ຜົນກອງປະຊຸມລັດຖະບານສະໄໝສາມັນປະຈໍາເດືອນມັງກອນ 2018

ກອງປະຊຸມລັດຖະບານສະໄໝສາມັນ ປະຈຳເດືອນມັງກອນ 2018 ໄດ້ໄຂຂຶ້ນຢ່າງເປັນທາງການໃນວັນທີ 22 ແລະ ປິດລົງໃນວັນທີ 24 ມັງກອນ 2018 ທີ່ສໍານັກງານນາຍົກລັດຖະມົນຕີ, ພາຍໃຕ້ການເປັນປະທານຂອງທ່ານ ທອງລຸນ ສີສຸລິດ ນາຍົກລັດຖະມົນຕີ ມີບັນດາທ່ານຮອງນາຍົກລັດຖະມົນຕີ, ສະມາຊິກລັດຖະບານ ແລະ ພາກສ່ວນທີ່ກ່ຽວຂ້ອງເຂົ້າຮ່ວມຢ່າງພ້ອມພຽງ.

ກອງປະຊຸມໃນຄັ້ງນີ້, ໄດ້ພ້ອມກັນປຶກສາຫາລື ແລະ ພິຈາລະນາຮັບຮອງເອົາບັນດາເອກະ ສານສໍາຄັນຈໍານວນໜຶ່ງດັ່ງນີ້:
1). ບົດລາຍງານກ່ຽວກັບສະພາບພົ້ນເດັ່ນໃນພາກພື້ນ ແລະ ສາກົນ, ສະພາບຄວາມສະຫງົບ ແລະ ຄວາມເປັນລະບຽບຮຽບຮ້ອຍໃນສັງຄົມ, ບົດລາຍງານກ່ຽວກັບການຈັດຕັ້ງປະຕິບັດແຜນງົບປະມານ ປີ 2017.
- ຕໍ່ບັນຫາດັ່ງກ່າວ, ກອງປະຊຸມໄດ້ຊີ້ນໍາໃຫ້ທຸກພາກສ່ວນທີ່ກ່ຽວຂ້ອງ ຈົ່ງຍົກສູງສະຕິລະວັງຕົວ ເພື່ອກຽມພ້ອມຮັບມື ຕໍ່ສະພາບການປ່ຽນແປງຂອງພາກພື້ນ ແລະ ສາກົນ, ມີສະຕິລະວັງຕົວຕໍ່ກົນອຸບາຍ ທໍາລາຍມ້າງເພຂອງຄົນບໍ່ຫວັງດີ, ເອົາໃຈໃສ່ແກ້ໄຂບັນຫາ ປະກົດການຫຍໍ້ທໍ້ໃນສັງຄົມໃຫ້ຫລຸດລົງ ເປັນຕົ້ນບັນຫາຢາເສບຕິດ, ອຸປະຕິເຫດບັນຫາ ທີ່ເກີດຂຶ້ນແມ່ນຍ້ອນຫຍັງ ໃຫ້ແກ້ໄຂຢູ່ຈຸດນັ້ນ, ການລະເມີດຄໍາສັ່ງເລກທີ 15/ນຍ ແລະ ບັນຫາ ຄວາມເປັນລະບຽບຮຽບຮ້ອຍຂອງສັງຄົມ. ພ້ອມດຽວກັນນີ້, ໃຫ້ເອົາໃຈໃສ່ ໃນການຄຸ້ມຄອງລາຄາສິນຄ້າໃຫ້ດີ, ທົບທວນຄືນການຈັດຕັ້ງປະຕິບັດນະໂຍບາຍຕ່າງໆ ຂອງລັດຖະບານ ໃນໄລຍະທີ່ຜ່ານມາ, ເອົາໃຈໃສ່ໃນການຈັດເກັບລາຍຮັບໃຫ້ໄດ້ຕາມແຜນ ຫລື ໃຫ້ລື່ນຄາດໝາຍທີ່ວາງໄວ້ ໂດຍມີການນໍາໃຊ້ມາດຕະການ ທີ່ເຂັ້ມງວດ ແລະ ເຄື່ອງມືທີ່ທັນສະໄໝ ເຂົ້າໃນການຈັດເກັບລາຍຮັບ, ຫລຸດຜ່ອນການໃຊ້ຈ່າຍງົບປະມານທີ່ບໍ່ຈໍາເປັນ ແລະ ຫັນລົງຊຸກຍູ້ສົ່ງເສີມການຜະລິດເປັນສິນຄ້າຂອງປະ ຊາຊົນໃຫ້ຫລາຍຂຶ້ນ.
2).ບົດລາຍງານກ່ຽວກັບຄວາມຄືບໜ້າໃນການກະກຽມກອງປະຊຸມ ຄັ້ງທີ 40 ຂອງສອງຄະນະຮ່ວມມື ລາວ-ຫວຽດນາມ, ຫວຽດນາມ-ລາວ ປະຈໍາປີ 2018 ທີ່ລາວເຮົາຈະເປັນເຈົ້າພາບ.
- ຕໍ່ບົດລາຍງານດັ່ງກ່າວ ກອງປະຊຸມໄດ້ຊີ້ນໍາໃຫ້ຂະແໜງການ ທີ່ກ່ຽວຂ້ອງເອົາໃຈໃສ່ຕີລາຄາ ແລະ ສະຫລຸບຖອດຖອນບົດຮຽນຄືນ ບັນດາໂຄງການຮ່ວມມືຕ່າງໆ ທີ່ສອງປະເທດໄດ້ຕົກລົງຮ່ວມມືກັນ ໃນໄລຍະທີ່ຜ່ານມາ ໂຄງການໃດມີປະສິດທິຜົນ, ໂຄງການໃດທີ່ຍັງຄ້າງຄາ ແລະ ໂຄງການໃດທີ່ຈະຕ້ອງຮ່ວມມືກັນໃນຕໍ່ໜ້າ; ສືບຕໍ່ ແລະ ຂຸ້ນຂ້ຽວເຈລະຈາໂຄງການໃດທີ່ມີຄວາມຈໍາເປັນທີ່ຈະໃຫ້ຝ່າຍຫວຽດນາມ ແລະ ຈະລົງນາມຮ່ວມມືກັນໃນຕໍ່ໜ້າ, ເອົາໃຈໃສ່ຈັດລຽງບູລິມະສິດຂອງໂຄງການ ຮ່ວມມືຕ່າງໆ ເພື່ອຈັດຕັ້ງປະຕິບັດໃຫ້ມີປະສິດທິຜົນ ແລະ ເຂົ້າສູ່ລວງເລິກຕົວຈິງ.
3).ບົດລາຍງານ ກ່ຽວກັບການຈັດຕັ້ງປະຕິບັດ ບັນດາໂຄງການຮ່ມມື ລາວ-ຈີນ ໃນໄລຍະຜ່ານມາ, ຄວາມຄືບໜ້າ ໃນການຄົ້ນຄວ້າ ແລະ ສັງລວມບັນຊີໂຄງການລະອຽດ ເພື່ອສະເໜີຕໍ່ລັດຖະບານ ສປ ຈີນ ໃນການນໍາໃຊ້ທຶນ ຊ່ວຍເຫລືອ ຕາມການຊີ້ນໍາ ຂອງກອງປະຊຸມລັດຖະບານ ສະໄໝສາມັນປະຈໍາເດືອນ ພະຈິກ 2017.
- ສໍາລັບທຶນທີ່ໄດ້ຮັບການຊ່ວຍເຫລືອລ້າໃນຄັ້ງນີ້ ແມ່ນຈະໄດ້ນໍາໃຊ້ເຂົ້າໃນການພັດທະນາ ຂົງເຂດການສຶກສາ, ສາທາລະນະສຸກ, ການພັດທະນາສັງຄົມ, ສິ່ງແວດລ້ອມ ແລະ ການພັດທະນາຊົນນະບົດ ແນໃສ່ເພື່ອປະກອບສ່ວນໃຫ້ແກ່ການລຶບ ລ້າງຄວາມທຸກຍາກ ແລະ ເປັນການສົ່ງເສີມການຜະລິດ-ການຄ້າຂອງປະຊາຊົນ.ພ້ອມດຽວກັນນີ້, ກອງປະຊຸມ ໄດ້ຊີ້ນໍາໃຫ້ພາກສ່ວນທີ່ກ່ຽວຂ້ອງເອົາ ໃຈໃສ່ສືບຕໍ່ຈັດຕັ້ງປະຕິບັດບັນດາໂຄງການ ຊ່ວຍເຫລືອຂອງ ສປ ຈີນ ໃນໄລຍະທີ່ຜ່ານມາ ທີ່ຍັງບໍ່ທັນໄດ້ຈັດຕັ້ງປະຕິບັດ ໃຫ້ສໍາເລັດຕາມແຜນພ້ອມນີ້ ຕ້ອງໄດ້ມີການຕິດຕາມກວດກາ ການຈັດຕັ້ງປະຕິບັດທຶນຊ່ວຍເຫລືອດັ່ງກ່າວ ໃຫ້ມີຜົນປະໂຫຍດສູງສຸດ ແລະ ເປັນທີ່ໜ້າພໍໃຈຂອງຜູ້ໃຫ້ການຊ່ວຍເຫລືອ. ກອງປະຊຸມ ຍັງໄດ້ຊີ້ນໍາ ໃຫ້ຄະນະຮ່ວມມື ລາວ-ຈີນ ເອົາໃຈໃສ່ປະສານສົມທົບ ແລະ ປຶກສາຫາກັບຝ່າຍຈີນ ໃຫ້ລະອຽດ, ຈະແຈ້ງ ກ່ຽວກັບການຄຸ້ມຄອງ ແລະ ນໍາໃຊ້ທຶນດັ່ງກ່າວ, ໂດຍສະເພາະໃຫ້ຈັດລຽງບູລິມະສິດໂຄງການ ທີ່ຈະສຸມໃສ່ຈັດຕັ້ງປະຕິບັດ ຢູ່ 5 ແຂວງບູລິມະສິດ ຄື: ແຂວງຜົ້ງສາລີ, ອຸດົມໄຊ, ຫລວງນໍ້າທາ, ຫລວງພະບາງ ແລະ ແຂວງວຽງຈັນ.
ສໍາລັບກອງປະຊຸມລັດຖະບານສະໄໝສາມັນ ປະຈໍາເດືອນກຸມພາ ຄາດວ່າຈະຈັດຂຶ້ນໃນວັນທີ 20-22 ກຸມພາ 2018.