອມກັນພິຈາລະນາຮັບ ຮອງເອົາ 2 ເອກະສານສໍາຄັນ ເຊັ່ນ: ຖະແຫລງການຮ່ວມວ່າດ້ວຍ ສິລະປະການປຸງແຕ່ງອາຫານ ແລະ ການທ່ອງທ່ຽວ. ຖະແຫລງການວ່າດ້ວຍ ການທ່ອງທ່ຽວທາງເຮືອ. ນອກນັ້ນ, ຍັງມີກອງປະຊຸມປີ່ນອ້ອມ ຂອງລັດຖະມົນຕີທ່ອງທ່ຽວອາຊຽນ ຮ່ວມກັບບັນດາປະເທດຄູ່ເຈລະຈາ ເຊັ່ນ: ອາຊຽນ-ປະເທດ +3 (ສປ ຈີນ, ສ.ເກົາຫລີ ແລະ ຍີ່ປຸ່ນ), ອາຊຽນ-ອິນເດຍ ເພື່ອຮ່ວມກັນທົບທວນ ຜົນແຜນການຮ່ວມມື ໃນໄລຍະຜ່ານມາ ພ້ອມທັງກໍານົດ ແລະ ຮັບຮອງເອົາແຜນການ ຮ່ວມມືດ້ານການທ່ອງທ່ຽວ ໄລຍະ 2 ປີ 2018-2020 ສໍາລັບປະເທດ +3 ແລະ ຮັບຮອງເອົາຖະແຫລງການຮ່ວມ ດ້ານການທ່ອງທ່ຽວ ອາຊຽນ-ອິນເດຍ ຄັ້ງທີ 6 ໃນວັນທີ 26 ມັງກອນ 2018.