ປະເທດລາວພາຍໃຕ້ການນຳພາຂອງພັກ

ນັບແຕ່ຊຸມປີ 30 ຂອງສະຕະວັດທີ 20 ເປັນຕົ້ນມາຂະບວນການຕໍ່ສູ້ຂອງປະຊາຊົນລາວ ໄດ້ຕິດພັນກັບການຕໍ່ສູ້ຂອງປະຊາຊົນ 3  ຊາດ ອິນດູຈີນ ທີ່ນຳພາໂດຍພັກກອມມູນິດອິນດູຈີນ ເພື່ອຕ້ານກັບຈັກກະພັດຜູ້ຮຸກຮານ ແລະ ໄດ້ຮັບໄຊຊະນະເປັນກ້າວໆ ຈົນຮອດປີ 1945 ສົງຄາມໂລກຄັ້ງທີ່ II ໄດ້ສິ້ນສຸດລົງ. ປະຊາຊົນຫວຽດນາມໄດ້ດຳເນີນການປະຕິວັດເດືອນສີງຫາສຳເລັດ ແລະ ປະກາດເອກະລາດໃນວັນທີ 2 ກັນຍາ 1945.

ໂດຍຍາດເອົາກາລະໂອກາດທີ່ຫາຍາກດັ່ງກ່າວປະຊາຊົນລາວໄດ້ລຸກຮື້ຂຶ້ນຍຶດອຳນາດຢູ່ນະຄອນຫຼວງວຽງຈັນໃນວັນທີ 23 ສີງຫາ ແລະ ກ້າວໄປສູ່ການປະກາດເອກະລາດໃນວັນທີ 12 ຕຸລາ 1945 ອັນເປັນຂີດໝາຍທາງປະຫັວດສາດພາຍໃຕ້ການນຳພາຂອງພັກ ແລະ ແນວລາວອິດສະຫຼະ. ພາຍຫຼັງໄດ້ຮັບໄຊຊະນະຢູ່ ດຽນບຽນຟູ ປີ 1954 ( ຫວຽດນາມ ) ກໍ່ໄດ້ມີການເຊັນສັນຍາເຊີແນວ ແລະ ມອບເອກະລາດໃຫ້ແກ່ອິນດູຈີນໂດຍສະເພາະ 3 ປະເທດ: ລາວ, ຫວຽດນາມ, ກຳປູເຈຍ. ຕໍ່ຈາກນັ້ນລັດທິລ່າເມືອງຂຶ້ນແບບໃໝ່ກໍ່ໄດ້ເຂົ້າມາແທນລັດທິລ່າເມືອງຂຶ້ນແບບເກົ່າ ດຳເນີນສົງຄາມພິເສດນັບຕັ້ງແຕ່ປີ 1964 ເປັນຕົ້ນມາ ພວກເຂົາໄດ້ໃຊ້ກຳລັງທາງອາກາດໂຈມຕີ ແລະ ຖີ້ມລະເບີດທຳລາຍຢ່າງຮ້າຍແຮງໃສ່ຜືນແຜ່ນດິນລາວເຖິງ 3 ລ້ານໂຕນ ຄິດສະເລ່ຍຄົນລາວ( 3 ລ້ານຄົນ ໃນຊຸມປີ 60 ) ໄດ້ຮັບລະເບີດຂອງສັດຕູຜູ້ລະ 1 ໂຕນ.
ການປະຕິວັດຊາດ ປະຊາທິປະໄຕ ຕ້ານຈັກກະພັດຜູ້ຮຸກຮານເປັນເວລາ 30 ກ່ວາປີ, ພາຍໃຕ້ການນຳພາຂອງພັກປະຊາຊົນລາວໃນເມື່ອກ່ອນ ກໍ່ຄືພັກປະຊາຊົນປະຕິວັດລາວໃນປະຈຸບັນທີ່ໄດ້ສ້າງຕັ້ງຂຶ້ນ ໃນວັນທີ 22 ມີນາ 1955 ປະຊາຊົນລາວບັນດາເຜົ່າໄດ້ສາມັກຄີກັນຕ້ານຈັກກະພັດຜູ້ຮຸກຮານ ແລະ ໄດ້ຮັບໄຊຊະນະຢ່າງສົມບູນ ໃນວັນທີ 2 ທັນວາ 1975. ຈາກນັ້ນພັກກໍ່ໄດ້ສືບຕໍ່ນຳພາ ພາລະກຳປະຫັວດສາດອັນໃໝ່ ຄື ປົກປັກຮັກສາສ້າງສາປະເທດຊາດ ແລະ ບູລະນະລະບອບປະຊາທິປະໄຕປະຊາຊົນກ້າວສູ່ສັງຄົມນິຍົມເທື່ອລະກ້າວ. ພັກປະຊາຊົນປະຕິວັດລາວ ໄດ້ດຳເນີນກອງປະຊຸມໃຫ່ຍມາແລ້ວ 8 ຄັ້ງ, ແຕ່ລະຄັ້ງໄດ້ມີບົດລາຍງານການເມືອງ, ວາງແນວທາງຍຸດທະສາດແຕ່ລະສະໄໝ ເພື່ອໃຫ້ແທດເໝາະກັບສະພາບການພາຍໃນ ແລະ ສາກົນທີ່ມີການປ່ຽນແປງ, ກອງປະຊຸມໃຫ່ຍແຕ່ລະຄັ້ງໄດ້ເລືອກຕັ້ງເອົາຜູ້ນຳສູງສຸດຂອງພັກ, ໄດ້ຮັບຮອງເອົາກົດລະບຽບຂອງພັກ ແຕ່ລະສະໄໝ. ປະທານໄກສອນ ພົມວິຫານ ໄດ້ຮັບເລືອກຕັ້ງເປັນເລຂາທິການໃຫ່ຍ ແລະ ປະທານຄະນະບໍລິຫານງານສູນການພັກ ແຕ່ຄັ້ງທີ່ I ຈົນເຖິງຄັ້ງທີ່ V, ຈາກນັ້ນກອງປະຊຸມໃຫ່ຍຄັ້ງທີ່ VI ຂອງພັກໄດ້ເລືອກເອົາ ທ່ານຄຳໄຕ ສີພັນດອນ ເປັນປະທານພັກຈົນເຖິງກອງປະຊຸມໃຫ່ຍຄັ້ງທີ່ VIII, ນັບແຕ່ກອງປະຊຸມໃຫຍ່ ຄັ້ງທີ່ VIII ຈົນເຖິງປະຈຸບັນໄດ້ເລືອກເອົາ ທ່ານ ຈູມມາລີ ໄຊຍະສອນ ດຳລົງຕຳແໜ່ງເປັນເລຂາທິການໃຫຍ່ຂອງຄະນະບໍລິຫານງານສູນກາງພັກປະຊາຊົນປະຕິວັດລາວ ເພື່ອສືບຕໍ່ນຳພາປວງຊົນລາວທັງຊາດສ້າງສາພັດທະນາປະເທດຊາດໃນຍຸກໂລກາພິວັດຂອງສະຕະວັດທີ 21.